 |
ທ່ານ ຄຳວຽນ ສີຫານາດ ກຳມະການພັກແຂວງ ຫົວໜ້າຫ້ອງວ່າການແຂວງ ໄດ້ລາຍງານການຈັດຕັ້ງປະຕິບັດວຽກງານພົ້ນເດັ່ນ 6 ເດືອນຕົ້ນປີ ແລະ ແຜນວຽກຈຸດສຸມ 6 ເດືອນທ້າຍປີ 2026 ຂອງອົງການປົກຄອງແຂວງ ໃຫ້ຮູ້ວ່າ: ແຂວງຊຽງຂວາງ ໄດ້ສຸມໃສ່ການສົ່ງກຳລັງລົງກໍ່ສ້າງຮາກຖານການເມືອງຕາມ 04 ເນື້ອໃນ 04 ຄາດໝາຍຢ່າງຕັ້ງໜ້າ ຕິດພັນກັບການພັດທະນາຊົນນະບົດ ຢ່າງມີຈຸດສຸມ, ສະກັດກັ້ນ ແລະ ຕ້ານທຸກການເຄື່ອນໄຫວຂອງກຸ່ມຄົນບໍ່ດີ ເຮັດໃຫ້ສາມາດຮັບປະກັນ ແລະ ຮັກສາໄດ້ສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ຄວາມເປັນລະບຽບຮຽບຮ້ອຍໂດຍພື້ນຖານ, ກວດກາຄຸ້ມຄອງຄົນເຂົ້າ-ອອກເມືອງ ແລະ ຊາວຕ່າງປະເທດທີ່ມາດໍາລົງຊີວິດ, ດຳເນີນທຸລະກິດຄ້າ-ຂາຍ ຢູ່ແຂວງຊຽງຂວາງ.
ທົ່ວແຂວງມີຄະດີເກີດຂຶ້ນທັງໝົດ 244 ເລື່ອງ, ກັກຕົວ 80 ຄົນ, ຍິງ 11 ຄົນ, ຄົນຕ່າງປະເທດ 20 ຄົນ, ຄະດີອາຍາ 55 ເລື່ອງ, ກັກຜູ້ຕ້ອງຫາ 24 ຄົນ, ຍິງ 01 ຄົນ, ຄະດີຄ້າມະນຸດ 12 ເລື່ອງ, ຄະດີລັກຊັບພົນລະເມືອງ 28 ເລື່ອງ, ມີຜົນເສຍຫາຍ: ລົດຈັກ 23 ຄັນ; ຄະດີເສດຖະກິດ 69 ເລື່ອງ, ມູນຄ່າເສຍຫາຍຈໍານວນ 7,548,724,523 ກີບ, ເງິນໂດລາ 3,248,453 ໂດລາ, ເງິນຢູໂຣ 27,000 ຢູໂຣ, ເງິນບາດ 591,600 ບາດ, ເງິນຢວນ 159,725 ຢວນ; ມີອັກຄີໄພເກີດຂຶ້ນ 08 ຄັ້ງ, ລວມມູນຄ່າເສຍຫາຍປະມານ 339,000,000 ກີບ; ອຸບັດເຫດຕາມທ້ອງຖະໜົນຫຼວງ 69 ຄັ້ງ, ພາຫະນະເປ່ເພທັງໝົດ 79 ຄັນ, ມີຜູ້ໄດ້ຮັບບາດເຈັບ ທັງໝົດ 86 ຄົນ, ເສຍຊີວິດ 14 ຄົນ, ລວມມູນຄ່າເສຍຫາຍປະມານ 1,972,400,445 ກີບ; ປະຊາຊົນລັກລອບຂຸດຄົ້ນແຮ່ຄຳຊະຊາຍ ຖືກດິນຍຸບທັບຢູ່ຈຸດ 8 ພູແຮ້ ແລະ ບ່ອນອື່ນໆ ເສຍຊີວິດ 02 ຄົນ, ບາດເຈັບ 04 ຄົນ, ນອກນີ້ຍັງມີຫຼາຍຈຸດທີ່ບໍ່ໄດ້ຮັບການລາຍງານ ແລະ ປິດບັງຕໍ່ເຈົ້າໜ້າທີ່; ສາມາດມ້າງຄະດີຊື້-ຂາຍຢາເສບບຕິດໄດ້ ຈຳນວນ 39 ລາຍ, ກັກຕົວຜູ້ຖືກຫາ 52 ຄົນ, ຍິງ 10 ຄົນ, ໃນນັ້ນ, ຄົນຕ່າງປະເທດ 01 ຄົນ ຢຶດຂອງກາງປະເພດຢາບ້າ ໄດ້ 136,820 ເມັດ, ເຮໂລອິນ 49 ຫໍ່, ໜັກ 3,935 ກຣາມ ຄໍລາເຈນ 06 ຊອງ.
