ວັນທີ 18 ພະຈິກ 2025 ທີ່ສະໜາມກິລາໂອແລມປາເຊຍ ໄດ້ມີພິທີມອບ-ຮັບຫຼຽນລາງວັນປະເພດກິລາກະຕໍ້ທີມຊຸດຄູ່ຍິງ-ຊາຍ ແລະ ທີມ 4 ຄົນຍິງ-ຊາຍ ໂດຍໃຫ້ເຂົ້າຮ່ວມ ແລະ ມອບຫຼຽນລາງວັນໂດຍ ທ່ານ ອາດສະພັງທອງ ສີພັນດອນ ເຈົ້າຄອງນະຄອນຫຼວງວຽງຈັນ ທັງເປັນປະທານຈັດງານມະຫະກຳກິລາແຫ່ງຊາດ ຄັ້ງທີ XII, ທ່ານ ພັນໂທ ສົມຈິດ ສຸລິວົງສັກ ຄະນະພັກກົມອົບຮົມກົມໃຫຍ່ເສນາທິການກອງທັບ, ທ່ານ ໄພວັນ ແກ້ວປະເສີດ ຮອງລັດຖະມົນຕີ ກະຊວງສາທາລະນະສຸກ ແລະ ທ່ານ ນາງ ບົວວອນ ສຸກລາແສງ ຫົວໜ້າພະແນກການເງິນ ນະຄອນຫຼວງວຽງຈັນ, ມີຄະນະນຳ, ຄູຝຶກ ແລະ ນັກກິລາ ຢ່າງພ້ອມພຽງ.
ການແຂ່ງຂັນກິລາກະຕໍ້ ລາຍການ ທີມຊຸດຄູ່ຍິງ-ຊາຍ ແລະ ທີມ 4 ຄົນຍິງ-ຊາຍ ໄດ້ແຂ່ງຂັນລະຫວ່າງວັນທີ 17-18 ພະຈິກ 2025. ຜ່ານການແຂ່ງຂັນຜົນປະກົດວ່າ ປະເພດທີມຊຸດຄູ່ຊາຍ ຫຼຽນຄຳ ແຂວງຈຳປາສັກ, ຫຼຽນເງິນ ແຂວງສະຫວັນນະເຂດ ແລະ ຫຼຽນທອງຮ່ວມ ກະຊວງປ້ອງກັນປະເທດ ແລະ ກະຊວງປ້ອງກັນຄວາມສະຫງົບ; ປະເພດທີມຊຸດຄູ່ຍິງ ຫຼຽນຄຳ ກະຊວງປ້ອງກັນປະເທດ, ຫຼຽນເງິນ ແຂວງຈຳປາສັກ ແລະ ຫຼຽນທອງຮ່ວມ ແຂວງຄຳມ່ວນ ແລະ ແຂວງບໍລິຄຳໄຊ.
ສ່ວນປະເພດທີມຊາຍ 4 ຄົນ ຫຼຽນຄຳ ກະຊວງປ້ອງກັນຄວາມສະຫງົບ, ຫຼຽນເງິນ ນະຄອນຫຼວງວຽງຈັນ ເຈົ້າພາບ ແລະ ຫຼຽນທອງ ຮ່ວມແຂວງຄຳມ່ວນ ແລະ ແຂວງຫຼວງພະບາງ; ປະເພດທີມຍິງ 4 ຄົນ ຫຼຽນຄຳ ກະຊວງປ້ອງ ກັນປະເທດ, ຫຼຽນເງິນ ແຂວງຈຳປາສັກ, ຫຼຽນທອງຮ່ວມ ນະຄອນຫຼວງວຽງຈັນ ແລະ ແຂວງບໍລິຄຳໄຊ.
ສັງລວມແລ້ວໃນ 2 ວັນຜ່ານມາ ທີມນັກກິລາກະຕ້ໍກະຊວງປ້ອງກັນປະເທດ ຍາມາດໄດ້ 2 ຫຼຽນຄຳ ແລະ 2 ຫຼຽນທອງ ເປັນອັນດັບທີ 1 ຈາກ 4 ລາຍການ ,ທີ 2 ແຂວງຈຳປາສັກ ຍາດໄດ້ 1 ຫຼຽນຄຳ ແລະ 2 ຫຼຽນເງິນ; ທີ 3 ກະຊວງປ້ອງກັນຄວາມສະຫງົບ ຍາດໄດ້ 1 ຫຼຽນຄຳ ແລະ 1 ຫຼຽນທອງ. ຂະນະທີ່ນະຄອນຫຼວງວຽງຈັນ ເຈົ້າພາບ ຍາດໄດ້ 1 ຫຼຽນເງິນ ແລະ 1 ຫຼຽນທອງ.ຂ່າວ-ພາບ: ລູກນໍ້າເຊ
ຄໍາເຫັນ