ໃນວັນທີ 23 ພະຈິກນີ້ທີ່ ຄະນະໂຄສະນາອົບຮົມສູນກາງພັກ(ຄອສພ) ໄດ້ສຳເລັດການເຊື່ອມຊຶມຄໍາສັ່ງ, ຄໍາແນະນໍາ ກ່ຽວກັບການກະກຽມດໍາເນີນກອງປະຊຸມໃຫຍ່ 3 ຂັ້ນ ຂອງພັກ, ພາຍຫຼັງດຳເນີນມາເປັນເວລາ ເກືອບສອງວັນ ໂດຍການເປັນປະທານ ຂອງທ່ານ ຄຳພັນ ເຜີຍຍະວົງ ຄະນະເລຂາທິການສູນກາງພັກເລຂາຄະນະພັກຫົວໜ້າ ຄອສພ, ມີຄະນະປະຈຳພັກ, ເລຂາໜ່ວຍພັກ, ບັນດາຫົວໜ້າກົມ, ຮອງຫົວໜ້າກົມ, ຫົວໜ້າພະແນກ, ຮອງພະແນກ ແລະ ພະນັກງານທົ່ວ ຄອສພ ເຂົ້າຮ່ວມຢ່າງພ້ອມພຽງ.
ທ່ານນາງວິລະວອນພັນທະວົງຄະນະປະຈຳພັກຮອງຫົວໜ້າຄອສພໄດ້ໃຫ້ກຽດເຜີຍແຜ່ຄຳແນະນຳຂອງຄອສພເລກທີ 34/ຄອສພ,ລົງວັນທີ 14/9/2023 ກ່ຽວກັບການນຳໃຊ້ເອກະສານສຶກສາອົບຮົມການເມືອງ-ແນວຄິດສຳລັບສະມາຊິກພັກ,ພະນັກງານຫຼັກແຫຼ່ງເພື່ອດຳເນີນກອງປະຊຸມໃຫຍ່ 3 ຂັ້ນ ຂອງພັກ ແລະ ເຜີຍແຜ່ເອກະສານ 4ບົດຄື: 1). ຄວາມເຂົ້າໃຈກ່ຽວກັບກອງປະຊຸມໃຫຍ່ 3ຂັ້ນຂອງພັກ,2).ຍົກສູງຄວາມສາມາດນຳພາແລະ ຄວາມເປັນແບບຢ່າງນຳໜ້າຂອງສະມາຊິກພັກ,3). ຕັ້ງໜ້າຝຶກຝົນຫຼໍ່ຫຼອມຄຸນທາດການເມືອງ ແລະ ຄຸນສົມບັດສິນທຳປະຕິວັດ,4). ເດັດດ່ຽວແກ້ໄຂປະກົດການຫຍໍ້ທໍ້ໃນຖັນແຖວພະນັກງານ,ສະມາຊິກພັກແລະ ຄຳແນະນຳ ຂອງ ຄອສພ ເລກທີ 264/ຄອສພ,ລົງວັນທີ 6/11/2023 ກ່ຽວກັບການສ້າງຂະບວນການ ເພື່ອກະກຽມແລະ ດຳເນີນກອງປະຊຸມໃຫຍ່ 3 ຂັ້ນຂອງພັກ.
ຈຸດປະສົງ:ເພື່ອສຶກສາອົບຮົມການເມືອງ-ແນວຄິດໃຫ້ເປົ້າໝາຍ ທີ່ຈະກຽມຄັດເລືອກເປັນຄະນະພັກ ໃນແຕ່ລະຂັ້ນຢູ່ບັນດາກະຊວງ,ແຂວງ,ເມືອງ,ນະຄອນ ແລະ ບັນດາອົງການຕ່າງໆທີ່ຈະດຳເດີນກອງປະຊຸມໃຫຍ່ຂັ້ນຂອງຕົນ ໄດ້ມີຄວາມຮັບຮູ້-ເຂົ້າໃຈຕໍ່ກັບຄວາມໝາຍ,ຄວາມສຳຄັນຂອງກອງປະຊຸມ3ຂັ້ນ;ກຳແໜ້ນເຖິງການຍົກສູງບົດບາດການນຳພາຂອງພັກເຂົ້າໃນວຽກງານຕ່າງໆ;ພ້ອມດຽວກັນນັ້ນຍັງເປັນການຝຶກຝົນຫຼໍ່ຫຼອມຕົນເອງ ດ້ານຄຸນທາດການເມືອງ ຄຸນສົມບັດສິນທຳປະຕິວັດຂອງພະນັກງານ,ສະມາຊິກພັກ;ບົນພື້ນຖານການຮຽນຮູ້,ເຂົ້າໃຈດັ່ງກ່າວພະນັກງານ,ສະມາຊິກພັກທີ່ຖືກຄັດເລືອກເຂົ້າໃນຄະນະນຳຕາມທີ່ກອງປະຊຸມໃຫຍ່ແຕ່ລະຂັ້ນເລືອກເອົານັ້ນເປັນເຈົ້າການອຸທິດສະຕິປັນຍາແລະເຫື່ອແຮງເຂົ້າໃສ່ພາລະກິດປະຕິວັດ,ເຮັດໃຫ້ປະຊາຊົນມີຄວາມເຊື່ອໝັ້ນແລະສັດທາເພື່ອເຮັດໃຫ້ປະເທດຊາດມັ່ງຄັ່ງເຂັ້ມແຂງ,ປະຊາຊົນຮັ່ງມີຜາສຸກ,ສັງຄົມສາມັກຄີປອງດອງ,ປະຊາທິປະໄຕ,ຍຸຕິທຳແລະສີວິໄລ.
ຈາກນັ້ນທ່ານຄຳພັນເຜີຍຍະວົງຍັງໄດ້ເນັ້ນຕື່ມອີກວ່າ: ໃຫ້ພະນັກງານທົ່ວຄອສພຈົ່ງພ້ອມກັນຍົກສູງຄວາມເອົາໃຈໃສ່ຈັດຕັ້ງສຶກສາອົບຮົມການເມືອງ-ແນວຄິດ,ເພື່ອດຳເນີນກອງປະຊຸມໃຫຍ່ຂອງພັກ3ຂັ້ນໃຫ້ໄດ້ຮັບຜົນດີຢ່າງຈົບງາມ.
(ຂ່າວ-ພາບ: ພັດ ລໍວັນໄຊ)
ຄໍາເຫັນ