 |
ສະຫາຍ ວັນໄຊ ພອງສະຫວັນ ໄດ້ກ່າວວ່າ: ມື້ນີ້, ພວກເຮົາພ້ອມກັນມາຈັດຕັ້ງງານໂຮມຊຸມນຸມຢູ່ທີ່ສະຖານທີ່ແຫ່ງນີ້ ເພື່ອເປັນການຊົມເຊີຍຜົນສຳເລັດກອງປະຊຸມໃຫຍ່ຜູ້ແທນອົງຄະນະພັກແຂວງຄໍາມ່ວນ ຄັ້ງທີ XI, ໃນໂອກາດອັນມີຄວາມໝາຍຄວາມສຳຄັນນີ້ ໃນນາມຕາງໜ້າຄະນະບໍລິຫານງານພັກແຂວງ ຊຸດໃໝ່ ຂໍຖືເປັນກຽດຢ່າງສູງແຈ້ງມາຍັງບັນດາພະນັກງານ, ທະຫານ, ຕຳຫຼວດ, ນັກທຸລະກິດ, ພໍ່ຄ້າຊາວຂາຍ ແລະ ປະຊາຊົນບັນດາເຜົ່າຊາວແຂວງຄໍາມ່ວນທຸກຖ້ວນໜ້າ ຊາບທົ່ວເຖິງກັນວ່າ: ກອງປະຊຸມໃຫຍ່ ຜູ້ແທນ ອົງຄະນະພັກແຂວງຄໍາມ່ວນ ຄັ້ງທີ XI ໄດ້ໄຂຂຶ້ນ ແລະ ດໍາເນີນລະຫວ່າງວັນທີ 29 ຫາ 30 ກັນຍາ ນີ້ ດ້ວຍບັນຍາກາດທີ່ຟົດຟື້ນ, ເບີກບານມ່ວນຊື່ນ ແລະ ສໍາເລັດລົງດ້ວຍໝາກຜົນອັນສະຫງ່າງາມ. ໂດຍມີຜູ້ແທນສົມບູນເຂົ້າຮ່ວມທັງໝົດ 385 ສະຫາຍ, ຍິງ 51 ສະຫາຍ ທີ່ເປັນຕົວແທນໃຫ້ສະມາຊິກພັກໃນທົ່ວແຂວງ ຈຳນວນ 23,464 ສະຫາຍ. ພ້ອມນີ້ຍັງເປັນກຽດເຂົ້າຮ່ວມຂອງ ສະຫາຍ ບຸນທອງ ຈິດມະນີ ກຳມະການກົມການເມືອງ ຜູ້ປະຈໍາການຄະນະເລຂາທິການສູນກາງພັກ ຮອງປະທານປະເທດແຫ່ງ ສປປ ລາວ, ບັນດາແຂກຜູ້ຕາງໜ້າຈາກສູນກາງ, ຈາກແຂວງສະຫວັນນະເຂດ, ແຂວງບໍລິຄໍາໄຊ, ພະນັກງານອາວຸໂສ-ບໍານານ, ນັກຮົບແຂ່ງຂັນ, ນັກທຸລະກິດເຂົ້າຮ່ວມຢ່າງພ້ອມພຽງ.
ກອງປະຊຸມ ໄດ້ເລືອກຕັ້ງເອົາຄະນະບໍລິຫານງານພັກແຂວງ ສະໄໝທີ XI ຈໍານວນ 37 ສະຫາຍ ຍິງ 7 ສະຫາຍ. ກອງປະຊຸມຄັ້ງປະຖົມມະລຶກ ໄດ້ເປັນເອກກະສັນເລືອກຕັ້ງຄະນະປະຈຳພັກແຂວງຈໍານວນ 11 ສະຫາຍ ຍິງ 1 ສະຫາຍ ແລະ ໄດ້ຮັບຮອງສະຫາຍ ວັນໄຊ ພອງສະຫວັນ ເປັນເລຂາຄະນະບໍລິຫານງານພັກແຂວງ, ສະຫາຍ ສົມໃຈ ພານີຈັນ ແລະ ສະຫາຍ ສົມສະອາດ ອຸ່ນສີດາ ເປັນຮອງເລຂາຄະນະບໍລິຫານງານພັກແຂວງ. ເລືອກຕັ້ງ ສະຫາຍ ນາງ ບັງອອນ ໄຊຍະສິດ ເປັນປະທານກວດກາພັກ, ສະຫາຍ ພິມພອນ ສຸລິວົງສາ, ສະຫາຍ ສີສຸກ ພິມມະສອນ ແລະ ສະຫາຍ ບຸນທະວີ ພິລາວັນ ເປັນຮອງປະທານກວດກາພັກ.
(ຂ່າວ: ມະນີວັນ, ພາບ: ກອງຄໍາ)
ຄໍາເຫັນ