 |
ທ່ານ ນາງ ຄຳຫຼ້າ ແກ້ວອຸ່ນຄຳ ກ່າວວ່າ: ກອງປະຊຸມສຳມະນາຄັ້ງນີ້ ເປັນກອງປະຊຸມທີ່ສຳຄັນຫຼາຍ ແລະ ເປັນກອງປະຊຸມແລກປ່ຽນດ້ານວິຊາການຄັ້ງທຳອິດ ລະຫວ່າງ ສະຖາບັນການເມືອງ ແລະ ການປົກຄອງແຫ່ງຊາດ ແລະ ສະຖານທູດອົສຕຣາລີ ປະຈຳລາວ, ເພື່ອຮ່ວມກັນວິເຄາະ, ເຈາະເລິກ ແລະ ສ້າງຄວາມເຂົ້າໃຈທີ່ຖືກຕ້ອງກ່ຽວກັບທິດທາງ ແລະ ທ່າອ່ຽງຂອງເສດຖະກິດໂລກ, ເພື່ອຖອດຖອນບົດຮຽນ ແລະ ຊອກຫາແນວທາງ, ວິທີການປັບຕົວໃຫ້ແທດເໝາະກັບສະພາບຄວາມເປັນຈິງ ຂອງອົງກອນ ແລະ ປະເທດຊາດພວກເຮົາ, ສ້າງເຄືອຂ່າຍການແລກປ່ຽນຂໍ້ມູນຂ່າວສານ ແລະ ການພົວພັນຮ່ວມມື ລະຫວ່າງຜູ້ຊ່ຽວຊານ, ນັກວິຊາການ ແລະ ຜູ້ປະຕິບັດຕົວຈິງ ແລະ ຫວັງຢ່າງຍິ່ງວ່າ ບັນດາວິທະຍາກອນຜູ້ທີ່ມີຄວາມຮູ້, ມີຄວາມຊ່ຽວຊານ ແລະ ປະສົບການສູງ ຈະໄດ້ນຳເອົາຂໍ້ມູນທີ່ເປັນປະໂຫຍດມາແບ່ງປັນ. ພ້ອມດຽວກັນນັ້ນຜູ້ເຂົ້າຮ່ວມຈົ່ງພ້ອມກັນປະກອບສ່ວນສະແດງຄຳຄິດຄຳເຫັນ, ຕັ້ງຄຳຖາມເຈາະຈີ້ມຢ່າງກົງໄປກົງມາ ແລະ ສ້າງສັນ ເພື່ອໃຫ້ກອງປະຊຸມຂອງພວກເຮົາຍາດໄດ້ໝາກຜົນສູງສຸດ ແລະ ຜ່ານການນຳສະເໜີບົດຄົ້ນຄວ້າ, ການສົນທະນາ ແລະ ການແລກປ່ຽນຢ່າງກວ້າງຂວາງ ກອງປະຊຸມໃນຄັ້ງນີ້ຈະໄດ້ຮັບບົດຮຽນ, ຂໍ້ສະເໜີແນະ ແລະ ມຸມມອງໃໝ່ໆທີ່ມີຄຸນຄ່າ ເພື່ອຮັບໃຊ້ວຽກງານການຄົ້ນຄວ້າ, ການຮຽນ-ການສອນ ແລະ ການວາງນະໂຍບາຍໃນອະນາຄົດ.
 |
ທ່ານ ນາງ ເບັນນິຕາ ຊໍາເມີວິວ ກ່າວວ່າ: ການສຳມະນາໃນຄັ້ງນີ້ ກໍແມ່ນອີກຕົວຢ່າງໜຶ່ງຂອງການຮ່ວມມືທີ່ນັບມື້ນັບເລິກເຊິ່ງ. ໄດ້ຈັດຂຶ້ນໃນໄລຍະເວລາທີ່ມີການປ່ຽນແປງທີ່ສຳຄັນໃນສະພາບການຂອງພາກພື້ນ ແລະ ຂອງໂລກ. ປະຕິກິລິຍາລະຫວ່າງ ພູມສາດການເມືອງ ແລະ ພູມສາດເສດຖະກິດ ພວມມີຄວາມຊັດເຈນຫຼາຍຂຶ້ນ ຊຶ່ງສົ່ງຜົນກະທົບຕໍ່ຄວາມໝັ້ນຄົງ, ການພັດທະນາ ແລະ ຄວາມຈະເລີນຮຸ່ງເຮືອງໃນທົ່ວພາກພື້ນຂອງພວກເຮົາ, ສຳລັບປະເທດຂະໜາດນ້ອຍຫາຂະໜາດກາງ ຄືກັບປະເທດລາວ ແລະ ອົສຕຣາລີ, ການປ່ຽນແປງເຫຼົ່ານີ້ໄດ້ນຳມາຊຶ່ງສິ່ງທ້າທາຍ ແລະ ກາລະໂອກາດ. ການຮັບມືກັບການແຂ່ງຂັນທາງດ້ານຍຸດທະສາດ, ການຮັກສາສະຖຽນລະພາບ ແລະ ການຊຸກຍູ້ບຸລິມະສິດການພັດທະນາແຫ່ງຊາດ ແມ່ນຮຽກຮ້ອງໃຫ້ມີການດຸ່ນດ່ຽງຢ່າງລະມັດລະວັງ, ການສ້າງນະໂຍບາຍທີ່ມີຂໍ້ມູນຄົບຖ້ວນ ແລະ ການຮ່ວມມືໃນພາກພື້ນທີ່ເຂັ້ມແຂງ, ການສຳມະນາຄັ້ງນີ້ແມ່ນພາກສ່ວນໜຶ່ງທີ່ສຳຄັນໃນການເປັນຄູ່ຮ່ວມມືຂອງພວກເຮົາ ຊຶ່ງມັນໄດ້ຊ່ວຍສົ່ງເສີມການສົນທະນາແບບເປີດກວ້າງ ແລະ ສ້າງຄວາມເຂັ້ມແຂງໃຫ້ແກ່ການເຊື່ອມໂຍງລະຫວ່າງສະຖາບັນ; ອົສຕຣາລີ ມີຄວາມພາກພູມໃຈທີ່ໄດ້ສະໜັບສະໜູນການສົນທະນາ, ການແລກປ່ຽນຄວາມຮູ້ ແລະ ຄວາມພະຍາຍາມຂອງປະເທດລາວ ໃນການມີສ່ວນຮ່ວມຢ່າງໝັ້ນໃຈກັບການພັດທະນາໃນລະດັບພາກພື້ນ ແລະ ລະດັບໂລກ. ພວກເຮົາເຫັນຄຸນຄ່າຢ່າງຫຼວງຫຼາຍໃນການນຳເອົາບັນດາຜູ້ສ້າງນະໂຍບາຍ, ນັກວິຊາການ ແລະ ຜູ້ປະຕິບັດງານ ມາຮ່ວມກັນເພື່ອແບ່ງປັນທັດສະນະ, ສ້າງຄວາມເຂົ້າໃຈໃຫ້ເລິກເຊິ່ງກວ່າເກົ່າ ແລະ ຄົ້ນຫາວິທີການຕອບສະໜອງຕົວຈິງ ຕໍ່ກັບການປ່ຽນແປງທາງດ້ານຍຸດທະສາດໃໝ່ໆທີ່ເກີດຂຶ້ນ.
 |
(ຂ່າວ-ພາບ: ສຳນານ)
ຄໍາເຫັນ