ການເຄື່ອນໄຫວນີ້ເກີດຂຶ້ນພຽງແຕ່ໜຶ່ງມື້, ຫຼັງຈາກອົງການອະນາໄມໂລກໄດ້ປະກາດການລະບາດຂອງເຊື້ອອີໂບ ລາໃນກົງໂກ ເປັນ "ເຫດສຸກເສີນດ້ານສາທາລະນະສຸກທີ່ສາກົນຕ້ອງໃຫ້ຄວາມສຳຄັນ."
ໃນວັນທີ 17 ພຶດສະພາ ຜ່ານມາ, ເຮືອບິນທີ່ບັນທຸກຜູ້ຊ່ຽວຊານຂອງ WHO ແລະ ອຸປະກອນການແພດຫຼາຍກວ່າ 5 ໂຕນໄດ້ລົງຈອດທີ່ເມືອງບູເນຍ ແຂວງອິຕູຣີ, ເພື່ອສະໜັບສະໜູນການປະຕິບັດງານການຄວບຄຸມພະຍາດຂອງລັດຖະບານກົງໂກ.
ຫຼ້າສຸດມີລາຍງານຜູ້ເສຍຊີວິດຫຼາຍກວ່າ 118 ຄົນ ແລະ ສົງໄສວ່າຕິດເຊື້ອຫຼາຍກວ່າ 300 ຄົນໃນແຂວງອິຕູຣີ ແລະ ນັອດກິວູ. ໃນຂະນະດຽວກັນ, ປະເທດເພື່ອນບ້ານເຊັ່ນ ອູກັນດາ ໄດ້ລາຍງານມີຜູ້ເສຍຊີວິດ 1 ຄົນ ແລະ ສົງໄສວ່າຕິດເຊື້ອອີກ 1 ຄົນ.
ຢ່າງໃດກໍຕາມ, ຜູ້ຊ່ຽວຊານເຕືອນວ່າ: ຈຳນວນຜູ້ຕິດເຊື້ອອາດຈະເພີ່ມຂຶ້ນຕື່ມອີກ ຍ້ອນວ່າເຈົ້າໜ້າທີ່ສາທາລະນະສຸກຍັງສືບຕໍ່ຕິດຕາມກວດກາ ແລະ ຄົ້ນຫາກໍລະນີເພີ່ມເຕີມໃນຫຼາຍພື້ນທີ່.
ການລະບາດຄັ້ງນີ້ກ່ຽວຂ້ອງກັບໄວຣັດ Bundibugyo ຊຶ່ງເປັນສາຍພັນອີໂອລາທີ່ຫາຍາກ, ໂດຍກ່ອນໜ້ານີ້ເຄີຍກວດພົບພຽງແຕ່ສອງຄັ້ງເທົ່ານັ້ນຄື: ໃນອູກັນດາ ເມື່ອປີ 2007 ແລະ ໃນ ກົງໂກ ເມື່ອປີ 2012.
ເຈົ້າໜ້າທີ່ສາທາລະນະສຸກໄດ້ຢືນຢັນຢ່າງເປັນທາງການກ່ຽວກັບການລະບາດໃນວັນທີ 15 ພຶດສະພາຜ່ານມາ ຫຼັງຈາກເກີດການເຈັບປ່ວຍຫຼາຍອາທິດ ແລະ ການເສຍຊີວິດທີ່ບໍ່ຮູ້ສາເຫດໃນເຂດຂຸດຄົ້ນບໍ່ແຮ່ທີ່ຫ່າງໄກຂອງເມືອງມອງບາລູ ແຂວງອິຕູຣີ.
ອີໂບລາ ເປັນພະຍາດຕິດຕໍ່ທີ່ຮ້າຍແຮງແຜ່ລາມໄດ້ງ່າຍຜ່ານນ້ຳໃນຮ່າງກາຍເຊັ່ນ: ຮາກ, ເລືອດ, ແລະ ນ້ຳອະສຸຈິ. ຄົນເຈັບມັກມີອາການຮຸນແຮງ ແລະ ມີອັດຕາການຕາຍສູງ, ເຮັດໃຫ້ການລະບາດນີ້ກາຍເປັນຄວາມກັງວົນໃໝ່ສຳລັບສາທາລະນະສຸກທົ່ວໂລກ.
ຄໍາເຫັນ