 |
ການແຂ່ງຂັນກິລາບານເຕະຍິງ-ຊາຍຄັ້ງນີ້ ຈັດຂຶ້ນໃນວັນທີ 27 ກຸມພາຜ່ານມາ ທີ່ສະໜາມບານເຕະຫຍ້າທຽມ ເບ ສະຫວັນ ບ້ານຄຳສະຫວາດ ເມືອງໄຊເຊດຖາ ນະຄອນຫຼວງວຽງຈັນ ໂດຍໃຫ້ກຽດເຂົ້າຮ່ວມ ແລະ ມອບລາງວັນໂດຍ ສະຫາຍ ຫຼ້າວັນ ວົງຄຳສານ ຄະນະປະຈຳພັກກະຊວງ ຫົວໜ້າຫ້ອງການກະຊວງ ສສກ, ສະຫາຍ ວິໄລພອນ ພົມມະຫາໄຊ ຄະນະປະຈຳພັກກະຊວງ ຫົວໜ້າກົມອາຊີວະສຶກສາ, ສະຫາຍ ສຸກສະຫວາດ ສີຫາປັນຍາ ຄະນະພັກກະຊວງ ຫົວໜ້າກົມຄຸ້ມຄອງວິທະຍາສາດ ແລະ ສະຫາຍ ວົງເພັດ ອຸດົມລິດ ຄະນະພັກກະຊວງ ຮອງຜູ້ອຳນວຍການສະຖາບັນຄົ້ນຄວ້າວິທະຍາສາດການສຶກສາ ພ້ອມດ້ວຍຕາງໜ້າ 3 ອົງການຈັດຕັ້ງມະຫາຊົນ ຈາກບັນດາພາກສ່ວນຕ່າງໆ ແລະ ພະນັກງານເຂົ້າຮ່ວມ.
ການແຂ່ງຂັນຄັ້ງນີ້, ສະເພາະບານເຕະຊາຍມີ 4 ພາກສ່ວນ ກຳນົດໃຫ້ມີການຈັບສະຫຼາກປະກົບຄູ່ແຂ່ງຂັນ ເພື່ອຄັດເລືອກເອົາທີມຊະນະ ຜ່ານເຂົ້າຮອບຊີງຊະນະເລີດ ແລະ ທີມເສຍ ໄປຊີງອັນດັບ 3 ສ່ວນບານເຕະຍິງ ກຳນົດໃຫ້ບັນດາພາກສ່ວນໂຮມກັນ ໂດຍແບ່ງອອກເປັນ 2 ທີມແຂ່ງຂັນ ສຳລັບກົມຄຸ້ມຄອງວິທະຍາສາດ ຮ່ວມກັບສະຖາບັນຄົ້ນຄວ້າວິທະຍາສາດການສຶກສາ ແລະ ບໍລິສັດ ລັດວິສາຫະກິດ ໂຮງພິມສຶກສາ ສ່ວນກົມອາຊີວະສຶກສາ ຮ່ວມກັບ ຫ້ອງການກະຊວງ ສສກ.
 |
ຜ່ານການແຂ່ງຂັນຜົນປະກົດ: ທີມຊາຍ ແຊັມຕົກເປັນຂອງທີມກົມອາຊີວະສຶກສາ ທີ່ໄລ່ເອົາຊະນະ ສະຖາບັນຄົ້ນຄວ້າວິທະຍາສາດການສຶກສາ ຮ່ວມກັບບໍລິສັດ ລັດວິສາຫະກິດ ໂຮງພິມສຶກສາ ໃນນັດຊີງຊະນະເລີດ 4-3 ປະຕູ ສ່ວນທີມຍິງ ແຊັມເປັນຂອງສະຖາບັນຄົ້ນຄວ້າວິທະຍາສາດການສຶກສາ ແລະ ບໍລິສັດ ລັດວິສາຫະກິດ ໂຮງພິມສຶກສາ ຊະນະຈຸດໂທດ ກົມອາຊີວະສຶກສາ ຮ່ວມກັບ ຫ້ອງການກະຊວງ ສສກ 3-0 ປະຕູ ໃນເກມສະ ເໝີກັນ 1-1 ປະຕູ.
ຂ່າວ: ສົງການ ພັນແພງດີ
ຄໍາເຫັນ