ຄະນະສື່ມວນຊົນລາວຮັດແໜ້ນສາຍພົວພັນການຮ່ວມມືກັບອົສຕຣາລີ

ການຢ້ຽມຢາມຄັ້ງນີ້ແມ່ນນໍາໂດຍ ທ່ານ ວັນສີ ກົວມົວ ຮອງຫົວໜ້າຄະນະໂຄສະນາອົບຮົມສູນກາງພັກ ແລະ ມີພະນັກງານການນຳຈາກກົມຂ່າວກະຊວງການຕ່າງປະເທດເຂົ້າຮ່ວມໃນຄະນະ. ໃນໄລ ຍະການຢ້ຽມຢາມ, ຄະນະສື່ມວນຊົນໄດ້ພົບປະກັບຄູ່ຮ່ວມງານອົສຕຣາລີ ແລະ ໄດ້ສ່ອງແສງໃຫ້ເຫັນສາຍພົວພັນມິດຕະພາບ ລະຫວ່າງລາວ ແລະ ອົສຕຣາລີ ແມ່ນນັບມື້ນັບກ້າວສູ່ລວງເລິກ ໂດຍສະເພາະແມ່ນ ການຮ່ວມມືພາຍໃຕ້ຂອບການຮ່ວມມືຮອບດ້ານລະຫວ່າງສອງປະເທດ. ຄະນະຜູ້ແທນໄດ້ສຶກສານະໂຍບາຍ ແລະ ວິທີການຂອງອົສຕຣາລີໃນການໃຫ້ຂໍ້ມູນທີ່ໜ້າເຊື່ອຖື, ຄວາມຮູ້ກ່ຽວກັບສື່ມວນຊົນ, ການຫັນເປັນດີຈີຕອນ, ການຈໍາກັດອາຍຸເດັກນ້ອຍໃນການບໍລິໂພກສື່ອອນລາຍ ແລະ ສະພາບການປ່ຽນແປງຢ່າງໄວວາຂອງສື່ມວນຊົນລາວ ແລະ ອົສຕຣາລີ, ການຢ້ຽມຢາມໄດ້ເປັນໂອກາດອັນດີໃຫ້ແກ່ພະນັກງານຂັ້ນສູງຂອງລາວເພື່ອແລກປ່ຽນບົດຮຽນ ແລະ ປະສົບການກັບຝ່າຍອົສຕຣາລີໃນການແກ້ໄຂສິ່ງທ້າທາຍຕ່າງໆທີ່ສື່ມວນຊົນກໍາລັງປະເຊີນຢູ່, ທ່ານ ວັນສີ ກົວມົວ ກ່າວວ່າ: ຂ່າວປອມ ຫຼື ຂ່າວທີ່ບໍ່ຖືກຕ້ອງ ຍັງເປັນ "ໜຶ່ງໃນສິ່ງທ້າທາຍທີ່ຫຼາຍທີ່ສຸດທີ່ພວກເຮົາກຳລັງປະເຊີນຢູ່ໃນປັດຈຸບັນ," ທ່າມກາງການຂະຫຍາຍຕົວຢ່າງວ່ອງໄວຂອງສື່ສັງຄົມອອນລາຍ.

