 |
ສະຫາຍ ຄຳພັນ ສິດທິດຳພາ ໄດ້ກ່າວວ່າ: ກອງປະຊຸມໃນຄັ້ງນີ້ສຸດທີ່ມີຄວາມໝາຍສໍາຄັນຍິ່ງ ເພື່ອຕີລາຄາຄືນໝາກຜົນ ຂອງການນໍາພາ - ຊີ້ນຳລວມ ຂອງຄະນະບໍລິຫານງານພັກແຂວງ ກໍຄືການປະຕິບັດໜ້າທີ່ການເມືອງຂອງຄະນະບໍລິຫານງານພັກແຂວງແຕ່ລະສະຫາຍ ໂດຍໄຈ້ແຍກໃຫ້ເຫັນດ້ານດີ, ດ້ານອ່ອນ - ຂໍ້ຄົງຄ້າງ, ສາເຫດທີ່ພາໃຫ້ມີອັນດີ, ອັນອ່ອນ ແລະ ບົດຮຽນທີ່ຖອດຖອນໄດ້ ໃນການເຄື່ອນໄຫວນຳພາ - ຊີ້ນຳ ຕະຫຼອດໄລຍະ 5 ປີຜ່ານມາ, ສະທ້ອນໃຫ້ເຫັນເຖິງຄວາມເອກອ້າງທະນົງໃຈ ຕໍ່ຜົນສໍາເລັດທີ່ຍາດມາໄດ້ ຕິດພັນກັບຕີລາຄາການນໍາພາລວມ ແລະ ບຸກຄົນຄະນະບໍລິຫານງານພັກແຂວງ ເພື່ອບັບປຸງບົວແປງພາຍໃນພັກ, ຮັບປະກັນການເລືອກເຟັ້ນບຸກຄະລາກອນດີເດັ່ນ ປະກອບເຂົ້າໃນຄະນະບໍລິຫານພັກແຂວງຊຸດໃໝ່ໃຫ້ໄດ້ຕາມມາດຖານ, ເງື່ອນໄຂທີ່ກຳນົດໄວ້ໃນກົດລະບຽບຂອງພັກ ແລະ ເພື່ອປະຕິບັດຕາມກົດລະບຽບ ຂອງພັກປະຊາຊົນ ປະຕິວັດລາວ ສະໄໝທີ XI, ກໍຄືມະຕິ, ຄຳສັ່ງ ແລະ ບົດແນະນໍາຕ່າງໆ ຂອງກົມການເມືອງ, ຄະນະເລຂາທິການສູນກາງພັກ, ຄະນະຈັດຕັ້ງສູນກາງພັກ ແລະ ຄະນະກວດກາສູນກາງພັກ ຄະນະບໍລິຫານງານພັກແຂວງວຽງຈັນ ສະໄໝທີ VI ໄດ້ອອກມະຕິ ກ່ຽວກັບການກະກຽມກອງປະຊຸມໃຫຍ່ ຄັ້ງທີ VII ຂອງອົງຄະນະພັກແຂວງ ຕິດພັນກັບການກະກຽມ ແລະ ດໍາເນີນຊີວິດການເມືອງທ້າຍສະໄໝ ຊຶ່ງມາຮອດປັດຈຸບັນ ຂະບວນການກະກຽມໃນແຕ່ລະດ້ານໄດ້ສໍາເລັດຜົນຕາມຄາດໝາຍທີ່ວາງໄວ້, ອັນພົ້ນເຕັນແມ່ນການດໍາເນີນຊີວິດການເມືອງ ບັນດາໜ່ວຍພັກຮາກຖານ, ຄະນະພັກຮາກຖານສໍານັກງານ - ອົງການອ້ອມຂ້າງແຂວງ, ສອງກອງບັນຊາການ ປກຊ - ປກສ ແລະ ຂອງອົງຄະນະພັກເມືອງ 11 ເມືອງ ໄດ້ສຳເລັດຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ອັນໄດ້ສ້າງພື້ນຖານ ແລະ ເງື່ອນໄຂໃຫ້ການດໍາເນີນກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ ໄດ້ດໍາເນີນຕາມແຜນທີ່ວາງໄວ້.
