ການມອບອຸປະກອນການຮຽນ-ການສອນໃນຄັ້ງນີ້ ເປັນການສະແດງເຖິງຄວາມເອົາໃຈໃສ່ຂອງຄະນະນໍາຂັ້ນແຂວງ ຕໍ່ການພັດທະນາຂະແໜງການສຶກສາ ແນໃສ່ປັບປຸງສະພາບແວດລ້ອມການຮຽນ-ການສອນ ໃຫ້ນັກຮຽນ ແລະ ຄູ-ອາຈານມີຄວາມສະດວກຍິ່ງຂຶ້ນ.
ໃນວັນດຽວກັນ ຄະນະນໍາແຂວງຍັງໄດ້ລົງຕິດຕາມການແກ້ໄຂບັນຫານໍ້າຖ້ວມ ແລະ ກວດກາການລະບາຍນໍ້າ ຢູ່ປະຕູລະບາຍນໍ້າຫ້ວຍປາກຊີມັງ ເມືອງທ່າແຂກ. ເນື່ອງຈາກໃນຊ່ວງຕົ້ນເດືອນກໍລະກົດ ໄດ້ມີຝົນຕົກຕໍ່ເນື່ອງຫຼາຍວັນ ເຮັດໃຫ້ລະດັບນໍ້າໃນຫ້ວຍຕ່າງໆ ເພີ່ມສູງຂຶ້ນ ແລະ ໄຫຼເຂົ້າຖ້ວມເນື້ອທີ່ນາປີ, ໜອງປາ ແລະ ສວນກະສິກໍາ ພ້ອມທັງເຮືອນຊານຂອງປະຊາຊົນໃນຫຼາຍຈຸດ. ຄະນະນໍາໄດ້ຕິດຕາມການຂຸດເຈາະທາງລະບາຍນໍ້າຂ້າງປະຕູລະບາຍນໍ້າຫ້ວຍປາກຊີມັງ ເພື່ອລະບາຍນໍ້າຈາກຫ້ວຍລົງສູ່ແມ່ນໍ້າຂອງ. ວຽກງານດັ່ງກ່າວ ແມ່ນດໍາເນີນໂດຍ ບໍລິສັດ ແສງມີໄຊ ຄົບວົງຈອນ ຈໍາກັດຜູ້ດຽວ ເພື່ອແກ້ໄຂບັນຫາປະຕູລະບາຍນໍ້າບໍ່ສາມາດເປີດໄດ້ ເນື່ອງຈາກແຮງດັນຂອງມວນນໍ້າມີປະລິມານສູງ.
ຫຼັງຈາກມີການດໍາເນີນມາດຕະການລະບາຍນໍ້າ ສະພາບນໍ້າໃນເຂດດັ່ງກ່າວໄດ້ຫຼຸດລົງຢ່າງຕໍ່ເນື່ອງ ແລະ ໃນປະຈຸບັນນໍ້າໄດ້ຫຼຸດແຫ້ງລົງເກືອບເຂົ້າສູ່ພາວະປົກກະຕິ ສ່ວນມູນຄ່າຜົນເສຍຫາຍຍັງຢູ່ໃນໄລຍະສໍາຫຼວດ ແລະ ປະເມີນຜົນ. ທັງນີ້ດ້ວຍຄວາມຫວງໄຍ ແລະ ຄວາມຮັບຜິດຊອບຂອງການນໍາແຂວງຄໍາມ່ວນ ທີ່ມີຕໍ່ການເປັນຢູ່ ແລະ ຄວາມປອດໄພປະຊາຊົນ.
ຂ່າວ : ມະນີວັນ
ຄໍາເຫັນ