ອົງຄະນະພັກແຂວງໄຊສົມບູນ ກໍໄດ້ຖືເອົາວຽກງານການເມືອງ-ແນວຄິດເປັກກົກ ແລະ ໄດ້ສອດຫ້ອຍເຂົ້າໄປໃນທຸກຂົງເຂດວຽກງານ ແລະ ມອບໃຫ້ຄະນະໂຄສະນາອົບຮົມແຂວງ ເຮັດໜ້າທີ່ເປັນເສນາທິການໃຫ້ແກ່ຄະນະປະຈໍາພັກແຂວງ, ຄະນະໂຄສະນາອົບຮົມສູນການພັກຊຶ່ງໃນໄລຍະ6ເດືອນຕົ້ນປີຜ່ານມາ, ຄະນະພັກ, ຄະນະໂຄສະນາອົບຮົມແຂວງ ແລະ ເມືອງ ກໍໄດ້ເປັນເຈົ້າການເຄື່ອນໄຫວວຽກງານຂອງຕົນຕາມພາລະບົດບາດ, ສິດ, ໜ້າທີ່ຢ່າງເຕັມສ່ວນ ແລະ ສາມາດຍາດໄດ້ຜົນງານອັນພົ່ນເດັ່ນຫຼາຍດ້ານ.
ໃນໄລຍະຜ່ານມາໄດ້ຖືເອົາການໂຄສະນາສຶກສາອົບຮົມການເມືີອງ-ແນວຄິດໃຫ້ແກ່ບັນດາສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ໂດຍສະເພາະແມ່ນໄດ້ນຳເອົາ ລັດທິມາກ-ເລນິນ, ແນວຄິດ ໄກສອນ ພົມວິຫານ, ແນວທາງນະໂຍບາຍຂອງພັກ,ລະບຽບກົດໝາຍຂອງລັດ, ມະຕິ, ຄຳສັ່ງຕ່າງໆ ຂອງຂັ້ນເທິງ ມາຄົ້ນຄວ້າເຊື່ອມຊຶມ ໃຫ້ແກ່ບັນດາສະມາຊິກພັກ-ພະນັກງານ, ປະຊາຊົນ ທຸກຊັ້ນຄົນໃນທົ່ວແຂວງໄຊສົມບູນ ໃຫ້ມີຄວາມຮັບຮູ້-ເຂົ້າໃຈຢ່າງເລິກເຊິ່ງ, ໄດ້ເອົາໃຈໃສ່ເປັນເຈົ້າການໃນວຽກງານເສນາທິການ, ໃຫ້ເເກ່ຄະນະພັກ, ຄະນະໂຄສະນາອົບຮົມແຂວງ ໂດຍສະເພາະແມ່ນວຽກງານຄຸ້ມຄອງສະມາຊິກພັກ, ພະນັກງານ-ລັດຖະກອນໃຫ້ເຂົ້າສູ່ລະບົບ, ລະບຽບວິໄນຂອງພະນັກງານ, ພ້ອມນັ້ນຍັງໄດ້ເພີ່ມທະວີຄວາມເປັນເຈົ້າການ ໃນການປະສານສົມທົບກັບຄະນະພັກ ແຕ່ລະຂັ້ນ ປຶກສາຫາລື ກ່ຽວກັບການປັບປຸງການຈັດຕັ້ງ, ຕິດຕາມການຈັດຕັ້ງປະຕິບັດພາລະບົດບາດ, ສິດ ແລະ ໜ້າທີ່ການເຄື່ອນໄຫວ ຂອງຄະນະໂຄສະນາອົບຮົມແຂວງ ແລະ ເມືອງໃຫ້ເປັນເອກະພາບ.
ຄະນະພັກ, ຄະນະນໍາ ໄດ້ຖືສໍາຄັນ ໃນການກໍ່ສ້າງບຸກຄະລາກອນ, ສະມາຊິກພັກ-ພະນັກງານ, ໃຫ້ມີຄວາມໜັກແໜ້ນທາງດ້ານການເມືອງ, ໂປ່ງໃສ ທາງດ້ານຄຸນສົມບັດ, ສິນທໍາປະຕິວັດ, ເພື່ອກໍ່ສ້າງລະບົບການເມືອງຂອງຂະແໜງການຕົນ ໃຫ້ມີຄວາມໜັກແໜ້ນ, ເຂັ້ມແຂງ, ການຈັດຕັ້ງພັກໄດ້ກາຍເປັນແກນນໍາ, ໃນການນໍາພາຈັດຕັ້ງປະຕິບັດໜ້າທີ່ການເມືອງທົ່ວສັງຄົມ ຢ່າງມີປະສິດທິຜົນສູງຂຶ້ນໄປເລື້ອຍໆ,ໄດ້ເອົາບັນດາມະຕິ, ນິຕິກໍາຕ່າງໆຂອງພັກ-ລັດ, ລົງເຜີຍແຜ່ເຊື່ອມຊຶມໃຫ້ສະມາຊິກພັກ, ພະນັກງານ-ລັດຖະກອນ, ທະຫານ, ຕໍາຫຼວດ,ອໍານາດການປົກຄອງບ້ານ, ອົງການຈັດຕັ້ງມະຫານຊົນແຕ່ລະຂັ້ນ, ປະຊາຊົນບັນດາເຜົ່າໃນທົ່ວແຂວງໄດ້ຮັບຮູ້-ເຂົ້າໃຈແລະມີຄວາມເຊື່ອໝັ້ນ ຕໍ່ແນວທາງນະໂຍບາຍຂອງພັກປະກອບສ່ວນຢ່າງຕັ້ງໜ້າໃນການສ້າງສາພັດທະນາປະເທດຊາດເວົ້າລວມ, ເວົ້າສະເພາະແມ່ນພັດທະນາແຂວງໄຊສົມບູນ.
