 |
ທ່ານ ສົມພອນ ສອນດາລາ ຫົວໜ້າພະແນກສຶກສາທິການ ແລະ ກິລາ ໄດ້ລາຍງານຄວາມຄືບໜ້າການປະຕິ ບັດໜ້າວຽກ ໃນການຈັດງານມະຫະກຳກິລາແຫ່ງຊາດ ຄັ້ງທີ XII ໄລຍະທີ 1 ແລະ ແຜນໄລຍະທີ 2 ຕໍ່ກອງປະຊຸມວ່າ: ວຽກທີ່ເຮັດໄດ້ ແລະ ສໍາເລັດແມ່ນຈັດຝຶກອົບຮົມເພື່ອແນະນໍາກໍາມະການຕ່າງໆໃນການສ້າງແຜນດໍາເນີນງານຂອງຕົນ, ສໍາເລັດການແຂ່ງຂັນອອກແບບສັນຍາລັກ ແລະ ສັດນໍາໂຊກ, ລົງກວດກາ ແລະ ເກັບກຳຂໍ້ມູນສະຖານທີ່ແຂ່ງຂັນກິລາ, ສະຖານທີ່ພັກສໍາລັບການນໍາ ແລະ ຂະບວນນັກກິລາທີ່ຈະເຂົ້າຮ່ວມແຂ່ງຂັນ, ກຳນົດຮູບແບບລາຍການສະແດງ ແລະ ວາລະພິທີເປີດ-ປິດ, ກຳນົດລາຍການວັນ-ເວລາແຂ່ງຂັນ ແລະ ແຈ້ງການຫາບັນດາແຂວງ ແລະ ກະຊວງໃຫ້ລົງທະບຽນປະເພດກິລາ ແລະ ຈໍານວນຜູ້ເຂົ້າຮ່ວມແຂ່ງຂັນ.
ສ່ວນວຽກທີ່ຕ້ອງສືບຕໍ່ ແມ່ນປັບປຸງ ແລະ ສ້ອມແປງສະໜາມແຂ່ງຂັນ, ຕັ້ງສູນອອກບັດໃຫ້ແຕ່ລະພາກສ່ວນ ລົງຕິດຕາມ ແລະ ກວດກາຄວາມພ້ອມສະຖານທີ່ພັກນັກກິລາ ແລະ ສະຖານທີ່ແຂ່ງຂັນແຕ່ລະປະເພດ, ຕິດຕາມການຮັບສະໝັກ, ສົ່ງລາຍຊື່ນັກກິລາແຕ່ລະປະເພດກິລາ ພ້ອມທັງຂຶ້ນແຜນງົບປະມານຂອງແຕ່ລະກຳມະການໃຫ້ສໍາເລັດໃນເດືອນສິງຫາ 2025 ນີ້, ການລົງທະບຽນຂອງການນໍາຂັ້ນແຂວງ ແລະ ຄະນະນັກກິລາຂອງແຕ່ລະພາກສ່ວນ, ສ້າງແຜນຕິດຕາມການເຄື່ອນໄຫວຈັດຕັ້ງປະຕິບັດໜ້າວຽກຂອງແຕ່ລະກຳມະການ, ອອກແຈ້ງການ, ລະບຽບການໂຄສະນາ ການຕິດຕັ້ງປ້າຍ, ງານມະຫະກຳກິລາແຫ່ງຊາດ ຄັ້ງທີ XII, ສືບຕໍ່ປັບປຸງລາຍການສະແດງພິທີເປີດ-ປິດ ແລະ ກຳມະ ການຝ່າຍຕ່າງໆ, ສືບຕໍ່ຈັດຕັ້ງປະຕິບັດຕາມແຜນດໍາເນີນງານຂອງຕົນ. ຈາກນັ້ນ, ຍັງໄດ້ຮັບຟັງການນໍາສະເໜີເພີ່ມຕື່ມ ຈາກກຳມະການສິດທິປະໂຫຍດ ແລະ ລະດົມທຶນ, ກຳມະການເຕັກນິກ-ຈັດການແຂ່ງຂັນ, ກຳມະການພິທີການເປີດ-ປິດ, ກໍາມະການປັບປຸງ ແລະ ສ້ອມແປງສະໜາມກິລາ, ກຳມະການທີ່ພັກ ແລະ ອາຫານ, ກຳມະການ ການແພດ ແລະ ສຸຂະພາບ, ກຳມະການປ້ອງກັນຊາດ-ປ້ອງກັນຄວາມສະຫງົບ ແລະ ກຳມະການໂຄສະນາ ແລະ ຂ່າວສານ ກອງປະຊຸມຍັງໄດ້ຕົກລົງຮັບຮອງເອົາຄໍາຂວັນ, ໂລໂກ້ ແລະ ມາສຄັອດຂອງງານມະຫະກຳກິລາແຫ່ງຊາດ ຄັ້ງທີ XII.
ໂອກາດນີ້, ທ່ານ ອາດສະພັງທອງ ສີພັນດອນ ຮຽກຮ້ອງມາຍັງກໍາມະການຝ່າຍຕ່າງໆໃຫ້ກະກຽມແຜນດໍາເນີນງານຂອງຕົນ ໂດຍສະເພາະແມ່ນຄະນະຮັບຜິດຊອບປັບປຸງ ແລະ ສ້ອມແປງສະໜາມ, ກຳມະການເສດຖະກິດ ແລະ ລະດົມທຶນ, ກຳມະການພິທີການເປີດ-ປິດ ແລະ ກຳມະການກອງເລຂາທີ່ເປັນຜູ້ສັງລວມ ແລະ ຊຸກຍູ້ກຳມະການຝ່າຍຕ່າງໆ ຊຶ່ງພວກເຮົາຈະຕ້ອງໄດ້ຄົ້ນຄວ້າ ແລະ ຊອກຫາວິທີທາງໃນການປະຕິບັດວຽກງານດັ່ງກ່າວໃຫ້ບັນລຸຕາມຈຸດ ປະສົງລະດັບຄາດໝາຍທີ່ວາງໄວ້.
ຂ່າວ: ວຽງຈັນໃໝ່
ຄໍາເຫັນ