 |
ທ່ານ ໄພວັນ ປະຖັມມະວົງ ຫົວໜ້າພະແນກອຸດສາຫະກຳ ແລະ ການຄ້າແຂວງວຽງຈັນ ໄດ້ກ່າວວ່າ: ໂດຍປະຕິບັດຕາມ ແຈ້ງການຂອງ ກະຊວງອຸດສາຫະກຳ ແລະ ການຄ້າ ສະບັບເລກທີ1287/ກຄພນ ລົງວັນ 10 ກໍລະກົດ 2026 ກ່ຽວກັບເພີ່ມທະວີ ເອົາໃຈໃສ່ຊຸກຍູ້ ໃຫ້ພະແນກອຸດສາຫະກຳ ແລະ ການຄ້າບັນດາແຂວງ ຈັດກິດຈະກໍາຈໍາໜ່າຍສິນຄ້າ ອຸປະກອນການສຶກສາ ໃນລາຄານະໂຍບາຍ ພາຍໃຕ້ຊື່ “ ໂຄງການລາຄາອຸ່ນໃຈ” ໂດຍສະເພາະ ເພື່ອເປັນການຮອງຮັບໃຫ້ແກ່ການກະກຽມເປີດສົກຮຽນໃໝ່ ທີ່ຈະມາເຖິງນີ້ ໂດຍມອບໃຫ້ພະແນກ ອຸດສາຫະກຳ ແລະ ການຄ້າແຕ່ລະແຂວງເປັນເຈົ້າການນຳພາຈັດຕັ້ງປະຕິບັດ.
 |
ສຳລັບແຂວງວຽງຈັນ ແມ່ນໄດ້ປະສານກັບພາກສ່ວນກ່ຽວຂ້ອງ ແລະ ເອກະພາບກຳນົດເປີດທຳອິດຢູ່ 2 ຈຸດຄື: ຮ້ານບົວຮອງ ຊຸບເປີມາເກັດ ແລະ ຮ້ານໂນນສະຫວ່າງການພິມ ແລະ ປ້າຍ, ເພື່ອເປັນສະຖານທີ່ ຈຳໜ່າຍສິນຄ້າປະເພດ ອຸປະກອນການສຶກສາ ໃນລາຄານະໂຍບາຍ ພາຍໃຕ້ກິດຈະກຳ: ກັບຄືນສູ່ໂຮງຮຽນ ຫຼື Back to School, ເພື່ອແບ່ງເບົາພາລະຂອງປະຊາຊົນ ກໍຄືພໍ່ແມ່ຜູ້ປົກຄອງນັກຮຽນ ທີ່ມີລາຍຮັບຕໍ່າ. ເປົ້າໝາຍສິນຄ້າທີ່ນໍາມາຈໍາໜ່າຍ ມີ: ປື້ມແບບຮຽນ, ປຶ້ມຂຽນ, ບິກ, ສໍດຳ, ຢາງລຶບ, ໄມ້ບັນທັດ, ເຄື່ອງແບບນັກຮຽນ ແລະ ສິນຄ້າອື່ນໆ ທີ່ກ່ຽວຂ້ອງ ໂດຍໄດ້ເປີດບໍລິການລູກຄ້າທຸກທ່ານ ເລີ່ມວັນທີ 10-14 ສິງຫາ 2026 ນີ້ ແລະ ຈະມີການເປີດຢູ່ເມືອງອື່ນໆທົ່ວແຂວງອີກ.
ທ່ານຫົວໜ້າພະແນກອຸດສາຫະກຳ ແລະ ການຄ້າແຂວງ ຍັງໄດ້ເຊີນຊວນປະຊາຊົນເຂົ້າມາໃຊ້ບໍລິການຊື້ສິນຄ້າ ປະເພດອຸປະກອນການສຶກສາ ຢູ່ຮ້ານຄ້າທີ່ແຂວງໄດ້ກຳນົດໄວ້ ເພື່ອໃຫ້ໄດ້ສິນຄ້າທີ່ມີຄຸນນະພາບດີ ແລະ ລາຄານະໂຍບາຍ.
ຄໍາເຫັນ