 |
ເສດຖະກິດແຂວງຊຽງຂວາງ ຂະຫຍາຍຕົວຢູ່ໃນລະດັບ 5.8%, ລາຍຮັບສະເລ່ຍ 1,214 ໂດລາ/ຄົນ/ປີ, ຂະແໜງກະສິກໍາຂະຫຍາຍຕົວສະເລ່ຍໃນລະດັບ 4.40%, ກວມ 33.56%, ຂະແໜງອຸດສາຫະກໍາ ຂະຫຍາຍຕົວສະເລ່ຍ ໃນລະດັບ 7.17%, ກວມ 35.03%, ຂະແໜງບໍລິການ ຂະຫຍາຍຕົວ ສະເລ່ຍ ໃນລະດັບ 7.20%, ກວມ 31.41%. ໄດ້ສົ່ງອອກຊາ ຈຳນວນ 4,850 ກິໂລ, ສົ່ງອອກຂີງ 14 ໂຕນ, ແປ້ງມັນສະຄູ 77 ໂຕ່ນ, ສັດໃຫຍ່429ໂຕ, ນົມງົວດິບ (ນົມສົດ) 4,812,400 ກິໂລ.
ກອງປະຊຸມຄັ້ງນີ້ຍັງໄດ້ຮັບຟັງ ການລາຍງານກ່ຽວການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 6 ເດືອນຕົ້ນປີ ແລະ ທິດທາງແຜນການ 6 ເດືອນທ້າຍປີ 2026, ລາຍງານທິດທາງແຜນການຈັດຕັ້ງປະຕິບັດວຽກງານຄຸ້ມຄອງ ແລະ ພັດທະນາຕົວເມືອງແປກ ແລະ ມາດຕະການຕໍ່ຜູ້ລະເມີດສ້າງຄວາມບໍ່ເປັນລະບຽບຮຽບຮ້ອຍພາຍໃນຕົວເມືອງ, ລາຍງານກ່ຽວກັບ ການແກ້ໄຂການລັກລອບຂຸດຄົ້ນແຮ່ທາດ, ແຮ່ຄຳຕົກຂ້ອນ ພາຍຫຼັງມີຄຳສັ່ງເລກທີ 06/ນຍ ເປັນຕົ້ນມາ, ລາຍງານກ່ຽວກັບການແກ້ໄຂບັນຫາການບຸກລຸກຈັບຈອງທີ່ດິນຊະຊາຍ, ລາຍງານກ່ຽວກັບແຜນການສົ່ງເສີມການຜະລິດກະສິກຳເປັນສິນຄ້າ, ກ່ຽວກັບການຄຸ້ມຄອງ, ຕິດຕາມ ແລະ ກວດກາແຮງງານພາຍໃນ ແລະ ຕ່າງປະເທດທີ່ເຄື່ອນໄຫວຢູ່ພາຍໃນແຂວງຊຽງຂວາງ.
ທ່ານ ພູວົງ ອຸ່ນຄຳແສນ ໄດ້ມີຄຳເຫັນແລກປ່ຽນ ແລະ ຊີ້ນຳບາງວຽກງານ ເປັນຕົ້ນແມ່ນ ວຽກງານ ອພບຕ, ການຈັດເກັບລາຍຮັບເຂົ້າງົບປະມານ, ການແກ້ໄຂ ການລັກລອບຂຸດຄົ້ນແຮ່ທາດ, ການບຸກລຸກຈັບຈ່ອງທີ່ດິນ.
ຂ່າວ: ບຸນມີ ແສງທຸມມີ
ຄໍາເຫັນ