ແຂ່ງຂັນກິລາເປຕັງ ຊີງຂັນທ່ານເຈົ້າຄອງ ຕ້ອນຮັບກອງປະຊຸມໃຫຍ່ຜູ້ແທນແນວລາວສ້າງຊາດ ນວ

ທ່ານ ພົງສະຫວັນ ສີລິພັນ ກ່າວວ່າ: ການເປີດຂະບວນການແຂ່ງຂັນກິລາເປຕັງໃນຄັ້ງນີ້, ເພື່ອຕ້ອນຮັບກອງປະຊຸມໃຫຍ່ຄັ້ງທີ IX ຜູ້ແທນແນວລາວສ້າງຊາດ ນວ ແລະ ສະເຫຼີມສະຫຼອງວັນສ້າງຕັ້ງພັກ ຄົບຮອບ 71 ປີໃຫ້ມີຂະບວນການຟົດຟື້ນ ແລະ ຕໍ່ເນື່ອງ, ທັງເປັນການຕ້ອນຮັບວັນສຳຄັນຕ່າງໆ ຂອງຊາດ-ຂອງພັກ ປະຕິບັດແນວທາງຂອງພັກ ນະໂຍບາຍຂອງລັດວາງອອກ ເພື່ອຍູ້ແຮງໃຫ້ການຈັດຕັ້ງປະຕິບັດຄໍາຂວັນ: ເພີ່ມທະວີຄວາມສາມັກຄີປອງດອງທົ່ວປວງຊົນ ເສີມຂະຫຍາຍຄຸນລັກສະນະ 4 ເສີມສ້າງ ສ້າງຄອບຄົວ ແລະ ບ້ານສາມັກຄີປອງດອງ ຕິດພັນກັບການແຂ່ງຂັນຮັກຊາດ ແລະ ພັດທະນາ ຍົກສູງບົດບາດ ແລະ ຄຸນນະພາບການເຄື່ອນໄຫວ ຂອງແນວລາວສ້າງຊາດ ເພື່ອປະກອບສ່ວນສ້າງ ນວ ໃຫ້ເປັນນະຄອນໜ້າຢູ່ຍືນຍົງ ແລະ ທັນສະໄໝ. ຮຽກຮ້ອງມາຍັງຄະນະຮັບຜິດຊອບການແຂ່ງຂັນ, ຄະນະກໍາມະການ, ນັກກິລາທີ່ເຂົ້າຮ່ວມໃນການແຂ່ງຂັນຄັ້ງນີ້ ຈົ່ງເຊີດຊູສະຕິຄວາມຮັບຜິດຊອບຢ່າງເຄັ່ງຄັດ ປະຕິບັດລະບຽບຢ່າງເປັນທໍາ, ມີນໍ້າໃຈນັກກິລາ, ຮູ້ແພ້-ຮູ້ຊະນະ ແລະ ຮູ້ໃຫ້ອະໄພ ເພາະການແຂ່ງຂັນໃນຄັ້ງນີ້ ເປັນການສ້າງເງື່ອນໄຂໃຫ້ສະມາຊິກ-ພະນັກງານ ທີ່ມີຈິດໃຈມັກຮັກໃນກິລາ ໂດຍສະເພາະກິລາເປຕັງ ທີ່ເປັນປະເພດກິລາທີ່ສັງຄົມນິຍົມຫຼິ້ນ ແລະ ຍັງເປັນການສ້າງເງື່ອນໄຂໃຫ້ສະມາຊິກ-ພະນັກງານ ພາຍໃນຂອງອົງການຈັດຕັ້ງພັກ-ລັດ ໃນ ນວ ໃຫ້ຮັດແໜ້ນຄວາມສາມັກຄີ ທັງເປັນໂອກາດພົບປະແລກປ່ຽນບົດຮຽນຊຶ່ງກັນ ແລະ ກັນ ທັງເປັນການພັດ ທະນາທັກສະການຫຼິ້ນກິລາເປຕັງ ແລະ ການອອກກໍາລັງກາຍເພື່ອສຸຂະພາບ.

ສໍາລັບການແຂ່ງຂັນກິລາເປຕັງຄັ້ງນີ້, ແຂ່ງຂັນໃນປະເພດທີມຊຸດ (ຊາຍ 2 ຍິງ 1) ໂດຍມີທີມມາຈາກພະ ແນກການອ້ອມຂ້າງ ນວ, ແນວລາວສ້າງຊາດ 9 ຕົວເມືອງ ແລະ ພາກທຸລະກິດເຂົ້າຮ່ວມທັງໝົດ 32 ທີມ, ສ່ວນລາງວັນຊະນະເລີດ ໄດ້ຮັບຂັນ 1 ໜ່ວຍ ພ້ອມເງິນລາງວັນ 3 ລ້ານກີບ, ຮອງຊະນະເລີດ ໄດ້ຮັບຂັນ 1 ໜ່ວຍ ພ້ອມເງິນລາງວັນ 2 ລ້ານກີບ, ທີ 3 ໄດ້ຮັບຂັນ 1 ໜ່ວຍ ພ້ອມເງິນລາງວັນ 1.5 ລ້ານກີບ ແລະ ທີ 4 ໄດ້ຮັບເງິນລາງວັນ 1 ລ້ານກີບ.

ຂ່າວ: ວຽງຈັນໃໝ່