ໃນຂະດຽວກັນ,ວຽກງານອົບຮົມໄດ້ເອົາໃຈໃສ່ປັບປຸງເອກະສານສຶກສາອົບຮົມນໍາພາແນວຄິດໃຫ້ພະນັກງານຫຼັກແຫຼ່ງ, ພະນັກງານທົ່ວໄປ ແລະ ປະຊາຊົນບັນດາເຜົ່າຕິດພັນກັບການຜັນຂະຫຍາຍມະຕິກອງປະຊຸມກາງສະໄໝຂອງຄະນະບໍລິຫານງານພັກແຂວງໄຊສົມບູນ ໃຫ້ມີຜົນສໍາເລັດ, ໄດ້ສຸມໃສ່ວຽກງານສຶກສາອົບຮົມການເມືອງ-ນໍາພາແນວຄິດ ໃຫ້ແກ່ບັນດາສະມາຊິກພັກ, ພະນັກງານ-ລັດຖະກອນ ແລະ ປະຊາຊົນບັນດາເຜົ່າ ທົ່ວແຂວງໄຊສົມບູນ ໂດຍນໍາເອົາແນວທາງ, ແຜນນະໂຍບາຍ, ມະຕິ, ຄໍາສັ່ງ ຂອງກົມການເມືອງສູນກາງພັກ, ຄະນະເລຂາທິການສູນກາງພັກ, ກົດໝາຍຂອງລັດ, ລັດຖະດໍາລັດຂອງປະທານປະເທດ, ດໍາລັດຂອງລັດຖະບານ ແລະ ນິຕິກໍາອື່ນໆ ລວມທັງມູນເຊື້ອອັນພິລະອາດຫານ ຂອງພັກ-ລັດ, ມາຈັດຕັ້ງເຊື່ອມຊຶມໃຫ້ບັນດາສະຫາຍໃນຄະນະພັກ, ສະມາຊິກພັກ, ພະນັກງານ ໄດ້ມີຄວາມຮັບຮູ້ເຂົ້າໃຈ, ມີແນວຄິດ ເປັນເອກະພາບກັບແນວທາງນະໂຍບາຍຂອງພັກ, ເຊື່ອໝັ້ນຕໍ່ການນໍາພາຂອງພັກ.
ເພື່ອເປັນການຍົກສູງວຽກງານໂຄສະນາອົບຮົມແຂວງໄຊສົມບູນ ໃຫ້ດີຂຶ້ນກ່ວາເກົ່າ, ຄະນະໂຄສະນາອົບຮົມແຂວງໄຊສົມບູນຈະສືບຕໍ່ແກ້ໄຂ ແລະ ປັບປຸງດ້ານພາລະບົດບາດຂອງຄະນະໂຄສະນາອົບຮົມແຂວງ, ເມືອງ,ໃຫ້ຈະແຈ້ງ ແລະ ຮັດກຸມ ເຮັດໃຫ້ສາຍໃຍການຈັດຕັ້ງ ຂອງຄະນະໂຄສະນາອົບຮົມແຂວງ, ເມືອງ, ໃຫ້ມີຄວາມກະທັດຮັດ;ເພີ່ມທະວີວຽກງານສຶກສາອົບຮົມການເມືອງ-ແນວຄິດ ໃຫ້ສະມາຊິກພັກ, ພະນັກງານ ຜູ້ທີ່ເຮັດວຽກງານໂຄສະນາອົບຮົມ ໃຫ້ມີຄວາມເຂົ້າໃຈຢ່າງເລິກເຊິ່ງ ຕໍ່ກັບແນວທາງຂອງພັກ, ກົດໝາຍຂອງລັດວາງອອກໃນແຕ່ລະໄລຍະ, ຖືເອົາຄຸນທາດການເມືອງ, ຄຸນສົມບັດສິນທໍາປະຕິວັດ ຂອງສະມາຊິກພັກ, ພະນັກງານເປັນບັນຫາໃຈກາງ, ມີຄວາມຮັບຮູ້ ແລະ ເຂົ້າໃຈແຈ້ງຕໍ່ພາລະບົດບາດ, ສິດ ແລະ ໜ້າທີຂອງຕົນ, ປະກອບສ່ວນທາງດ້ານສະຕິປັນຍາ ເຂົ້າໃນວຽກງານດັ່ງກ່າວຢ່າງຈິງຈັງເຮັດໃຫ້ວຽກງານໂຄສະນາໄດ້ມີການຫັນປ່ຽນຢ່າງຕັ້ງໜ້າ.
ຄໍາເຫັນ