ທີ່ຫ້ອງປະຊຸມຫ້ອງວ່າການແຂວງ, ໂດຍການເປັນປະທານຂອງສະຫາຍບຸນໂຈມ ອຸບົນປະເສີດ ກໍາມະການສູນກາງພັກ ເລຂາຄະນະບໍລິຫານງານພັກແຂວງ ເຈົ້າແຂວງສະຫວັນນະເຂດ, ມີສະຫາຍຮອງເລຂາພັກແຂວງ, ກຳມະການປະຈໍາພັກແຂວງ, ກໍາມະການພັກແຂວງ, ເຈົ້າເມືອງ-ນະຄອນ, ຄະນະນໍາພະແນກການ, ກົມກອງອ້ອມຂ້າງແຂວງເຂົ້າຮ່ວມ.
ໂອກາດນີ້, ສະຫາຍ ບຸນໂຈມ ອຸບົນປະເສີດ ໄດ້ກ່າວເປີດກອງປະຊຸມເປັນທາງການ, ຊຶ່ງສະຫາຍໄດ້ຍົກໃຫ້ເຫັນວ່າ: ກອງປະຊຸມຄັ້ງນີ້ ໄດ້ພ້ອມກັນສະຫຼຸບຕີລາຄາການນໍາພາວຽກງານຮອບດ້ານຂອງຄະນະບໍລິຫານງານພັກແຂວງໃນ 3 ເດືອນຜ່ານມາ, ພ້ອມກັນຄົ້ນຄວ້າປະກອບຄໍາຄິດເຫັນໃນວຽກງານປ້ອງກັນຊາດ-ປ້ອງກັນຄວາມສະຫງົບ, ການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ 9 ເດືອນປີ 2024, ແຜນງົບປະມານແຫ່ງລັດ, ຈາກນັ້ນ ກໍມີບັນຫາເລັ່ງດ່ວນ-ເຄັ່ງຮ້ອນໃນການເປີດສົກຮຽນໃໝ່ສົກ 2024-2025, ວຽກງານເສດຖະກິດ-ສັງຄົມ, ວຽກງານວັດທະນະທໍາ-ສັງຄົມໃນຄາດໝາຍປີ 2025 ແຂວງສະຫວັນນະເຂດເປັນແຂວງຢຸດຕິການຖ່າຍຊະຊາຍ. ຈາກນັ້ນ, ສະຫາຍ ພູວັງ ເກດແກ້ວພົມພອນ ຮອງເລຂາພັກແຂວງ ໄດ້ຜ່ານບົດສະຫຼຸບຕີລາຄາການນໍາພາ-ຊີ້ນໍາວຽກງານຮອບດ້ານຂອງຄະນະບໍລິຫານງານພັກແຂວງປະຈໍາເດືອນ 7,8,9 ແລະ ທິດທາງແຜນການເດືອນ 10, 11, 12 ປີ 2024. ຊຶ່ງຍົກໃຫ້ເຫັນວ່າ: ວຽກງານການພັດທະນາເສດຖະກິດ ແລະ ແກ້ໄຂຄວາມທຸກຍາກໄດ້ນຳພາສຸມໃສ່ນໍາໃຊ້ທ່າແຮງບົ່ມຊ້ອນ ແລະ ລະດົມກໍາລັງແຮງຈາກທຸກພາກສ່ວນຂອງສັງຄົມເຂົ້າໃນການພັດທະນາເສດຖະກິດ-ສັງຄົມ ຕິດພັນກັບການຈັດຕັ້ງປະຕິບັດວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ຊຸກຍູ້ການຜະລິດກະສິກຳເປັນສິນຄ້າເພື່ອຄໍ້າປະກັນສະບຽງອາຫານໃຫ້ພຽງພໍ ແລະ ຄຸ້ມຄອງລາຄາສິນຄ້າອຸປະໂພກ-ບໍລິໂພກບໍ່ໃຫ້ກະທົບແຮງຕໍ່ຊີວິດການເປັນຢູ່ຂອງປະຊາຊົນ. ໃນນີ້, ການຈັດເກັບລາຍຮັບເຂົ້າງົບປະມານໃນ 9 ເດືອນຕົ້ນປີ 2024 ທົ່ວແຂວງຈັດເກັບລາຍຮັບໄດ້ 3,326 ຕື້ກີບເທົ່າກັບ 113.70% ຂອງແຜນການປີທຽບໃສ່ໄລຍະດຽວກັນເພີ່ມຂຶ້ນ 50.33%. ໃນນີ້: ພູດສູນກາງປະຕິບັດ 1,353 ຕື້ ກີບ, ເທົ່າກັບ 89.19% ຂອງແຜນການປີ, ພູດລາຍຮັບຂອງແຂວງປະຕິບັດໄດ້ 1,973 ຕື້ກີບ, ເທົ່າກັບ 140.12% ຂອງແຜນການປີ; ດ້ານລາຍຈ່າຍສາມາດຈັດຕັ້ງປະຕິບັດລາຍຈ່າຍ 832 ຕື້ກີບ, ເທົ່າກັບ 70.37% ຂອງແຜນການປີ; ແຂວງໄດ້ດຸ່ນດ່ຽງງົບປະມານແກ່ສູນກາງຕາມແຜນໃນ 6 ເດືອນຕົ້ນປີແລ້ວຈໍານວນ 131 ຕື້ກີບ. ສໍາລັບງວດ III ແມ່ນຈະດຸ່ນດ່ຽງໃຫ້ສູນກາງຈໍານວນ 127 ຕື້ກີບ ແລະ ຄາດຄະເນ 9 ເດືອນຕົ້ນປີ ສາມາດດຸ່ນດ່ຽງງົບປະມານໃຫ້ສູນກາງໄດ້ 258 ຕື້ກີບ.
