ຂຸນກອງແລງແຫຼ່ງທ່ອງທ່ຽວແບບອະນຸລັກທຳມະຊາດ ກຽມພ້ອມຕ້ອນຮັບປີທ່ອງທ່ຽວລາວ 2024

ຂຸນກອງແລງແຫຼ່ງທ່ອງທ່ຽວແບບອະນຸລັກທຳມະຊາດ ກຽມພ້ອມເປີດໃຫ້ບໍລິການຕ້ອນຮັບປີທ່ອງທ່ຽວ ລາວ 2024 ທີ່ຈະມາເຖິງນີ້, ຂຸນກອງແລງຕັ້ງຢູ່ບ້ານນາຄື ເມືອງຫີນບູນ ແຂວງຄໍາມ່ວນ ເມື່ອເດີນທາງອອກ ຈາກເທສະບານແຂວງຄຳມ່ວນ ແລ້ວໄປຕາມເສັ້ນທາງເລກທີ 13 ໃຕ້ຂຶ້ນໄປທາງນະຄອນຫຼວງວຽງຈັນ ຮອດ ບ້ານຫ້ວຍແອກ (ໄລຍະທາງເລີ່ມຈາກທ່າແຂກຮອດບ້ານຫ້ວຍແອກປະມານ 35 ກິໂລແມັດ) ແລ້ວລ້ຽວຂວາເຂົ້າ ໄປຫາຂຸນກອງແລງປະມານ 20 ກິໂລແມັດ (ລວມໄລຍະທາງແຕ່ທ່າແຂກຫາຂຸນກອງແລງປະມານ 55 ກິໂລ ແມັດ) ຊຶ່ງເປັນແຫຼ່ງທ່ອງທ່ຽວແບບອະນຸລັກທຳມະຊາດຍືນຍົງ ແລະ ສີຂຽວ ໂດຍການມີສ່ວນຮ່ວມຂອງປະຊາ ຊົນ ໄດ້ຮັບການສຳປະທານ ແລະ ພັດທະນາໂດຍບໍລິສັດອິນທຣາໂຄໂປເຣຊັ່ນ ຈຳກັດຜູ້ດຽວ ຊຶ່ງລວມມີຫຼາຍ ກິດຈະກຳການທ່ອງທ່ຽວໂດຍສະເພາະໂຮງແຮມ, ລີສອດ, ຮ້ານອາຫານ, ສູນບໍລິການທ່ອງທ່ຽວ, ມີກິດຈະກຳ ທີ່ຕິດພັນກັບທຳມະຊາດ (Green Adventures), ສູນສົ່ງເສີມ ແລະ ພັດທະນາການຜະລິດສິນຄ້າ, ສູນຈຳ ໜ່າຍສິນຄ້າຂອງທີ່ລະນຶກຈາກສີມືຂອງພໍ່ແມ່ປະຊາຊົນ (ODOP) ແລະ ອື່ນໆ. 
    ທ່ານ ພັນທະຈິດ ອິນທິລາດ ປະທານບໍລິສັດອິນທຣາໂຄໂປເຣຊັ່ນຈຳກັດຜູ້ດຽວ ໄດ້ໃຫ້ສຳພາດກ່ຽວກັບ  ຄວາມເປັນມາ ແລະ ຄວາມຄືບໜ້າຂອງໂຄງການຕໍ່ສື່ມວນຊົນເມື່ອບໍ່ດົນມານີ້ວ່າ: ຍ້ອນຄວາມມັກຮັກໃນທຳມະ ຊາດ, ມັກການທ່ອງທ່ຽວແບບພະຈົນໄພ, ຍ້ອນເຫັນໄດ້ສັກກະຍະພາບຂອງແຂວງຄຳມ່ວນ ກໍຄືເມືອງຫີນບູນ ໂດຍສະເພາະແມ່ນຂຸນກອງແລງທີ່ມີຊື່ສຽງໂດ່ງດັງມາໄດ້ຫຼາຍສິບປີ ແຕ່ຍັງບໍ່ໄດ້ຮັບການພັດທະນາທາງບໍລິສັດ ຈຶ່ງໄດ້ປຶກສາຫາລືກັບການນຳຂອງແຂວງ, ເມືອງ ແລະ ໄດ້ຂໍອະນຸຍາດສຶກສາສຳຫຼວດຄວາມເປັນໄປໄດ້ ເພື່ອ ພັດທະນາ ພ້ອມທັງສຶກສາຜົນກະທົບຕໍ່ສິ່ງແວດລ້ອມໃນປີ 2018 