ຢູ່ເມືອງແຄນເບີລາ, ຄະນະຜູ້ແທນໄດ້ໄປຢ້ຽມຢາມຫໍພິພິດຕະພັນແຫ່ງຊາດອົສຕຣາລີ ຊຶ່ງເປັນບ່ອນເກັບຮັກສາຜົນງານສິລະປະອັນສໍາຄັນຂອງຊົນເຜົ່າພື້ນເມືອງ ແລະ ພາກພື້ນ ລວມທັງຮູບແຕ້ມອັນປານີດຈາກ ສປປ ລາວ. ນອກຈາກນັ້ນ ຄະນະຜູ້ແທນຍັງໄປຢ້ຽມຢາມສະພາອົສຕຣາລີ ແລະ ໄດ້ຮັບຟັງໂດຍຫຍໍ້ກ່ຽວກັບລະບົບການເຮັດວຽກຂອງລັດຖະບານ ແລະ ການຮ່ວມມືກັບສື່ມວນຊົນ, ໃນຂະນະຢູ່ເມືອງຊິດນີ, ຄະນະສື່ມວນຊົນໄດ້ໄປຢ້ຽມຢາມ ສຳນັກຂ່າວເອບີຊິ (ABC) ແລະ SBS ເພື່ອເບິ່ງວິທີການຜະລິດຂ່າວ ແລະ ການລາຍງານຂ່າວການເມືອງ. ຄະນະຍັງໄດ້ຮັບຟັງ ແລະ ເຂົ້າໃຈວ່າ ເຖິງວ່າອົງກອນສື່ດັ່ງກ່າວໄດ້ຮັບທຶນຈາກລັດຖະບານແຕ່ພວກເຂົາມີຄວາມເປັນເອກະລາດໃນການບໍລິຫານງານເພື່ອຮັບປະ ກັນວ່າຜູ້ອ່ານຜູ້ຊົມສາມາດເຂົ້າເຖິງຂໍ້ມູນຂ່າວສານທີ່ຖືກຕ້ອງ ແລະ ມີຄຸນນະພາບສູງ. ໂດຍສະເພາະ ສຳ ນັກຂ່າວເອບີຊີ ໄດ້ອະທິບາຍເຖິງການຫັນປ່ຽນຈາກການລາຍງານຂ່າວແບບດັ້ງເດີມ ໄປສູ່ການລາຍງານຂ່າວຕາມຄວາມຕ້ອງການຂອງປະຊາຊົນ, ຜົນປະໂຫຍດຂອງການມີຊ່ອງທາງຮັບຂໍ້ມູນຂ່າວສານທາງອອນລາຍຫຼາຍຂຶ້ນ ແລະຄວາມຈໍາເປັນໃນການຍົກລະດັບຫ້ອງຂ່າວໃຫ້ສາມາດສະໜອງຂໍ້ມູນຂ່າວສານໃຫ້ຫຼາກ ຫຼາຍຂຶ້ນ.

ທ່ານ ວັນສີ ກົວມົວ ກ່າວວ່າ: ການຢ້ຽມຢາມຄັ້ງນີ້ເຮັດໃຫ້ຄະນະຜູ້ແທນເຮົາເຂົ້າໃຈຫຼາຍຂຶ້ນກ່ຽວກັບວຽກງານສື່ມວນຊົນ ແລະ ການສື່ສານຂອງອົສຕຣາລີ, ໂດຍສະເພາະແມ່ນການຫັນປ່ຽນຈາກສື່ດັ້ງເດີມໄປສູ່ສື່ດີຈີຕອນ, ລວມທັງເຄື່ອງມືທີ່ໃຊ້ເພື່ອຕິດຕາມການມີສ່ວນຮ່ວມຂອງຜູ້ຊົມ ແລະ ປະສິດທິພາບຂອງຫ້ອງຂ່າວ, ນອກນັ້ນ ທ່ານຍັງຮັບຮູ້ກ່ຽວກັບຮູບແບບການສະໜອງຂ່າວຫຼາຍພາສາຂອງ ສຳນັກຂ່າວ SBS, ໂດຍສະເພາະການສະໜອງເນື້ອໃນຂ່າວລົງຫຼາຍແພັລດຟອມ ແລະ ມີ 63 ພາສາເພື່ອຮັບປະກັນວ່າຜູ້ອ່ານຜູ້ຊົມ ໃນ ອົສຕຣາລີ ສາມາດເຂົ້າເຖິງຂໍ້ມູນຂ່າວສານທີ່ເຊື່ອຖືໄດ້.

(ຂ່າວ-ພາບ: ສະຖານທູດອົສຕຣາລີ ປະຈຳລາວ)