ຄະນະຊາວໜຸ່ມອາສາສະໝັກລະດູແລ້ງສີຂຽວ ນະຄອນໂຮ່ຈິມິນ ຈັດກິດຈະກຳຢູ່ເມືອງຊະນະສົມບູນ

ທ່ານ ຄຳສີ ຫຼິນສະຫວາດ ກ່າວວ່າ: ການຈັດກິດຈະກຳຄັ້ງນີ້, ສະແດງໃຫ້ເຫັນເຖິງມູນເຊື້ອຄວາມສາມັກຄີອັນຍິ່ງໃຫຍ່ ລະຫວ່າງ ສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ ເວົ້າລວມ, ເວົ້າສະເພາະ ກໍຄື ສອງການຈັດຕັ້ງຄະນະຊາວໜຸ່ມ ນະຄອນໂຮ່ຈິມິນ ແລະ ຄະນະຊາວໜຸ່ມ ປປລ ແຂວງຈຳປາສັກ ແລະ ເມືອງຊະນະສົມບູນ ໃນນາມຕາງໜ້າໃຫ້ຄະນະພັກ-ອົງການປົກຄອງເມືອງ ຂໍສະແດງຄວາມຂອບໃຈເປັນຢ່າງສູງມາຍັງຄະນະຊາວໜຸ່ມອາສາສະໝັກລະດູແລ້ງສີຂຽວ ນະຄອນໂຮ່ຈິມິນ ທີ່ໃຫ້ການຊ່ວຍ ເຫຼືອ, ຊຶ່ງການສ້າງກິດຈະກຳຄັ້ງນີ້ບໍ່ພຽງແຕ່ເປັນການຊ່ວຍເຫຼືອທາງດ້ານສຸຂະພາບ ແລະ ຍົກລະດັບຊີວິດການເປັນຢູ່ຂອງປະຊາຊົນເທົ່ານັ້ນ, ແຕ່ຍັງເປັນການຮັດແໜ້ນຄວາມສາມັກຄີຮັກແພງ ອັນເປັນມູນເຊື້ອລະຫວ່າງ ຊາວໜຸ່ມ ແລະ ປະຊາຊົນສອງຊາດ ລາວ-ຫວຽດນາມ ໃຫ້ແໜ້ນແຟ້ນຍິ່ງໆຂຶ້ນໄປ.

ກິດຈະກຳຄັ້ງນີ້, ມີການກວດສຸຂະພາບ ແລະ ຈ່າຍຢາໂດຍບໍ່ເສຍຄ່າໃຫ້ປະຊາຊົນຈຳນວນ 500 ຄົນ, ມອບເຄື່ອງບັນເທົາທຸກໃຫ້ຄອບຄົວປະຊາຊົນທີ່ທຸກຍາກ 100 ຄົນ, ພ້ອມທັງມອບອຸປະກອນການແພດຈຳນວນໜຶ່ງໃຫ້ຫ້ອງການສາທາລະນະສຸກເມືອງ ແລະ ມອບກະເປົາເປ້ 60 ໜ່ວຍ, ປຶ້ມຂຽນ 500 ຫົວໃຫ້ນ້ອງໆນັກຮຽນ ໂຮງຮຽນມັດທະຍົມຕອນຕົ້ນໜອງແຄນ. ພ້ອມທັງຝຶກອົບຮົມການປູກຝັງ-ລ້ຽງສັດໃຫ້ປະຊາຊົນພາຍໃນບ້ານດັ່ງກ່າວຕື່ມອີກ.

ແຫຼ່ງຂ່າວ: ເມືອງຊະນະສົມບູນ