ທັງເປັນພື້ນຖານທາງດ້ານວິຊາການໃຫ້ແກ່ການປັບປຸງເນື້ອໃນຂອງຮ່າງກົດໝາຍດັ່ງກ່າວ ທີ່ຈະນຳເຂົ້າພິຈາລະນາຮັບຮອງໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດ (ສພຊ) ຊຸດທີ IX ໄດ້ມີການຄົ້ນຄວ້າເນື້ອໃນຢ່າງລະອຽດເລິກເຊິ່ງ ໂດຍມີການແລກປ່ຽນບົດຮຽນກັບຊ່ຽວຊານຕ່າງປະເທດ ເພື່ອເຮັດໃຫ້ເນື້ອໃນຂອງຮ່າງກົດໝາຍມີຄວາມຄົບຖ້ວນ, ຮັດກຸມ ແລະ ສາມາດຈັດຕັ້ງປະຕິບັດໄດ້ຢ່າງຍາວນານ; ລະຫວ່າງວັນທີ 5-6 ພະຈິກນີ້ ທີ່ເມືອງແກ້ວອຸດົມ ແຂວງວຽງຈັນ ໄດ້ມີກອງປະຊຸມສຳມະນາຄົ້ນຄວ້າເນື້ອໃນຂອງຮ່າງກົດໝາຍວ່າດ້ວຍການດໍາເນີນຄະດີແພ່ງ(ສະບັບປັບປຸງ)ໂດຍການເປັນປະທານຂອງທ່ານ ຄໍາແພງ ວິລະພັນ ປະທານກໍາມາທິການກົດໝາຍ;ເຂົ້າຮ່ວມມີບັນດາທ່ານຮອງປະທານກໍາມາທິການ ສພຊ,ຮອງຫົວໜ້າອົງການໄອຍະການປະຊາຊົນສູງສຸດ, ຮອງປະທານສານທະຫານຂັ້ນສູງ,ທ່ານ ເບີກິດ ກຣຸນມັນ ອະດີດລັດຖະມົນຕີກະຊວງຍຸຕິທໍາຂອງລັດຖະບານກາງເຢຍລະມັນ,ຊ່ຽວຊານຕ່າງປະເທດຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນຂັ້ນແຂວງຫຼື ສະເຕັບສ (STEPs)ພ້ອມດ້ວຍຄະນະກົມ, ຄະນະພະແນກແລະພະນັກງານຈາກພາກສ່ວນທີ່ກ່ຽວຂ້ອງ.
ທ່ານ ຄໍາແພງ ວິລະພັນ ໃຫ້ຮູ້ວ່າ: ກົດໝາຍສະບັບນີ້ ແມ່ນໜຶ່ງໃນກົດໝາຍຈໍານວນ 9 ສະບັບ ທີ່ຈະນໍາເຂົ້າພິຈາລະນາຮັບຮອງເອົາໃນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ແລະ ການຈັດກອງປະຊຸມໃນຄັ້ງນີ້ແມ່ນການທົບທວນຄືນການຈັດຕັ້ງປະຕິບັດກົດໝາຍວ່າດ້ວຍການດໍາເນີນຄະດີແພ່ງຂອງ ສປປລາວ ທຽບໃສ່ການຈັດຕັ້ງປະຕິບັດຕົວຈິງຂອງບົດຮຽນປະເທດເຢຍລະມັນ ແນໃສ່ເຮັດໃຫ້ເນື້ອໃນຂອງຮ່າງກົດໝາຍສະບັບປັບປຸງນີ້ ມີຄວາມຈະແຈ້ງ, ຮັດກຸມ ແລະ ສອດຄ່ອງກັບສະພາບການຂະຫຍາຍຕົວທາງດ້ານເສດຖະກິດ-ສັງຄົມ.ກອງປະຊຸມຈະໄດ້ຮັບຟັງການສະເໜີບົດຮຽນກ່ຽວກັບການດຳເນີນຄະດີແພ່ງຂອງປະເທດເຢຍລະມັນ ທັງເປັນການຍົກສູງຄວາມຮັບຮູ້ ແລະ ເຂົ້າໃຈຂອງຄະນະຮັບຜິດຊອບປັບປຸງຮ່າງກົດໝາຍວ່າດ້ວຍການດໍາເນີນຄະດີແພ່ງຂອງ ສປປລາວ ແລະ ພາກສ່ວນທີ່ກ່ຽວຂ້ອງຕໍ່ເນື້ອໃນຂອງກົດໝາຍໃຫ້ຫຼາຍຂຶ້ນ; ສຳລັບຮ່າງກົດໝາຍວ່າດ້ວຍການດຳເນີນຄະດີແພ່ງ ແມ່ນໄດ້ຜ່ານການກວດກາເນື້ອໃນຮອບດ້ານຂອງຮ່າງກົດໝາຍສຳເລັດແລ້ວ ຊຶ່ງຢູ່ໃນຂັ້ນຕອນການກະກຽມລາຍງານຕໍ່ກອງປະຊຸມຄະນະປະຈໍາສະພາແຫ່ງຊາດ.
ຜູ້ເຂົ້າຮ່ວມໄດ້ຮັບຟັງການສະເໜີຫຍໍ້ບົດຮຽນກ່ຽວກັບກົດໝາຍວ່າດ້ວຍການປົກຄອງຂອຕ່າງປະເທດ ແລະ ບົດຮຽນກ່ຽວກັບການດຳເນີນຄະດີແພ່ງຂອງຕ່າງປະເທດ ຈາກຊ່ຽວຊານຕ່າງປະເທດ,ເນື້ອໃນຂອງຮ່າງກົດໝາຍວ່າດ້ວຍການດໍາເນີນຄະດີແພ່ງ ຂອງ ສປປລາວ ພ້ອມທັງສະເໜີປະເດັນທີ່ຢາກແລກປ່ຽນກັບຊ່ຽວຊານຕ່າງປະເທດ ຈາກທ່ານ ບຸນຂວາງ ທະວີສັກ ຮອງປະທານສານປະຊາຊົນສູງສຸດ; ຈາກນັ້ນ, ກໍໄດ້ຄົ້ນຄວ້າ, ປະກອບຄໍາເຫັນ ແລະ ຊັກຖາມຕໍ່ເນື້ອໃນຂອງກົດໝາຍສະບັບດັ່ງກ່າວ ທີ່ຕິດພັນກັບພາລະບົດບາດ, ສິດ ແລະ ໜ້າທີ່ຂອງຂະແໜງການຕົນ ແນໃສ່ເຮັດໃຫ້ເນື້ອໃນມີຄວາມກະຈ່າງແຈ້ງ, ຮັດກຸມ ແລະ ແທດເໝາະກັບສະພາບຄວາມເປັນຈິງໃນປັດຈຸບັນ.
ກອງປະຊຸມຄັ້ງນີ້ ໄດ້ຮັບການສະໜັບສະໜູນຊ່ວຍເຫຼືອທາງດ້ານງົບປະມານຈາກSTEPsໂດຍຜ່ານກອງເລຂາຄຸ້ມຄອງແຫຼ່ງທຶນຊ່ວຍເຫຼືອໃຫ້ແກ່ສະພາແຫ່ງຊາດ.
(ຂ່າວ-ພາບ: ນາງ ອານິຕາ ມ່ວນສະຫວັດ ສພຊ)
ຄໍາເຫັນ