ສະເພາະໃນປີ 2024 ແຂວງສະຫວັນນະເຂດໄດ້ຮັບອະນຸມັດທຶນທັງໝົດ171,924 ລ້ານກີບ, ນອນໃນ 9 ບ້ວງທຶນເຊັ່ນ: ທຶນປົກກະຕິ, ທຶນສົມທົບ, ທຶນເມືອງນອງ, ທຶນພັດທະນາຊົນນະບົດ, ທຶນຕ້ານເຈື່ອນ, ທຶນຟື້ນຟູໄພພິບັດ, ທຶນທາງ, ທຶນຈົດຮັບ-ຈົດຈ່າຍ, ເງິນເກີນແຜນປີ 2023 ແກ້ໄຂໜີ້ສິນ; ມີໂຄງການລົງທຶນຂອງລັດມູນຄ່າສູງກວ່າ 20 ຕື້ກີບ ໄດ້ຮັບທຶນທັງໝົດ 104 ໂຄງການມູນຄ່າ 74,918.43 ລ້ານກີບ, ສາມາດຈັດຕັ້ງປະຕິບັດໄດ້ 63 ໂຄງການມູນຄ່າ 54,553.38 ລ້ານກີບເທົ່າກັບ 72,32%; ໂຄງການລົງທຶນຂອງລັດມູນຄ່າ 20 ຕື້ກີບ ລົງມາໄດ້ຮັບທຶນທັງໝົດ 273 ໂຄງການ 36,505.99 ລ້ານກີບ, ສາມາດຈັດຕັ້ງປະຕິບັດໄດ້ 103 ໂຄງການມູນຄ່າ 31,095.83 ລ້ານກີບເທົ່າກັບ 85.18%. ສາມາດປະເມີນ ແລະ ອອກໃບຢັ້ງຢືນຮັບຮອງໂຄງການສະເໜີໃໝ່ທີ່ໄດ້ຮັບຈາກພະແນກພະລັງງານ ແລະ ບໍ່ແຮ່ ແລະ ສານປະຊາຊົນແຂວງຈໍານວນ 2 ໂຄງການ.
ວຽກພັດທະນາຊົນນະບົດ ແລະ ລຶບລ້າງຄວາມທຸກຍາກມາຮອດປັດຈຸບັນທົ່ວແຂວງມີຄອບຄົວພົ້ນທຸກຕາມດໍາລັດ 348/ລບ ທັງໝົດ 153,457 ຄອບຄົວ, ເທົ່າກັບ 87,86%. ໃນນີ້, ສ້າງໃໝ່ໄດ້ 1,917 ຄອບຄົວ; ສ້າງຄອບຄົວພັດທະນາໄດ້ 3,704 ຄອບຄົວ, ລວມຄອບຄົວຄົວພັດທະນາທັງໝົດ 126,045 ຄອບຄົວກວມເອົາ 72,16% ຂອງຈໍານວນຄອບຄົວທົ່ວແຂວງ;ສ້າງບ້ານພົ້ນທຸກ 781 ບ້ານເທົ່າກັບ 75,60% ແລະ ສ້າງບ້ານພັດທະນາ 301 ບ້ານກວມ 29,14% ຂອງຈໍານວນບ້ານໃນທົ່ວແຂວງ.
ກອງປະຊຸມໄດ້ຮັບຟັງການລາຍງານກ່ຽວກັບສະພາບປະກົດການຫຍໍ້ທໍ້ເກີດຂຶ້ນໃນສັງຄົມທີ່ພົ້ນເດັ່ນ ແລະ ການແກ້ໄຂເຮັດໃຫ້ສັງຄົມມີຄວາມສະຫງົບ ແລະ ເປັນລະບຽບຮຽບຮ້ອຍ, ລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມໝົດປີ 2024, ລາຍງານສະພາບການຈັດເກັບລາຍຮັບ ແລະ ລາຍຈ່າຍງົບປະມານຂອງແຂວງ, ລາຍງານສະພາບບັນຍາກາດການເປີດສົກຮຽນໃໝ່ສົກປີ 2024 ຫາ 2025 ໃນທົ່ວແຂວງ, ການມີສ່ວນຮ່ວມຂອງສັງຄົມຕໍ່ວຽກງານສຶກສາ, ສະພາບການເຂົ້າຮຽນຕໍ່ສາຍອາຊີວະສຶກສາ ແລະ ການສຶກສາຊັ້ນສູງຂອງນັກຮຽນທີ່ຈົບສາມັນໃນສົກປີຜ່ານມາ, ລາຍງານຄວາມຄືບໜ້າຂະບວນການກໍ່ສ້າງວິດຖ່າຍຂອງບັນດາບ້ານ ແລະ ເມືອງເປົ້າໝາຍເພື່ອສ້າງເງື່ອນໄຂໃຫ້ແກ່ການປະກາດເປັນເມືອງ ແລະ ແຂວງຢຸດຕິການຖ່າຍຊະຊາຍໃນທ້າຍປີ 2024, ລາຍງານການກະກຽມຄວາມພ້ອມດ້ານຕ່າງໆຂອງຄະນະບໍລິຫານງານພັກເມືອງເພື່ອກ້າວເຂົ້າສູ່ການດໍາເນີນຊີວິດການເມືອງທ້າຍສະໄໝ ນໍາອີກດ້ວຍ.
(ຂ່າສ: ສະຫວັນ)
ຄໍາເຫັນ