 |
ພິທີເຊັນບົດບັນທຶກຄວາມເຂົ້າໃຈ ລະຫວ່າງ ກະຊວງສຶກສາທິການ ແລະ ກິລາ (ສສກ) ຕາງໜ້າໂດຍ ພະແນກສຶກສາທິການ ແລະ ກີລາ ແຂວງວຽງຈັນ ແລະ ອົງການ Action Education ກ່ຽວກັບໂຄງການ ໂຮງຮຽນທັນສະໄໝສໍາລັບເລີ່ມຕົ້ນການຮຽນຮູ້ຂັ້ນພື້ນຖານໄດ້ມີຂຶ້ນບໍ່ດົນມານີ້ ທີ່ເມືອງວັງວຽງ ແຂວງວຽງຈັນ ໂດຍຕາງໜ້າລົງນາມຂອງທ່ານ ຄໍາ ຂັນທະວີວອນ ຫົວໜ້າພະແນກສຶກສາທິການ ແລະ ກິລາແຂວງ ແລະ ທ່ານ ແສງທອງ ໂພທິສານ ຫົວໜ້າອົງການ Action Education ປະຈຳ ສປປ ລາວ ມີທ່ານ ສົມປະສົງ ສຸວົງຄໍາຈັນ ຮອງປະທານຄະນະກໍາມະການປົກຄອງແຂວງວຽງຈັນ ພ້ອມດ້ວຍຜູ້ຕາງໜ້າຈາກບັນດາກະຊວງ ກົມ ພະແນກ ການ ພາກສ່ວນກ່ຽວຂ້ອງ ເຂົ້າຮ່ວມ.
ໂຄງການນີ້,ຈັດຕັ້ງຂຶ້ນເພື່ອປັບປຸງຜົນການຮຽນຮູ້ພື້ນຖານຂອງນັກຮຽນ ຜ່ານການໃຊ້ອຸປະກອນດິຈິຕອນ ສໍາລັບນັກຮຽນຊັ້ນປະຖົມ ປີທີ 1-3 ແນໃສ່ປັບປຸງຜົນການຮຽນຂອງນັກຮຽນຊັ້ນປະຖົມຕອນຕົ້ນ ໂດຍການນໍເອົາເຄື່ອງມືດິຈິຕອນມາໝູນໃຊ້ ແລະ ສ້າງຂີດຄວາມສາມາດໃຫ້ແກ່ຄູອາຈານ ສົ່ງເສີມການບໍລິຫານໂຮງຮຽນແບບທັນສະໄໝ ແລະ ການພັດທະນາໂຮງຮຽນຢ່າງມີປະສິດທິຜົນ ໂດຍການນໍາໃຊ້ລະບົບດິຈິຕອນໃນການຕິດຕາມຄວາມກ້າວໜ້າຂອງນັກຮຽນ ການຈັດການຊັບພະຍາກອນ ແລະ ການສະໜັບສະໜູນການຕັດສິນໃຈທີ່ອີງໃສ່ຂໍ້ມູນໃນລະດັບໂຮງຮຽນ ສົ່ງເສີມການມີສ່ວນຮ່ວມ ແລະ ການສະໜັບສະໜູນຂອງຊຸມຊົນ ໂດຍການໃຫ້ພໍ່ແມ່ ແລະ ຜູ້ມີສ່ວນກ່ຽວຂ້ອງໃນທ້ອງຖິ່ນເຂົ້າໃຈ ແລະ ໃຊ້ເຄື່ອງມືດິຈິຕອນ ເພື່ອໃຫ້ພວກເຂົາສາມາດສົ່ງເສີມການຮຽນຮູ້ຂອງເດັກນ້ອຍຢູ່ເຮືອນ ແລະ ປະກອບສ່ວນເຮັດໃຫ້ໂຄງການມີຄວາມຍືນຍົງ. ຄາດຄະເນຜົນໄດ້ຮັບຫຼັງສິ້ນສູດໂຄງການແມ່ນ 30% ຂອງຄ່າສະເລ່ຍຜົນການສອບເສັງທ້າຍປີເພີ່ມຂຶ້ນ ດ້ານການອ່ານ, ການຂຽນ ແລະ ຄະນິດສາດພື້ນຖານ ສໍາລັບນັກຮຽນຊັ້ນປີທີ 1-3 ໃນໂຮງຮຽນເປົ້າໝາຍ ທຽບກັບຂໍ້ມູນພື້ນຖານ.
ພື້ນທີ່ເປົ້າໝາຍຂອງໂຄງການ ມີ 8 ໂຮງຮຽນ ໃນ 4 ເມືອງ ແຂວງວຽງຈັນ ໃນນີ້ ເມືອງໂພນໂຮງ ມີໂຮງຮຽນປະຖົມ ໂພນສະຫວາດ ແລະ ໜອງນາກ ,ເມືອງທຸລະຄົມ ມີໂຮງຮຽນປະຖົມ ສີບຸນເຮືອງ ແລະ ສຸກສາລາ, ເມືອງຫີນເຫີບ ມີໂຮງຮຽນປະຖົມ ຄອນແກ້ວ ແລະ ນາຫວາຍ ແລະ ເມືອງວັງວຽງ ມີໂຮງຮຽນປະຖົມ ຜາເທົາ ແລະ ໂພນຄໍາ ກິດຈະກຳຫຼັກ ແມ່ນການນຳເຕັກໂນໂລຊີດິຈິຕອນເຂົ້າໃນຫ້ອງຮຽນ ແລະ ພັດທະນາຄວາມສາມາດດ້ານດິຈິຕອນສໍາລັບຄູ ແລະ ຜູ້ບໍລິຫານໂຮງຮຽນ ການບໍລິຫານໂຮງຮຽນທັນສະ ໄໝ ແລະ ການພັດທະນາໂຮງຮຽນ ການມີສ່ວນຮ່ວມຂອງຊຸມຊົນ ໂຄງການຈະຖືກຈັດຕັ້ງປະຕິບັດເລີ່ມແຕ່ວັນທີໄດ້ຮັບອະນຸມັດເປັນຕົ້ນໄປ ເຖິງວັນທີ 31 ສິງຫາ 2029 ໂດຍໄດ້ຮັບທຶນສະໜັບສະໜູນຈາກ ອົງການ Action Education ທັງໝົດ 228,000 ເອີໂຣ.ຂ່າວ: ສສກ
ຄໍາເຫັນ