ກິລາຕີຄີ ທີມປະຊາຊົນຊະນະທີມພະນັກງານ ໃນບຸນນະມັດສະການພະທາດຫຼວງວຽງຈັນ

ການແຂ່ງຂັນກິລາຕີຄີ ໄດ້ຈັດໃຫ້ມີໃນມື້ເພັງ 15 ຄໍ່າ ພາຍຫຼັງໃສ່ບາດແລ້ວ. ສຳລັບປີນີ້ ການແຂ່ງຂັນກິລາຕີຄີໃນງານບຸນນະມັດສະການພະທາດຫຼວງວຽງຈັນ ແມ່ນຈັດຂຶ້ນໃນວັນທີ 5 ພະຈິກ 2025 ເວລາ 13:00 ໂມງ ທີ່ເດີ່ນພະທາດຫຼວງວຽງຈັນ ໂດຍການເຂົ້າຮ່ວມຂອງ ທ່ານ ພູວົງ ວົງຄໍາຊາວ ຮອງເຈົ້າຄອງນະຄອນຫຼວງວຽງຈັນ, ພ້ອມດ້ວຍການນໍາພັກ-ລັດ, ແຂກຖືກເຊີນ ແລະ ມວນຊົນທັງພາຍໃນ ແລະ ຕ່າງປະເທດເຂົ້າຮ່ວມ. ສໍາລັບນັກກິລາຕີຄີທີມພະນັກງານ ຫຼື ທີມຂະລາຊະການແມ່ນພາກສ່ວນທີ່ມາຈາກເມືອງໄຊເສດຖາ ຊຶ່ງມີຈໍານວນທີ່ຕ້ອງລົງຕີຄີ ເບື້ອງລະ 60 ຄົນ, ແບ່ງເປັນ 2 ທີມ, ລົງແຂ່ງຂັນເທື່ອລະ 20 ຄົນ; ທີມປະຊາຊົນມີບ້ານ: ທາດຫຼວງກາງ, ທາດຫຼວງເໜືອ, ວຽງຈະເລີນ, ໂພນເຄັງ, ໜອງບອນ ແລະ ໂພນສະອາດ; ທີມພະນັກງານປະກອບມີ: ອົງການປົກຄອງນະຄອນຫຼວງວຽງຈັນ, ພະແນກສຶກສານະຄອນຫຼວງ, ອົງການປົກຄອງເມືອງ, ຫ້ອງການສຶກສາເມືອງ ແລະ ບັນດາໂຮງຮຽນຕ່າງໆ.

ຜົນການແຂ່ງຂັນທີມປະຊາຊົນ ສາມາດເອົາຊະນະທີມພະນັກງານ 7- 5 ປະຕູ ຕາມການທໍານາຍໄດ້ລະບຸວ່າ: ຖ້າວ່າຝ່າຍປະຊາຊົນເປັນຝ່າຍຊະນະຈະເຮັດໃຫ້ ປະຊາຊົນເກີດມີຄວາມສະບາຍໃຈ ແລະ ມີຄວາມເຊື່ອໜັ້ນວ່າປີນັ້ນ ປະຊາຊົນຈະຢູ່ເຢັນເປັນສຸກ, ມີຈິດໃຈເບີກບານ, ມີກໍາລັງໃຈໃນການເຮັດການຜະລິດ ແລະ ຈະໄດ້ຮັບຜົນຜະລິດເປັນທີ່ໜ້າເພິ່ງພໍໃຈ, ແຕ່ໃນຄະນະດຽວກັນຖ້າຫາກວ່າປີໃດ ພະນັກງານເປັນຝ່າຍຊະນະແລ້ວ ປະຊາຊົນກໍຈະໝົດກໍາລັງໃຈເຮັດໃຫ້ການເຮັດວຽກ, ເຮັດໄຮ່, ເຮັດນາ ບໍ່ໄດ້ຮັບຜົນຜະລິດດີປານໃດ. ສະນັ້ນ, ປີນີ້ ປະຊາຊົນພວກເຮົາໄດ້ຊະນະແລ້ວ ປະຊາຊົນຈະຢູ່ເຢັນເປັນສຸກ, ມີຈິດໃຈເບີກບານມ່ວນຊື່ນ, ມີຄວາມສຸກ, ຄວາມສະບາຍໃຈໃນການທໍາການຜະລິດ ແລະ ຈະໄດ້ຮັບຜົນດີເປັນທີ່ໜ້າເພີ່ງພໍໃຈ.

ກິດຈະກຳຕີຄີ ຖືເປັນກິດຈະກໍາທີ່ຫາເບິ່ງໄດ້ຍາກ ເພາະເພິ່ນຈະເຮັດໃນມື້ບຸນນະມັດສະການພະຫຼວງວຽງຈັນເທົ່ານັ້ນ, ຄົນສະໄໝກ່ອນມີຄວາມເຊື່ອວ່າການຕີຄີແມ່ນການສ່ຽງທວາຍເຖິງເຫດການບ້ານເມືອງ, ຖ້າຝ່າຍພະນັກງານຊະນະກໍທວາຍວ່າ: ປີນັ້ນປະຊາຊົນພົນລະເມືອງບໍ່ຄ່ອຍຢູ່ດີ ຈະຖືກພວກຂຸນນາງຈະບັງຄົບຂົ່ມເຫັງ, ແຕ່ຖ້າປີໃດປະຊາຊົນຊະນະ ປີນັ້ນປະຊາຊົນຈະຢູ່ເຢັນເປັນສຸກ. ການຫຼິ້ນກິລາຕີຄີ, ແມ່ນຈະໃຊ້ໄມ້ໂງະນັ້ນຕີ ຫຼື ເກາະລູກຄີໄປຫາໂກນ (ເຂດແດນ) ທີ່ເພິ່ນກຳນົດໄວ້ຄື: ກວ້າງ 3 ວາ, ສູງ 2 ວາ, ແຕ່ຫາກບໍ່ມີຕາໜ່າງ ຄືໂກນເຕະບານ.

ພາບ-ຂ່າວ: ຍຸພິນທອງ