ກອງເລຂາຄະນະກຳມະການຕ້ານການຄ້າມະນຸດລະດັບຊາດລະນຶກວັນສາກົນເພື່ອຕ້ານການຄ້າມະນຸດ

ທ່ານນາງ ບຸນເຫຼືອ ຈັນທະພົມມາ ໄດ້ກ່າວວ່າ: ສປປ ລາວ ກໍເປັນປະເທດໜຶ່ງ ທີ່ໄດ້ຮັບຜົນກະທົບຈາກການຄ້າມະນຸດ ໂດຍກົງ ແລະ ທາງອ້ອມ. ໃນນັ້ນ, ກໍລະນີທີ່ພົ້ນເດັ່ນເກີດຂຶ້ນຫຼາຍກວ່າໝູ່ແມ່ນ: ການແຕ່ງດອງແອບແຝງ, ການຖ່າຍຮູບພາບ, ສະແດງ, ເຜີຍແຜ່ສິ່ງລາມົກຜ່ານທາງອອນລາຍ, ການຄ້າປະເວນີຂອງຜູ້ອື່ນ ແລະ ບັງຄັບໃຫ້ເປັນໂສເພນີ, ການໃຫ້ຖືພາແທນ ຫຼື ຮັບຈ້າງຖືພາ (ອູ້ມບູນ) ແລະ ການຂູດຮີດແຮງງານ ເພື່ອສະແຫວງຫາຜົນປະໂຫຍດ ແບບຜິດກົດໝາຍ. ຍ້ອນເຫັນໄດ້ບັນຫາດັ່ງກ່າວ ລັດຖະບານ ຈຶ່ງໄດ້ຖືເອົາການປ້ອງກັນສະກັດກັ້ນ ແລະ ແກ້ໄຂບັນຫາການຄ້າມະນຸດ ເປັນບັນຫາສໍາຄັນ ແລະ ໄດ້ນໍາພາ-ຊີ້ນໍາການຈັດຕັ້ງປະຕິບັດວຽກງານດັ່ງກ່າວຢ່າງໃກ້ຊິດ ແລະ ເອົາຈິງເອົາຈັງ ຕະຫຼອດມາ ເປັນຕົ້ນແມ່ນໄດ້ເອົາໃຈໃສ່ໃນການກຳນົດ-ປັບປຸງກົງການຈັດຕັ້ງ, ບຸກຄະລະກອນ, ງົບປະມານ ເພື່ອເຄື່ອນໄຫວວຽກງານຕ້ານການຄ້າມະນຸດໃຫ້ເປັນລະບົບ, ມີຄວາມເຂັ້ມແຂງ ນັບທັງສູນກາງລົງຮອດທ້ອງຖິ່ນ; ສ້າງປັບປຸງຄູ່ມື ແລະ ນິຕິກຳອື່ນທີ່ກ່ຽວຂ້ອງເພື່ອເປັນບ່ອນອີງໃນການຈັດຕັ້ງປະຕິບັດວຽກງານ, ການຜັນຂະຫຍາຍແຜນງານແຫ່ງຊາດ ວ່າດ້ວຍການສະກັດກັ້ນ ແລະ ຕ້ານການຄ້າມະນຸດ ໄລຍະ 4 (ແຕ່ປີ 2026-2030) ໃຫ້ເປັນຮູບປະທໍາເທື່ອລະກ້າວ.