ສະຫາຍ ຄຳພັນ ເຜີຍຍະວົງ ໄດ້ມີຄຳເຫັນຊີ້ນຳ ເພື່ອສືບຕໍ່ຜັນຂະຫຍາຍຜົນສໍາເລັດ ຂອງການດໍາເນີນຊີວິດການເມືອງທ້າຍສະໄໝ ແລະ ກາງສະໄໝໃນຄັ້ງໄລຍະຜ່ານມາ ໃຫ້ມີຄວາມໜັກແໜ້ນ ແລະ ສ້າງການຫັນປ່ຽນຢ່າງແຂງແຮງ. ການດໍາເນີນຊີວິດການເມືອງຄັ້ງນີ້ຕ້ອງເຮັດໃຫ້ການນໍາລວມ ແລະ ບຸກຄົນຄະນະບໍລິຫານງານພັກແຂວງ ເພື່ອແນໃສ່ປັບປຸງ-ປ່ຽນແປງຢ່າງຕັ້ງໜ້າ, ຍົກສູງຄວາມສາມາດນໍາພາ, ຄວາມເປັນແບບຢ່າງນໍາໜ້າຄວາມສາມັກຄີເປັນເອກະພາບພາຍໃນພັກ. ອີກດ້ານໜຶ່ງກໍເພື່ອຕີລາຄາ ແລະ ແບ່ງປະເພດຄຸນນະພາບຂອງຄະນະບໍລິຫານງາພັກແຂວງ ເພື່ອເປັນບ່ອນອີງໃນການເລືອກເຟັ້ນບຸກຄະລະກອນຜູ້ທີ່ດີເດັ່ນຈາກຂະບວນການວຽກງານຕົວຈິງ ເຂົ້າໃນຄະນະບໍລິການງານພັກແຂວງຊຸດໃໝ່ ໃຫ້ໄປຕາມມາດຕະຖານ, ເງື່ອນໄຂທີ່ໄດ້ກຳນົດໄວ້ ໃນກົດລະບຽບພັກ, ມະຕິຂອງກົມການເມືອງສູນກາງພັກ ເລກທີ 030, ຄໍາສັ່ງຂອງຄະນະເລຂາທິການສູນກາງພັກ ເລກທີ 411, ຄໍາແນະນໍາຂອງຄະນະກວດກາພັກ ສູນກາງພັກ ເລກທີ 285 ກໍຄືຄໍາສັ່ງຂອງຄະນະປະຈຳພັກແຂວງ ເລກທີ 019 ແລະ ຄໍາແນະນໍາຂອງຄະນະປະຈຳພັກແຂວງ ເລກທີ 020 ກ່ຽວກັບການກະກຽມ ແລະ ດໍາເນີນຊີວິດການເມືອງທ້າຍສະໄໝ ກອງປະຊຸມໃຫຍ່ 3 ຂັ້ນຂອງພັກ ເພື່ອເປັນບ່ອນອີງໃຫ້ບັນດາສະຫາຍນໍາໄປຄົ້ນຄວ້າຕີລາຄາ ແລະ ປະກອບຄຳຄິດຄໍາເຫັນ, ຕຳນິຕິຊົມ, ສົ່ງຂ່າວ, ກໍ່ສ້າງຊ່ວຍເຫຼືອຊຶ່ງກັນ ແລະ ກັນ
 |
ສະຫາຍ ຄຳພັນ ເຜີຍຍະວົງ ຍັງໄດ້ມີບາງຄໍາເຫັນ ແລະ ເຈາະຈີ້ມບາງບັນຫາດັ່ງນີ້:
ໜຶ່ງ; ຄວາມສໍາຄັນຂອງການດໍາເນີນຊີວິດການເມືອງ ທ້າຍສະໄໝແມ່ນເພື່ອສໍາຫຼວດຕີລາຄາຄວາມຮັບຜິດຊອບ ໂດຍຊອກໃຫ້ເຫັນດ້ານດີ, ຜົນງານ, ດ້ານອ່ອນ, ຂໍ້ຂາດຕົກບົກຜ່ອງຕໍ່ການນໍາພາລວມ ແລະ ບຸກຄົນໃນຄະນະບໍລິຫານງານພັກແຂວງ ຕະຫຼອດສະໄໝກອງປະຊຸມໃຫຍ່ຊຸດທີ VI ຜ່ານມາ.
