 |
ກອງປະຊຸມໄດ້ຮັບກຽດເປັນປະທານ ໂດຍສະຫາຍ ນາງ ພອນວັນ ອຸທະວົງ ເລຂາຄະນະບໍລິຫານງານພັກ ຄລທ, ມີບັນດາສະຫາຍຄະນະບໍລິຫານງານພັກ, ຄະນະໜ່ວຍພັກ ພ້ອມດ້ວຍ ສະມາຊິກພັກ - ພະນັກງານ ຫ້ອງການ ຄລທ ເຂົ້າຮ່ວມຢ່າງພ້ອມພຽງ.
ຈຸດປະສົງເພື່ອໃຫ້ສະມາຊິກພັກ, ພະນັກງານ-ລັດຖະກອນ, ຮັບຮູ້ ແລະ ເຂົ້າໃຈຢ່າງເລິກເຊິ່ງເປັນເອກະພາບຕໍ່ເນື້ອໃນຂອງມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ຂອງພັກປະຊາຊົນ ປະຕິວັດລາວ ພ້ອມທັງນຳໄປຜັນຂະຫຍາຍຈັດຕັ້ງປະຕິບັດໃຫ້ໄດ້ຢ່າງຖືກຕ້ອງ ແລະ ມີປະສິດທິຜົນ.
ໃຫ້ກຽດເຜີຍແຜ່ເອກະສານມະຕິກອງປະຊຸມໃຫຍ່ຜູ້ແທນທົ່ວປະເທດ ຄັ້ງທີ XII ແລະ ໂຄງການການເມືອງສະບັບທີ 3 ໂດຍສະຫາຍ ນາງ ພອນວັນ ອຸທະວົງ. ພ້ອມນັ້ນ, ກອງປະຊຸມໄດ້ຮັບຟັງການເຜີຍແຜ່ບົດລາຍງານການເມືອງ ແລະ ແຜນພັດທະນາເສດຖະກິດ-ສັງຄົມແຫ່ງຊາດ ຄັ້ງທີ X ໂດຍ ສະຫາຍ ວັນທະນາ ນໍລິນທາ ຮອງເລຂາຄະນະບໍລິຫານງານພັກ ຄລທ.
ໂອກາດນີ້, ສະຫາຍ ນາງ ພອນວັນ ອຸທະວົງ ໄດ້ໃຫ້ກຽດໂອ້ລົມ ຊຶ່ງເນັ້ນໜັກໃຫ້ສະມາຊິກພັກ-ພະນັກງານແຕ່ລະຂັ້ນສືບຕໍ່ຢຶດໝັ້ນອຸດົມການຂອງພັກ, ເປັນເອກະພາບຕໍ່ແນວທາງນະໂຍບາຍການປ່ຽນແປງໃໝ່ຂອງພັກ ຄຽງຄູ່ກັບການເດັດດ່ຽວແກ້ໄຂການເສື່ອມຖອຍດ້ານແນວຄິດ, ຄຸນທາດການເມືອງ, ຄຸນສົມບັດສິນທໍາປະຕິວັດ ແລະ ເພີ່ມທະວີຄວາມສາມັກຄີເປັນເອກະພາບພາຍໃນໃຫ້ແໜ້ນແຟ້ນຍິ່ງຂຶ້ນ.ພ້ອມທັງຍົກສູງຄວາມຮັບຜິດຊອບໃນການຈັດຕັ້ງປະຕິບັດພາລະບົດບາດ, ໃນການເຄື່ອນໄຫວວຽກງານວິຊາສະເພາະປິ່ນອ້ອມ ໃຫ້ສອດຄ່ອງກັບແຜນການພັດທະນາເສດຖະກິດ-ສັງຄົມ ແຫ່ງຊາດ ຄັ້ງທີ X ແລະ ມະຕິກອງປະຊຸມໃຫຍ່ຂອງພັກປະຊາຊົນ ປະຕິວັດລາວ ຄັ້ງທີ XII ເພື່ອຫັນເຂົ້າສູ່ຄຸນນະພາບ ຕາມທິດຍືນຍົງ ແລະ ສີຂຽວ ສາມາດປະກອບສ່ວນຢ່າງຕັ້ງໜ້າເຂົ້າໃນການພັດທະນາເສດຖະກິດ-ສັງຄົມ. ເອົາໃຈໃສ່ປັບປຸງກົນໄກແບບແຜນວິທີເຮັດວຽກ, ຍົກສູງວຽກງານກໍ່ສ້າງຮາກຖານການເມືອງການຄຸ້ມຄອງ-ບໍລິຫານທ້ອງຖິ່ນ ກໍຄື ຄລທ ແຂວງ ແລະ ນະຄອນຫຼວງ ໃຫ້ເຂັ້ມແຂງ, ຍົກສູງວຽກງານກວດກາພັກ ແລະ ລັດ, ເປັນເຈົ້າການໃນການຊຸກຍູ້ ຕິດຕາມ, ກວດກາການຈັດຕັ້ງປະຕິບັດລະບຽບພັກ, ມະຕິ, ຄໍາສັ່ງຂອງສູນກາງພັກ, ກົດໝາຍ, ພາລະບົດບາດ ແລະ ເຄື່ອນໄຫວວຽກງານວິຊາສະເພາະແຕ່ລະຂົງເຂດວຽກງານ ຮັບປະກັນໃຫ້ມີຄວາມໂປ່ງໃສ່, ລຶບລ້າງທຸກພຶດຕິກໍາ ທີ່ເປັນການສໍ້ລາດບັງຫຼວງດ້ວຍການສະກັດກັ້ນ ແລະ ມີການກວດກາວຽກງານຕ້ານການສໍ້ລາດລັງຫຼວງຢ່າງເປັນປົກກະຕິ.
(ຂ່າວ: ແສງຈັນ)
ຄໍາເຫັນ