ທ່ານ ຄຳຫຼ້າ ວິນໄລທອງ ກຳມະການສູນກາງແນວລາວສ້າງຊາດ ປະທານ ສະຫະພັນເປຕັ້ງແຫ່ງຊາດລາວ (ສປຕ) ໄດ້ກ່າວວ່າ: ການແຂ່ງຂັນກິລາເປຕັງຊີງຂັນແນວລາວສ້າງຊາດ ຄັ້ງນີ້ມີການແຂ່ງຂັນ 4 ລາຍການ ປະກອບມີ ດ່ຽວຍິງ, ດ່ຽວຊາຍ, ຄູ່ທົ່ວໄປ ແລະ ຄູ VIP (50 ປີຂຶ້ນໄປ). ມີນັກກິລາເຂົ້າຮ່ວມການແຂ່ງຂັນທັງໝົດ 112 ທີມ ທີ່ມາຈາກທົ່ວປະເທດ. ລາງວັນການແຂ່ງຂັນແຕ່ລະປະເພດ ມີຂັນ 1 ໜ່ວຍ ພ້ອມເງິນສົດ. ຜ່ານການແຂ່ງຂັນເຫັນວ່າ: ປະເພດດ່ຽວຊາຍ ອັນດັບທີ 1 ໄດ້ແກ່ ຄະນະໂຄສະນາອົບຮົມສູນກາງພັກ, ທີ 2 ກະຊວງໂຍທາທິການ ແລະ ຂົນສົ່ງ ແລະ ທີ 3 ຄະນະໂຄສະນາອົບຮົມສູນກາງພັກ; ປະເພດດ່ຽວຍິງ ອັນດັບທີ 1 ໄດ້ແກ່ ແຂວງຄຳມ່ວນ, ທີ 2 ບໍລິສັດສະເຫຼີມໄຊ ສະຫວັນນະເຂດ ແລະ ທີ 3 ແຂວງຄຳມ່ວນ; ປະເພດທີມຄູ່ທົ່ວໄປ ທີ 1 ໄດ້ແກ່ ກະຊວງໂຍທາທິການ ແລະ ຂົນສົ່ງ, ທີ 2 ສະໂມສອນເພັດມັງກອນ ແລະ ທີ 3 ຄະນະໂຄສະນາອົບຮົມສູນກາງພັກ ແລະ ປະເພດ ຄູ VIP (50 ປີຂຶ້ນໄປ) ທີ່ 1 ໄດ້ແກ່ທີມນະຄອນຫຼວງ, ທີ 2 ທີມບຸນຈັນພະຂ່າວ ແລະ ທີ 3 ແຂວງບໍລິຄຳໄຊ.
ໃນໂອກາດນີ້: ທ່ານ ສິນລະວົງ ຄຸດໄພທູນ ກໍໄດ້ໃຫ້ກຽດຂຶ້ນມອບຂັນລາງວັນໃຫ້ນັກກິລາທີ່ໄດ້ຮັບລາງວັນຕ່າງໆ ແລະ ທ່ານ ເຍ່ຍເກີຢ່າ ໜໍຈໍຈົງຕົວ ຮອງປະທານສູນກາງແນວລາວສ້າງຊາດ ກໍໄດ້ຂຶ້ນກ່າວປິດການແຂ່ງຂັນກິລາເປຕັງ ຊີງຂັນແນວລາວສ້າງຊາດ ເຖິງແມ່ນວ່າ ການແຂ່ງຂັນກິລາເປຕັງໄດ້ຈົບລົງແລ້ວກໍຕາມ ແຕ່ວ່າພວກເຮົາກໍຍັງມີຫຼາຍກິດຈະກໍາທີ່ພວມກໍາລັງຈັດຕັ້ງເຄື່ອນໄຫວ ເພື່ອເຮັດໃຫ້ການສະເຫຼີມສະຫຼອງ 75 ປີ ແນວລາວສ້າງຊາດ ຂອງພວກເຮົາ ມີຄວາມຄຶກຄື້ນ, ມີຄວາມເບີກບານມ່ວນຊື່ນ ແລະ ມີຄວາມສາມັກຄີຮັກແພງ ໂດຍສະເພາະແມ່ນກິດຈະກໍາ ວັດທະນະທໍາ ທີ່ພວກເຮົາກະກຽມຈັດຂຶ້ນ ຢູ່ສວນບັນດາເຜົ່າ ເມືອງນາຊາຍທອງ; ກິດຈະກໍາແຂ່ງຂັນ ເຕະບານຍິງ-ຊາຍ ທີ່ຈະໄດ້ຈັດຂຶ້ນ ຢູ່ສະໜາມກຸດໄລຟ; ກິດຈະກໍາຈາລຶກບຸນຄຸນການນໍາແນວລາວອິດສະຫຼະ, ແນວລາວຮັກຊາດ ແລະ ກິດຈະກໍາ ຂະບວນຄາລະວານ ຫວນຄືນເຂດທີ່ໝັ້ນ ເມືອງວຽງໄຊ ແຂວງຫົວພັນ. ສະນັ້ນ, ຈຶ່ເຊີນບັນດາທ່ານການນໍາພັກ-ລັດ, ນັກທຸລະກິດ, ຜູ້ປະກອບການ ແລະ ປະຊາຊົນ ຈົ່ງໄດ້ໃຫ້ການສະໜັບສະໜູນ, ເຂົ້າຮ່ວມຂະບວນການຕ່າງໆ ຮ່ວມກັບຄະນະພວກເຮົາໃຫ້ສົມກັບວ່າ ວັນທີ 13 ສິງຫາ ເປັນວັນບຸນມະຫາສາມັກຄີ ຂອງທົ່ວປວງຊົນລາວທັງຊາດ.
ຂ່າວ-ພາບ:ບຸນຕອມ.
ຄໍາເຫັນ