ສອງ; ສືບຕໍ່ຜັນຂະຫຍາຍຜົນສໍາເລັດ ຂອງບັ້ນດໍາເນີນຊີວິດການເມືອງ ທ້າຍສະໄໝ ແລະ ກາງສະໄໝຄັ້ງຜ່ານມາ, ການແກ້ໄຂຈຸດອ່ອນ-ຂໍ້ຄົງຄ້າງໃນການນໍາພາຂອງຄະນະບໍລິຫານງານພັກແຂວງ, ແນໃສ່ປັບປຸງ-ປົວແປງພັກໃຫ້ປອດໃສ, ເຂັ້ມແຂງ, ໜັກ ແໜ້ນ; ແນໃສ່ຍົກສູງບົດບາດ ແລະ ຄວາມສາມາດນໍາພາຂອງພັກ, ປັບປຸງກໍ່ສ້າງພັກໃຫ້ໜັກແໜ້ນທາງດ້ານການເມືອງ, ແນວຄິດ, ການຈັດຕັ້ງ ແລະ ແບບແຜນວິທີນໍາພາ-ວິທີເຮັດວຽກ. ຕີລາຄາ ແລະ ແບ່ງປະເພດຄຸນນະພາບຂອງຄະນະບໍລິຫານງານພັກແຂວງ ເພື່ອເປັນບ່ອນອີງໃນການເລືອກເຟັ້ນບຸກຄະລະກອນຜູ້ທີ່ດີເດັ່ນເຂົ້າໃນຄະນະພັກຊຸດໃໝ່ ໃຫ້ໄປຕາມມາດຕະຖານ, ເງື່ອນໄຂ ທີ່ໄດ້ກຳນົດໄວ້.
ສາມ; ການສຳຫຼວດບຸກຄົນໃນຄະນະບໍລິຫານງານພັກແຂວງ, ຄວາມສັດຊື່ບໍລິສຸດ, ນໍ້າໃຈເສຍສະຫຼະເພື່ອປະເທດຊາດ ແລະ ປະຊາຊົນ, ຄວນເປັນແບບຢ່າງນຳໜ້າ, ການທຸ່ມເທເຫື່ອແຮງສະຕິປັນຍາ ແລະ ການເສຍສະຫຼະ ເພື່ອອັນລວມມີຄືແນວໃດ ?.
ສີ່; ການດຳເນີນຊີວິດການເມືອງ ຕ້ອງຫຼີກເວັ້ນທັດສະນະແນວຄິດສວຍໂອກາດ,ໂຄ່ນລົ້ມໂຈມຕິກັນ, ຫາເລື່ອງໃສ່ກັນ, ຕ້ານແນວຄິດອະຄະຕິຕໍ່ກັນ ແລະ ບັນຫາທີຫ້າ ກໍລະນີການດຳເນີນຊີວິດການເມືອງ ທ້າຍສະໄໝ ບໍ່ເລິກເຊິ່ງ ບໍໍ່ໄດ້ຕາມຈຸດປະສົງ - ຄາຍ ໝາຍ ຕ້ອງເຮັດຄືນໃໝ່ໃຫ້ເລິກເຊິ່ງກວ່າເກົ່າ.
(ຂ່າວ: ບຸນຕອມ)
ຄໍາເຫັນ