ນອກນັ້ນ, ຍັງໄດ້ສ້າງຄວາມເຂັ້ມແຂງໃຫ້ພະນັກງານຜູ້ເຮັດວຽກຕົວຈິງ ເປັນຕົ້ນແມ່ນການຝຶກອົບຮົມວຽກງານຕ້ານການຄ້າມະນຸດໃຫ້ແກ່ເຈົ້າໜ້າທີ່ຕຳຫຼວດ ແລະ ພະນັກງານຂະແໜງການທີ່ກ່ຽວຂ້ອງ ນັບແຕ່ສູນກາງຮອດທ້ອງຖິ່ນ ແລະ ໂຮງຮຽນສາມັນສຶກສາ, ເອົາໃຈໃສ່ວຽກໂຄສະນາເຜີຍແຜ່ບັນດາວຽກງານຕ້ານການຄ້າມະນຸດ, ຜົນຮ້າຍຂອງການຄ້າມະນຸດ ຜ່ານຫຼາຍຊ່ອງທາງ ເປັນຕົ້ນແມ່ນຜ່ານສື່ສັງຄົມອອນລາຍ, ວິທະຍຸ, ໂທລະພາບ, ໜັງສືພິມ ແລະ ລົງໂຄສະນາຕາມບ່ອນທີ່ມີຄວາມສ່ຽງ ເພື່ອໃຫ້ປະຊາຊົນຮັບຮູ້ ແລະ ເຂົ້າໃຈ ຄວາມເປັນອັນຕະລາຍ ແລະ ຜົນກະທົບຂອງການຄ້າມະນຸດ; ເອົາໃຈໃສ່ໃນການປະຕິບັດມາດຕະການທາງດ້ານກົດໝາຍ, ຕິດຕາມເປົ້າໝາຍ ແລະ ນໍາຈັບຕົວຜູ້ກະທໍາຜິດມາດໍາເນີນຄະດີຕາມລະບຽບກົດໝາຍ ຂອງ ສປປ ລາວ ຢ່າງເຂັ້ມງວດ ໂດຍຄຽງຄູ່ກັບການດໍາເນີນຄະດີ ເອົາຜູ້ກະທໍາຜິດມາລົງໂທດນັ້ນ, ຍັງໄດ້ເຮັດວຽກການປົກປ້ອງຊ່ວຍເຫຼືອຜູ້ຖືກເຄາະຮ້າຍ, ກຸ່ມສ່ຽງຈາກການຄ້າມະນຸດ ທັງພາຍໃນ ແລະ ຈາກຕ່າງປະເທດຕາມລະບຽບການ ແລະ ກົດໝາຍທີ່ກ່ຽວຂ້ອງ. ພ້ອມກັນນັ້ນ ຍັງໄດ້ມີການພົວພັນຮ່ວມມືກັບບັນດາປະເທດເພື່ອນມິດ ແລະ ບັນດາອົງການຈັດຕັ້ງສາກົນຕ່າງໆ ຕາມກອບການຮ່ວມມື ເພື່ອເຮັດໃຫ້ບັນຫາການຄ້າມະນຸດຫຼຸດໜ້ອຍຖອຍລົງເທື່ອລະກ້າວ.

ໃນງານດັ່ງກ່າວ, ຍັງໄດ້ຈັດກິດຈະກຳ ເປັນຕົ້ນແມ່ນການສໍາມະນາກ່ຽວກັບວຽກງານຕ້ານການຄ້າມະນຸດ ເພື່ອໃຫ້ເຂົ້າໃຈກ່ຽວກັບຜົນຮ້າຍ ແລະ ຮູ້ວິທີປ້ອງກັນຕົວເອງຈາກຂະບວນການຄ້າມະນຸດອີກດ້ວຍ. ທັງນີ້, ກໍເພື່ອເປັນການໂຄສະນາແນວທາງນະໂຍບາຍຂອງພັກ, ກົດໝາຍ ແລະ ລະບຽບການຂອງລັດ ກ່ຽວກັບການສະກັດກັ້ນ ແລະ ຕ້ານການຄ້າມະນຸດ ລວມທັງຜົນສໍາເລັດຂອງ ການເຄື່ອນໄຫວວຽກງານດັ່ງກ່າວ, ເພື່ອເປັນການໂຄສະນາປູກຈິດສໍານຶກໃຫ້ແກ່ສັງຄົມຮັບຮູ້ຄວາມໝາຍ, ຄວາມສໍາຄັນ, ຜົນຮ້າຍ ເພື່ອມີສະຕິປ້ອງກັນຕົວບໍ່ໃຫ້ຕົກເປັນຜູ້ຖືກເຄາະຮ້າຍຈາກການຄ້າມະນຸດ, ເພື່ອປະຕິບັດພັນທະຂອງ ສປປ ລາວ ໃນນາມເປັນພາຄີຂອງອະນຸສັນຍາວ່າດ້ວຍການສະກັດກັ້ນ, ປາບປາມ ແລະ ລົງໂທດການຄ້າມະນຸດ ໂດຍສະເພາະແມ່ຍິງ ແລະ ເດັກນ້ອຍ.

ຂ່າວ: ລັດດາວັນ