ໂດຍໃຊ້ເວລາສຶກສາສຳຫຼວດເກືອບ 1 ປີ  ແລະ ໄດ້ຮັບການອະນຸມັດເຊັນສັນຍາສຳປະທານໃນປີ 2019 ຈາກນັ້ນໄດ້ເລີ່ມລົງມືບຸກເບີກ, ກໍ່ສ້າງພື້ນຖານ ໂຄງລ່າງເປັນຕົ້ນ ການກໍ່ສ້າງຕາຝັາງເຈື່ອນ, ປູກປ່າຄືນໃໝ່, ດັດປັບທັດສະນິຍະພາບ, ສ້າງສິ່ງອຳນວຍຄວາມ ສະດວກ, ທີ່ພັກອາໃສ ໃຊ້ເວລາພັດທະນາມາໄດ້ປີກວ່າໆ ກໍປະສົບບັນຫາການແຜ່ລະບາດຂອງພະຍາດໂຄວິດ-19 ບໍ່ສາມາດດຳເນີນຕໍ່ໄປໄດ້. ພາຍຫຼັງຜ່ານວິກິດການດັ່ງກ່າວແລ້ວ ຈຶ່ງໄດ້ກັບມາພັດທະນາໂຄງການຕໍ່ ແລະ ໄດ້ປັບປຸງກິດຈະການຕ່າງໆໃຫ້ສົມບູນ ບໍ່ວ່າຈະເປັນກິດຈະກຳທີ່ຕິດພັນກັບທຳມະຊາດ ແລະ ແບບພະຈົນໄພ ເປັນຕົ້ນ ສູນບໍລິການນັກທ່ອງທ່ຽວ (Clup House), ບ່ອນຈອດລົດ, ລີສອດ (ເຮືອນແຄັບຊູນແບບທັນສະໄໝ, ເຮືອນໄມ້ໄຜ່, ເຮືອນຊົງລາວ), ສວນອາຫານ, ຮ້ານຂາຍເຄື່ອງຂອງທີ່ລະນຶກ, ຖະໜົນຄົນຍ່າງ, ເຮືອນພັກຕາກ ອາກາດ, ສູນຮັກສາສຸຂະພາບ, ສວນນໍ້າ, ຈຸດຊົມວິວ, ພາຍເຮືອກາຍັກ, ຂີ່ລົດ ATV, ຊິບລາຍ, ປີນຜາ ແລະ ອື່ນໆ. ມາຮອດປັດຈຸບັນໂຄງການແມ່ນມີຄວາມຄືບໜ້າປະມານ 70-80% ແລະ ຄາດວ່າຈະເປີດໃຫ້ບໍລິການ ກ່ອນປີໃໝ່ລາວ 2024 ເພື່ອຕ້ອນຮັບນັກທ່ອງທ່ຽວທັງພາຍໃນ ແລະ ຕ່າງປະເທດທີ່ເຂົ້າມາທັງແບບເປັນກຣູບ ທົວ ແລະ ນັກທ່ອງທ່ຽວທົ່ວໄປ ຊຶ່ງຈະມີການບໍລິການນັກທ່ອງທ່ຽວທີ່ມາພັກພາອາໃສ, ສຳຜັດກັບທຳມະຊາດທີ່ ມີຄວາມສົດຊື່ນ ແລະ ຄວາມສວຍງາມຂອງພູຫີນປູນລວມມີຫຼາຍກວ່າ 30 ກິດຈະກຳ ທີ່ຕິດພັນກັບການທ່ອງ ທ່ຽວແບບອະນຸລັກປົກປັກຮັກສາທຳມະຊາດໂດຍປະຊາຊົນມີສ່ວນຮ່ວມ, ປະຊາຊົນຈະເປັນຜູ້ໃຫ້ບໍລິການ. ນອກນີ້ ກໍຈະໄດ້ຊຸກຍູ້ ແລະ ສົ່ງເສີມໃຫ້ພໍ່ແມ່ປະຊາຊົນມີການຮ່ວມມື ເພື່ອຮັບປະກັນດ້ານການຜະລິດສະບຽງອາຫານ ພືດ, ຜັກ, ຊີ້ນ, ປາ ແລະ ຜະລິດຕະພັນຕ່າງໆ ເພື່ອສະໜອງໃຫ້ແກ່ໂຄງການ ແລະ ຮ່ວມກັນພັດທະນາ ສິນຄ້າເພື່ອຈຳໜ່າຍໃຫ້ແກ່ນັກທ່ອງທ່ຽວ. 
