ແຂ່ງຂັນກັອບລະດົມທຶນຟື້ນຟູໄພພິບັດຢູ່ແຂວງຊຽງຂວາງ

ການແຂ່ງຂັນຄັ້ງນີ້, ມີນັກກິລາເຂົ້າແຂ່ງຂັນຈາກແຂວງຊຽງຂວາງ, ນະຄອນຫຼວງ, ກະຊວງແລະ ແຂວງຈຳນວນໜຶ່ງ ຊຶ່ງລວມມີ 24 ຂັນລາງວັນ. ທ່ານ ບຸນຈັນ ສີວົງພັນ ກຳມະການສູນກາງພັກ ເລຂາພັກແຂວງ ເຈົ້າແຂວງໆຊຽງຂວາງ ໄດ້ກ່າວເປີດວ່າ: ຜົນເສຍຫາຍຈາກພະຍຸໂດຍສະເພາະແມ່ນພະຍຸວິພາ ແລະ ພະຍຸບົວລອຍ ຕາມການປະເມີນມີຄວາມເສຍຫາຍ 700 ກ່ວາຕື້ກີບ ເສຍຊີວິດ 11 ຄົນ, ບາດເຈັບ 12 ຄົນ ທົ່ວແຂວງໄດ້ຮັບຜົນກະທົບ 241 ບ້ານ, ມີ 4,151 ຄອບຄົວ, ມີ 20,246 ຄົນ ຍິງ 10,300 ຄົນ, ນ້ຳຖ້ວມດິນຖົມເຮືອນ 635 ຫຼັງ, ເສຍຫາຍ 100%, ມີ 127 ຫຼັງຄາເຮືອນ, ລົດໃຫຍ່ 16 ຄັນ, ລົດຈັກ 42 ຄັນ, ເນື້ອທີ່ນາ 2,539 ເຮັກຕາ, ໄຮ່ 851 ເຮັກຕາ,. ສວນ 2,252 ເຮັກຕາ. ນອກນີ້, ຍັງມີວັດ, ໜອງປາ, ເລົ້າເຂົ້າ, ສັດລ້ຽງ, ຕາຄ່າຍໄຟຟ້າ, ເສັ້ນທາງ, ຂົວ, ຊົນລະປະທານ ແລະ ອື່ນໆ ຖືກທຳລາຍເສຍຫາຍຢ່າງໃຫຍ່ຫຼວງ.

ການແຂ່ງຂັນຄັ້ງນີ້, ໃຫ້ກຽດມອບຂັນລາງວັນຊະນະເລີດໂດຍ ທ່ານ ກິແກ້ວ ໄຂຄຳພິທູນ, ທ່ານ ບຸນຈັນ ສີວົງພັນ ມອບຂັນລາງວັນຮອງຊະນະເລີດ ແລະໃບຍ້ອງຍໍ, ທ່ານ ບົວເງິນ ຫຸມໄຊຍະພົມ ຮອງເລຂາພັກແຂວງ ມອບຂັນລາງວັນຮອງຊະນະເລີດ ແລະໃບຊົມເຊີຍໃຫ້ກັບນັກແຂ່ງຂັນຜູ້ທີ່ຊະນະ ແລະ ຜູ້ທີ່ອຸປະຖຳຊ່ວຍເຫຼືອຟື້ນຟູຜົນກະທົບຈາກໄພພິບັດ.

(ຂ່າວ: ບຸນມີ ແສງທຸມມີ)