ໂຄສະນາອົບຮົມນະຄອນຫຼວງວຽງຈັນ ເຊື່ອມຊຶມມະຕິກອງປະຊຸມຄະນະບໍລິຫານງານ ສູນກາງພັກ ຄັ້ງທີ7ສະໄໝທີ XI

ຄະນະໂຄສະນາອົບຮົມນະຄອນຫຼວງວຽງຈັນ ໄດ້ຈັດກອງປະຊຸມເຜີຍແຜ່ເຊື່ອມຊຶມມະຕິກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ7ສະໄໝທີ XI, ຫວນຄືນມູນເຊື້ອ ວັນຊາດທີ 2 ທັນວາ ຄົບຮອບ 48ປີແລະວັນເກີດປະທານໄກສອນ ພົມວິຫານ ຄົບຮອບ 103ປີ ໃນວັນທີ  1 ທັນວາ ນີ້ ທີ່ຫ້ອງປະຊຸມອົງການປົກຄອງນະຄອນຫຼວງວຽງຈັນ, ໂດຍການເປັນປະທານຂອງທ່ານ ອານຸພາບ ຕຸນາລົມ ເລຂາຄະນະພັກ ປະທານສະພາປະຊາຊົນນະຄອນຫຼວງວຽງຈັນ.  ເຂົ້າຮ່ວມຮັບຟັງ ມີບັນດາຄະນະປະຈໍາພັກ, ຄະນະພັກນະຄອນຫຼວງວຽງຈັນ, ເລຂາພັກເມືອງ-ເຈົ້າເມືອງ,ຄະນະປະຈໍາພັກເມືອງ, ຄະນະພັກຮາກຖານ, ໜ່ວຍພັກຮາກຖານຫົວໜ້າພະແນກ-ຮອງຫົວໜ້າພະແນກ ພ້ອມດ້ວຍພະນັກງານຫຼັກແຫຼ່ງເຂົ້າຮ່ວມຢ່າງພ້ອມພຽງ.
ໃນກອງປະຊຸມ, ທ່ານ ອານຸພາບ ຕຸນາລົມ ໄດ້ໃຫ້ກຽດເຜີຍແຜ່ ມະຕິກອງປະຊຸມຄົບຄະນະ ບໍລິຫານງານສູນກາງພັກ ຄັ້ງທີ 7 ສະໄໝທີ XIກອງປະຊຸມຄົບຄະນະ ຄັ້ງທີ 7 ຂອງຄະນະບໍລິຫານງານສູນກາງພັກ ສະໄໝທີ XI ວ່າ:ໃນລະຫວ່າງວັນທີ 23-26 ຕຸລາ 2023 ທີ່ຫ້ອງວ່າການສູນກາງພັກ ພາຍໃຕ້ການເປັນປະທານຂອງ ສະຫາຍ ທອງລຸນ ສີສຸລິດເລຂາທິການໃຫຍ່ ຄະນະບໍລິຫານງານສູນກາງພັກ ປະຊາຊົນປະຕິວັດລາວປະທານປະເທດ ແຫ່ງ ສປປ ລາວ,
ກອງປະຊຸມໄດ້ດໍາເນີນບົນຈິດໃຈຍົກສູງຄວາມຮັບຜິດຊອບການເມືອງ, ກອງປະຊຸມ, ຕີລາຄາການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ແຜນເງິນຕາປະຈຳປີ 2023 ແລະ ທິດທາງແຜນການ ປະຈຳປີ 2024 ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ ແລະ ວາລະແຫ່ງຊາດ ວ່າດ້ວຍການແກ້ໄຂຢາເສບຕິດ, ໄດ້ເປັນເອກະພາບສູງຕີລາຄາວ່າ: ດ້ວຍຄວາມບຸກບືນສູ້ຊົນຂອງທົ່ວພັກ, ທົ່ວລັດ ແລະ ທົ່ວປວງຊົນລາວທັງຊາດ, ການຈັດຕັ້ງປະຕິບັດບັນດາແຜນໄດ້ດໍາເນີນໄປຢ່າງຕໍ່ເນື່ອງ, ຄາດຄະເນໝົດປີ 2023 GDP ຈະຂະຫຍາຍຕົວໃນລະດັບ 4,2%, ອັດຕາເງິນເຟີ້ຍັງສູງ ແຕ່ກໍມີທ່າອຽງຫຼຸດລົງ ຈາກ 41,26% ໃນເດືອນກຸມພາ ຫຼຸດລົງມາຢູ່ທີ່ 25,69% ໃນເດືອນກັນຍາ 2023, ການຊຳລະໜີ້ສິນຕ່າງປະເທດ ປະຕິບັດໄດ້ຕາມແຜນ, ກອງປະຊຸມໄດ້ຮັບຮອງເອົາໃນດ້ານຫຼັກການຕໍ່ທິດທາງ, ແຜນການປະຈຳປີ 2024 ໂດຍເນັ້ນໜັກບັນຫາຈໍານວນໜຶ່ງ ເພື່ອໃຫ້ລັດຖະບານເອົາໃຈໃສ່ປັບປຸງ ແລ້ວນໍາສະເໜີຜ່ານກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX ຄື:ແຜນການປີ 2024 ຕ້ອງເປັນແຜນທີ່ບຸກບືນສູ້ຊົນສູງ ແລະ ທັງຕ້ອງມີລັກສະນະບຸກທະລຸຢ່າງແຂງແຮງ ແລະ ມີຈຸດສຸມແນໃສ່ສ້າງພື້ນຖານ ແລະ ທ່ວງທ່າໜັກແໜ້ນ ໃຫ້ແກ່ປີມ້ວນທ້າຍແຜນພັດທະນາເສດຖະກິດ-ສັງຄົມແຫ່ງຊາດ 5 ປີ ຄັ້ງທີ IX ດ້ວຍຜົນສໍາເລັດຕາມເປົ້າໝາຍ,  ຄະນະບໍລິຫານງານສູນກາງພັກ ໃຫ້ທິດຊີ້ນໍາວຽກງານຈຸດສຸມ ໃນທ້າຍປີ 2023 ແລະ ປີ 2024 ຄື:ສືບຕໍ່ສຸມໃສ່ແກ້ໄຂສະພາບເຄັ່ງຮ້ອນ ໃຫ້ສາມາດຄວບຄຸມໄດ້ ແລະ ກ້າວເຂົ້າສູ່ສະພາບປົກກະຕິເທື່ອລະກ້າວ, ໃນເງື່ອນໄຂຫຍຸ້ງຍາກ ຕ້ອງເລັ່ງແກ້ໄຂຍົກລະດັບຊີວິດການເປັນຢູ່ ຂອງປະຊາຊົນ, ພະນັກງານ, ທະຫານ, ຕໍາຫຼວດດ້ວຍນະໂຍບາຍທີ່ເໝາະສົມ,ປຸກລະດົມສັງຄົມ ສ້າງຄ່ານິຍົມ ການນໍາໃຊ້ສິນຄ້າລາວ ໃຫ້ເປັນສະຕິຊາດ ແລະ ເປັນຂະບວນການກວ້າງຂວາງ,  ສືບຕໍ່ຍູ້ແຮງການຫັນເປັນທັນສະໄໝ ໃນຂະແໜງການຂຸດຄົ້ນ, ຄຸ້ມຄອງ ແລະ ຈັດເກັບລາຍຮັບງົບປະມານ, ເຊື່ອມຈອດຖານຂໍ້ມູນ ຂອງຂະແໜງເສດຖະກິດໃຫ້ສໍາເລັດໂດຍໄວ,ຕັດສິນໃຈແກ້ໄຂບັນດານິຕິກຳ, ກົນໄກຕ່າງໆທີ່ບໍ່ທັນສອດຄ່ອງ ເພື່ອສ້າງສະພາບແວດລ້ອມທີ່ ເອື້ອອໍານວຍໃຫ້ແກ່ການດຶງດູດການລົງທຶນທັງພາຍໃນ ແລະ ການລົງທຶນໂດຍກົງຈາກຕ່າງປະເທດໃຫ້ຫຼາຍຂຶ້ນ,  ເພີ່ມທະວີມາດຕະການປະຢັດ, ຕ້ານການຟຸ່ມເຟືອຍ,ໃຫ້ຄົ້ນຄວ້າຄວາມເປັນໄປໄດ້ ການສ້າງຕັ້ງທະນາຄານ ຫຼື ຄັງແຮ “ຄໍາ” ໂດຍນໍາໃຊ້ຊັບພະຍາກອນທີ່ມີໃຫ້ເກີດຜົນປະໂຫຍດສູງສຸດ ໄປຄຽງຄູ່ກັບການເພີ່ມຄັງສຳຮອງເງິນຕາຕ່າງປະເທດ ໃນແຕ່ລະປີ ເພື່ອສາມາດກຸ້ມການນໍາເຂົ້າ ຢ່າງໜ້ອຍ 5-6 ເດືອນຂຶ້ນໄປ. ເລັ່ງລັດການຈົດທະບຽນ ແລະ ຄຸ້ມຄອງໃຫ້ແທດ ເຖິງບັນດາບໍລິສັດນໍາເຂົ້າ-ສົ່ງອອກ ເພື່ອສາມາດດໍາເນີນການຊຳລະສະສາງ ຜ່ານລະບົບທະນາຄານຢ່າງເຂັ້ມງວດ, ຈັດສັນ, ດຸນດ່ຽງງົບປະມານ ລະຫວ່າງສູນກາງ ແລະ ທ້ອງຖິ່ນ ໃຫ້ເໝາະສົມ, ນັບທັງການນຳໃຊ້ເງິນເກີນແຜນ ຂອງບັນດາທ້ອງຖິ່ນ ໃຫ້ສົມເຫດສົມຜົນ,  ຊຸກຍູ້ເສດຖະກິດເປັນເຈົ້າຕົນເອງ, ເສດຖະກິດດີຈີຕອນ (ເສດຖະກິດໂຕເລກ) ໃຫ້ ເປັນຮູບປະທໍາກວ່າເກົ່າ ໂດຍກໍານົດນະໂຍບາຍ ແລະ ນິຕິກໍາ ທີ່ຈະແຈ້ງ ເລັ່ງລັດປະຕິຮູບລັດວິສາຫະກິດໃຫ້ມີຄວາມເຂັ້ມແຂງ, ສາມາດແຂ່ງຂັນ ແລະ ເປັນກໍາລັງແຮງໃຫ້ແກ່ລັດຖະບານ. ສືບຕໍ່ຊຸກຍູ້ສົ່ງເສີມ ແລະພັດທະນາຈຸນລະວິສາຫະກິດ, ວິສາຫະກິດຂະໜາດນ້ອຍ ແລະຂະໜາດກາງໃຫ້ຂະຫຍາຍຕົວ ແລະ ເຂັ້ມແຂງຂຶ້ນກວ່າເກົ່າ. ຖືສໍາຄັນການສົ່ງເສີມເສດຖະກິດຮ່ວມມືຂອງປະຊາຊົນ ຫຼື ສະຫະກອນ ແລະ ອື່ນໆ.
    ກອງປະຊຸມ ໄດ້ວາງຈຸດສຸມນໍາພາຊີ້ນຳ ຂອງຄະນະບໍລິຫານງານສູນກາງພັກ ແຕ່ນີ້ຮອດກອງປະຊຸມຄົບຄະນະ ຄັ້ງທີ 8 ສະໄໝທີ XI ຄື: ຊີ້ນຳການຮັບປະກັນໃຫ້ປະເທດຊາດມີສະຖຽນລະພາບທາງດ້ານການເມືອງ, ໝັ້ນຄົງ ຂອງປະເທດຊາດ ໃຫ້ໜັກແໜ້ນ, ສັງຄົມໃຫ້ມີຄວາມສະຫງົບປອດໄພ, ສືບຕໍ່ຊີ້ນໍາຄະນະສະເພາະກິດ 19/ກມສພ ສຸມໃສ່ການແກ້ໄຂບັນຫາເຄັ່ງຮ້ອນ ແລະ ຄວາມຫຍຸ້ງຍາກດ້ານເສດຖະກິດ-ການເງິນ ໃຫ້ມີທ່ວງທ່າ ແລະ ການຫັນປ່ຽນໃໝ່, ຊີ້ນໍາການຈັດຕັ້ງ ແລະ ການເຄື່ອນໄຫວ ຂອງຄະນະປະຕິຮູບລັດວິສາຫະກິດ ໃຫ້ເປັນລະບົບ ແລະ ເຂົ້າສູ່ການແກ້ໄຂບັນຫາ, ຊີ້ນໍາການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ໃຫ້ໄດ້ຮັບຜົນດີ, ບັນດາແຜນການ, ຕົວເລກຄາດໝາຍ ໂດຍສະເພາະ ແຜນລົງທຶນ, ແຜນງົບປະມານ, ສູ້ຊົນໃຫ້ສາມາດຈັດຕັ້ງປະຕິບັດໄດ້ ເລີ່ມເດືອນມັງກອນ 2024 ເປັນຕົ້ນໄປ ແລະ ວຽກງານອື່ນໆ.
    ນອກຈາກນັ້ນ, ບັນດາຜູ້ເຂົ້າຮ່ວມປະຊຸມ ຍັງໄດ້ຮັບຟັງ ການຫວນຄືນມູນເຊື້ອ ວັນຊາດທີ 2 ທັນວາ ຄົບຮອບ 48ປີແລະວັນເກີດປະທານໄກສອນ ພົມວິຫານ ຄົບຮອບ 103ປີອີກດ້ວຍ. 
(ຂ່າວ-ພາບ: ແສງຈັນ)