ກອງປະຊຸມ ຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ

ກອງປະຊຸມຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວໄດ້ຈັດຂຶ້ນເມື່ອບໍ່ດົນມານີ້ ທີ່ນະຄອນຫຼວງວຽງຈັນ,ພາຍໃຕ້ການເປັນປະທານຂອງທ່ານ ໂພໄຊ ໄຂຄຳພິທູນ ຮອງລັດຖະມົນຕີ ກະຊວງການຕ່າງປະເທດ,ທ່ານ ນາງ Martine Thererຜູ້ຕາງໜ້າອົງການສະຫະປະຊາຊາດ ເພື່ອການພັດທະນາ ປະຈຳ ສປປ ລາວ(UNDP), ອຸປະທູດຊົ່ວຄາວ ສະຖານທູດສະຫະລັດອາເມຣິກາ ປະຈຳລາວ, ທູຕານຸທູດ ຕາງ  ໜ້າປະເທດທີ່ໃຫ້ທຶນ, ຄະນະກຳມະການຄຸ້ມຄອງແຫ່ງຊາດ ເພື່ອແກ້ໄຂບັນຫາລະເບີດບໍ່ທັນແຕກ ທີ່ຕົກຄ້າງຢູ່ ສປປ ລາວ (ຄຊກລ) ແລະ ພາກສ່ວນກ່ຽວຂ້ອງເຂົ້າຮ່ວມ.
  ທ່ານປະທານກອງປະຊຸມໄດ້ກ່າວວ່າ: ໃນໄລຍະ 1 ປີ ຜ່ານມາ,ຂະແໜງການແກ້ໄຂບັນຫາລະເບີດບໍ່ທັນແຕກທີ່ຕົກຄ້າງຢູ່ ສປປ ລາວ ໄດ້ເອົາໃຈໃສ່ຈັດຕັ້ງປະຕິບັດຕາມພາລະບົດບາດ ຂອງຕົນຢ່າງຕໍ່ເນື່ອງ ເພື່ອໃຫ້ສຳເລັດຕາມເປົ້າໝາຍຍຸດທະສາດແຫ່ງຊາດເພື່ອແກ້ໄຂບັນຫາລະເບີດບໍ່ທັນແຕກ (ລບຕ) ຍັງໄດ້ເຊື່ອມສານເຂົ້າໃນຂະແໜງການສຶກສາທິການ ແລະ ກິລາ,ກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ກະຊວງສາທາລະນະສຸກ ແລະ ຂະແໜງການອື່ນໆທີ່ກ່ຽວຂ້ອງ. ຜ່ານການຊີ້ນຳ-ນຳພາ ແລະ ເຄື່ອນໄຫວ ຂອງຄະນະກຳມະການຄຸ້ມຄອງແກ້ໄຂບັນຫາ ລບຕ ແຕ່ລະຂັ້ນ ໂດຍສະເພາະແມ່ນການໂຄສະນາສຶກສາຄວາມສ່ຽງໄພ,ການຊ່ວຍເຫຼືອຜູ້ຖືກເຄາະຮ້າຍ,ການສຳຫຼວດ-ກວດກູ້ ແລະ ທຳລາຍ,ການຄຸ້ມຄອງການເຄື່ອນໄຫວອົງການປະຕິບັດງານ ລບຕ ເພື່ອມະນຸດສະທຳ ເຫັນໄດ້ວ່າສາມາດຕອບສະໜອງຕາມແຜນການໃນແຕ່ລະໄລຍະ ໃນການພັດທະນາ ເສດຖະກິດ-ສັງຄົມ.
 ຄ່ຽງຄູ່ກັບຜົນສຳເລັດດັ່ງກ່າວ ເຫັນວ່າຍັງມີບາງສິ່ງທ້າທາຍ ທີ່ພວກເຮົາຈະໄດ້ພ້ອມກັນຄົ້ນຄວ້າປຶກສາຫາລືຮ່ວມກັນ ລວມທັງການວາງແຜນເພື່ອຮັດແໜ້ນການປະສານງານ ແລະ ຮ່ວມມືກັບທຸກພາກສ່ວນ.ວຽກງານແກ້ໄຂ ລບຕ ທີ່ຕົກຄ້າງເປັນວຽກບຸລິມະສິດ,ກະຊວງການຕ່າງປະເທດຈະໝູນໃຊ້ທ່າແຮງຂອງຕົນໃນການປະສານງານກັບທຸກພາກສ່ວນ ເພື່ອຈັດຕັ້ງປະຕິບັດວຽກງານ ລບຕ ໃຫ້ດຳເນີນຕາມທິດທີ່ໄດ້ວາງໄວ້ຢ່າງມີປະສິດທິພາບ ແລະ ມີທ່າກ້າວໃໝ່ໂດຍສອດຄອງຕາມຄວາມຕ້ອງການຂອງທ້ອງຖິ່ນ ແລະ ຍົກສູງຖານະບົດບາດ ສປປ ລາວ ໃນເວທີສາກົນ.
ກອງປະຊຸມຍັງໄດ້ພ້ອມກັນຄົ້ນຄວ້າ ແລະ ຮັບຟັງການລາຍງານເຊັ່ນ:ລາຍງານຜົນສຳເລັດ ແລະ ສິ່ງທ້າທາຍ ແລະ ໂອກາດໃນການດຳເນີນການແກ້ໄຂບັນຫາ ລບຕ ທົ່ວປະເທດ, ຮັບຟັງການລາຍງານ ມອບໂອນ-ວຽກງານການແກ້ໄຂບັນຫາ ລບຕ ມາຂຶ້ນກັບກະຊວງການຕ່າງປະເທດ,ສະເໜີການປັບປຸງກົນໄກກອງປະຊຸມ Sector WorKing G roupພາຍໃຕ້ການຊີ້ນຳຂອງກະຊວງການຕ່າງປະເທດ ລວມທັງແຜນການປັບປຸງວຽກງານດັ່ງກ່າວໃນອະນາຄົດ.
(ຂ່າວ-ພາບ:ຕຸໄລເພັດ)