 |
ການປາຖະກະຖາໃນຄັ້ງນີ້ ເພື່ອເປັນການເຊື່ອມຊຶມ, ສຶກສາອົບຮົມ ໃຫ້ແກ່ພະນັກງານພາຍໃນ ຄຕພ ຮັບຮູ້, ເຂົ້າໃຈເຖິງປະຫວັດສາດສໍາຄັນ ຂອງຊາດ, ພ້ອມກັນເສີມຂະຫຍາຍມູນເຊື້ອອັນດີງາມ ຂອງບັນພະບູລຸດ, ຕັ້ງໜ້າຝຶກຝົນຫຼໍ່ຫຼອມຕົນເອງໃຫ້ມີຄຸນທາດການເມືອງໜັກແໜ້ນ, ມີຄຸນສົມບັດສິນທໍາປະຕິວັດ, ພ້ອມກັນເຮັດສຳເລັດທຸກໜ້າທີ່ການເມືອງທີ່ໄດ້ຮັບມອບໝາຍ.
ໃນພິທີ, ສະຫາຍ ລາວປາວຊົ່ງ ນະວົງໄຊ ໄດ້ຍົກໃຫ້ເຫັນການກຳເນີດ ແລະ ການເຕີບໃຫຍ່ຂະຫຍາຍຕົວຂອງແນວລາວສ້າງຊາດ ຊຶ່ງແມ່ນອົງການທີ່ສືບທອດມູນເຊື້ອອັນສະຫງ່າງາມ ຂອງແນວລາວອິດສະຫຼະ ແລະ ແນວລາວຮັກຊາດ ໃນເມື່ອກ່ອນ, ກອງປະຊຸມໃຫຍ່ຄັ້ງທີ I ຂອງແນວລາວອິດສະຫຼະ ໄດ້ເປີດຂຶ້ນວັນທີ 13 ສິງຫາ 1950 ໄດ້ຮັບຮອງມະຕິສໍາຄັນຄື: ມະຕິວ່າດ້ວຍສ້າງລັດຖະບານລາວຕໍ່ຕ້ານ, ໂຄງການການເມືອງ 12 ຂໍ້, ຊື່ຂອງປະເທດ, ເພງຊາດ ແລະ ກາໝາຍຊາດ, ມະຕິຕົກລົງສ້າງຕັ້ງໜັງສືພິມລາວອິດສະຫຼະ ແລະ ການນໍາພາປຸກລະດົມຂະບວນການຕໍ່ສູ້ຕ້ານພວກລ່າເມືອງຂຶ້ນຢ່າງດຸເດືອດ ແລະ ສາມາດຍາດໄດ້ໄຊນະນະໃນປີ 1954. ຫຼັງຈາກນັ້ນ ປີ 1956 ໄດ້ປ່ຽນຊື່ແນວລາວອິດສະຫຼະ ມາເປັນ ແນວລາວຮັກຊາດ ເພື່ອສືບຕໍ່ເປັນຄັນທຸງເຕົ້າໂຮມຄວາມສາມັກຄີປະຊາຊົນລາວບັນ ດາເຜົ່າ ຮ່ວມສຳພັນກັບ ບັນດາກຳລັງການເມືອງທີ່ມີທ່າອ່ຽງຮັກຊາດ, ໄດ້ຂະຫຍາຍສາຍສຳພັນກັບກອງທັບ ແລະ ປະຊາຊົນ 3 ຊາດອິນດູຈີນອ້າຍນ້ອງ, ຕໍ່ສູ້ຕ້ານຈັກກະພັດລ່າເມືອງຂຶ້ນ ແລະ ພາລະ ກິດອື່ນໆ, ຊຶ່ງໄດ້ຮັບໄຊຊະນະແຕ່ນ້ອຍຫາໃຫຍ່ ເປັນກ້າວໆ. ໄລຍະປີ 1979 ເຖິງປັດຈຸບັນ ໄດ້ປ່ຽນຊື່ຈາກແນວລາວຮັກຊາດ ມາເປັນແນວລາວສ້າງຊາດ ເພື່ອແນໃສ່ ເຕົ້າໂຮມຄວາມສາມັກຄີ ຂອງປະຊາຊົນບັນດາເຜົ່າທຸກຊັ້ນຄົນ, ສາດສະໜາ ແລະ ເພດໄວ, ນັບທັງຄົນເຊື້ອຊາດລາວທີ່ດຳລົງຊີວິດຢູ່ຕ່າງປະເທດ ໃຕ້ຮົ່ມທຸງປະຕິວັດ ຂອງພັກປະຊາຊົນປະຕິວັດລາວ, ພ້ອມດຽວກັນນັ້ນ, ແນວລາວສ້າງຊາດ ຍັງໄດ້ຢຶດໝັ້ນພັນທະພາບ ກັບກຳມະກອນ, ຊາວກະສິກອນ, ນັກຮຽນຮູ້ປັນຍາຊົນ ແລະ ຊັ້ນຄົນທີ່ກ້າວໜ້າ, ເດັດດ່ຽວໜຽວແໜ້ນ, ສຶກສາອົບຮົມປະຊາຊົນ ດ້ວຍການໝູນໃຊ້ຫຼັກການອັນຖືກຕ້ອງຂອງພັກ ເຮັດໃຫ້ຂະບວນການປະຕິວັດ ນັບມື້ເຕີບໃຫຍ່ເຂັ້ມແຂງຂຶ້ນຢ່າງບໍ່ຢຸດຢັ້ງ. ນອກນີ້, ແນວລາວສ້າງຊາດ ຍັງມີມູນເຊື້ອເປັນທີ່ປຶກສາແນະນໍາ ແລະ ເປັນບ່ອນໃຫ້ປະຊາຊົນໄດ້ເພິ່ງພາ, ເຮັດບົດບາດ ເປັນຂົວຕໍ່ທີ່ດີ ລະຫວ່າງພັກ-ລັດ ກັບປະຊາຊົນ ເປັນພື້ນຖານການເມືອງ ຂອງອໍານາດປະຊາທິປະໄຕປະຊາຊົນ.
(ຂ່າວ: ແສງຈັນ)
ຄໍາເຫັນ