    ທ່ານ ພັນທະຈິດ ອິນທິລາດ ກ່າວຕື່ມວ່າ: ໃນເຂດໂຄງການແຫຼ່ງທ່ອງທ່ຽວຂຸນກອງແລງລວມມີທີ່ພັກ ທັງແບບທັນສະໄໝ ແລະ ແບບເຮືອນຊົງລາວຈຳນວນ 100 ກວ່າຫ້ອງ, ສາມາດຮອງຮັບນັກທ່ອງທ່ຽວທີ່ເຂົ້າ ມາພັກຄ້າງຄືນໄດ້ປະມານ 200 ກວ່າຄົນຕໍ່ຄືນ. ນອກນີ້ຍັງມີກິດຈະກຳທີ່ຫຼາກຫຼາຍ, ມີສະຖານທີ່ກວ້າງຂວາງ ສາມາດຮັບນັກທ່ອງທ່ຽວທີ່ເຂົ້າມາທ່ຽວຊົມໄດ້ບໍ່ຕໍ່າກວ່າ 1.000 ຄົນຕໍ່ວັນ. ຄຽງຄູ່ກັບການຕ້ອນຮັບແຂກທີ່ເຂົ້າມາ ທ່ຽວຊົມແລ້ວ ທາງໂຄງການຍັງມີຄວາມຕ້ອງການພະນັກງານທີ່ຈະເຂົ້າມາເຮັດວຽກບໍລິການປະມານ 100-200 ຄົນ ໂດຍຈະເນັ້ນໃຫ້ລູກຫຼານພໍ່ແມ່ປະຊາຊົນໃນເຂດໃກ້ຄຽງ ໄດ້ເຂົ້າມາປະກອບສ່ວນເພື່ອສ້າງວຽກເຮັດງານທຳ, ມີລາຍຮັບທີ່ໝັ້ນຄົງ ໂດຍທາງໂຄງການຈະມີການຝຶກອົບຮົມດ້ານການບໍລິການຕ່າງໆເພື່ອສ້າງຄວາມສາມາດ ແລະ ຮ່ວມກັນເປັນເຈົ້າພາບທີ່ດີໃນການຕ້ອນຮັບນັກທ່ອງທ່ຽວ.
ໃນໂອກາດນີ້, ທ່ານປະທານບໍລິສັດອິນທຣາໂຄໂປເຣຊັ່ນ ຍັງໄດ້ສະເໜີຕໍ່ການຈັດຕັ້ງຂັ້ນເທິງຊ່ວຍຄົ້ນ ຄວ້າກ່ຽວກັບບັນຫານິຕິກຳ ແລະ ການອະນຸຍາດນໍາໃຊ້ທີ່ດິນໃນເຂດສຳປະທານທີ່ຍັງເປັນບັນຫາຢູ່ໃນປັດຈຸບັນ ເພື່ອຮັບປະກັນເຮັດໃຫ້ແຫຼ່ງທ່ອງທ່ຽວຂຸນກອງແລງ ໄດ້ມີເງື່ອນໄຂເປີດໃຫ້ບໍລິການແກ່ນັກທ່ອງທ່ຽວທັນຕາມກຳ ນົດເວລາ ແລະ ຕາມເປົ້າໝາຍທີ່ແຂວງໄດ້ກຳນົດໃຫ້ເປັນແຫຼ່ງທ່ອງທ່ຽວເປີດໃໝ່ ເພື່ອຮອງຮັບໃຫ້ແກ່ການເປີດ ປີທ່ອງທ່ຽວລາວ 2024. ພ້ອມນີ້ຂໍເຊີນຊວນນັກທ່ອງທ່ຽວທັງພາຍໃນ ແລະ ຕ່າງປະເທດໃຫ້ເຂົ້າມາທ່ຽວຊົມ ສຳຜັດກັບຄວາມສວຍງາມຂອງທຳມະຊາດ ແລະ ຮັບຮູ້ເຖິງການພັດທະນາ, ການໃຫ້ບໍລິການໂດຍປະຊາຊົນມີ ສ່ວນຮ່ວມເພື່ອຄວາມຍືນຍົງ.
ຂ່າວ-ພາບ: ກອງຄຳ