ຄູປະຖົມທົ່ວເມືອງວຽງຄໍາ ໄດ້ຮັບການຍົກລະດັບການນໍາໃຊ້ອຸປະກອນຊ່ວຍເຫຼືອຄູ

ຊຸດອົບຮົມຄັ້ງນີ້, ຜູ້ເຂົ້າຮ່ວມໄດ້ຮັບຟັງການແນະນຳ ການນຳໃຊ້ປຶ້ມຄູ່ມືຄູ ແລະ ປຶ້ມແບບຮຽນ ໂດຍສະເພາະ ຜູ້ເຮັດວຽກນິເທດພາຍໃນ ກຽມບົດສອນ ຫຼື ແຜນລົງນິເທດຄູ ກ່ຽວກັບການນຳໃຊ້ແບບຮຽນ ແລະ ຄູ່ມືຄູ (ຂຽນຂັ້ນຕອນ ຫຼື ແຕ່ງບົດສອນແບບງ່າຍດາຍ), ການສອນແບບເອົານັກຮຽນເປັນໃຈກາງ ແລະ ຝຶກປະຕິບັດການເຮັດວຽກນິເທດພາຍໃນ, ການນໍາໃຊ້ 7 ຂັ້ນຕອນການຮຽນສຽງ ແລະ ຂຽນຕົວອັກສອນ ຫຼື ຄໍາສັບໃນພາສາລາວຂັ້ນ ປ1, ການສຶກສາຮໍ່າຮຽນ ແລະ ການຊ່ວຍເຫຼືອນັກຮຽນຊົນເຜົ່າ, ການເສີມສ້າງຄວາມໝັ້ນໃຈໃນການສອນພາສາອັງກິດ, ການສອນທີ່ຄໍານຶງເຖິງບົດບາດຍິງ-ຊາຍ, ການປະເມີນເພື່ອປັບປຸງການຮຽນ ແລະ ການປະເມີນເພື່ອສະຫຼຸບຜົນການຮຽນ. ນອກຈາກນີ້, ໄດ້ຮຽນຮູ້ເຖິງພາບລວມ, ຄວາມຈໍາເປັນໃນການສອນຫ້ອງຄວບ ແລະ ຫຼັກການສອນຫ້ອງຄວບທີ່ມີປະສິດທິພາບ, ການດັດປັບກິດຈະກຳ ກິດຈະກຳເອກະລາດ ແລະ ກິດຈະກຳຄູນໍາພາ, ການແຕ່ງບົດສອນຫ້ອງຄວບ, ເຕັກນິກການສອນຫ້ອງຄວບ, ການສອນຫ້ອງຄວບ ແລະ ການສຶກສາຮຽນຮ່ວມ, ການແຕ່ງບົດສອນ ແລະ ການສອນຫ້ອງຄວບ 3 ຂັ້ນຮຽນ.

ຈາກນັ້ນໄດ້ສອນທົດລອງພາຍໃນກຸ່ມ ແລະ ລົງສອນຕົວຈິງ ຊຸດອົບຮົມຈະດຳເນີນໄປເປັນເວລາ 10 ວັນຈຶ່ງສຳເລັດ. ຮຽກຮ້ອງໃຫ້ຄະນະຮັບຜິດຊອບບັນດາຄູຝຶກ ແລະ ຄູເຂົ້າຮ່ວມອົບຮົມ ຈົ່ງໄດ້ພ້ອມກັນເພີ່ມທະວີຄວາມຮັບຜິດຊອບສູງດ້ວຍການຕັ້ງໃຈຮຽນຮູ້, ແລກປ່ຽນບົດຮຽນ ແລະ ປະສົບການຮ່ວມກັນ ພ້ອມທັງເຂົ້າຮ່ວມການຝຶກອົບຮົມໃຫ້ສຳເລັດ, ທັງສືບຕໍ່ນໍາເອົາເນື້ອໃນ ແລະ ບົດຮຽນອັນລໍ້າຄ່ານີ້ ໄປຈັດຕັ້ງປະຕິບັດຜັນຂະຫຍາຍຢູ່ໃນໂຮງຮຽນ ກໍຄືຄວາມຮັບຜິດຊອບຂອງຕົນໃຫ້ນັບມື້ມີຄຸນນະພາບສູງຂຶ້ນໄປເລື້ອຍໆ. ຂ່າວ: ທອງຄຸນ ກາວຽງທອງ; ພາບ: ສອນອາຄົມ ແກ້ວຄຳເພັດ