ກອງປະຊຸມຄົບຄະນະຂອງຄະນະບໍລິຫານງານພັກແຂວງຜົ້ງສາລີຄັ້ງທີ8ສະໄໝທີXI ໄດ້ເປີດຂຶ້ນໃນວັນທີ11ທັນວາ ຜ່ານມາ ແລະປິດລົງດ້ວຍຜົນສຳເລັດອັນຈົບງາມໃນຕອນບ່າຍຂອງວັນທີ13ທັນວານີ້ທີ່ຫ້ອງປະຊຸມຂອງຫ້ອງວ່າການແຂວງໂດຍພາຍໃຕ້ການເປັນປະທານຂອງສະຫາຍຄຳຜອຍວັນນະສານກຳມະການສູນກາງພັກເລຂາຄະນະບໍລິຫານງານພັກແຂວງເຈົ້າແຂວງຜົ້ງສາລີ, ມີບັນດາສະຫາຍຄະນະພັກແຂວງ, ເລຂາ-ຮອງເລຂາພັກເມືອງທົ່ວແຂວງ, ບັນດາສະຫາຍເລຂາຄະນະພັກຮາກຖານ, ເລຂາໜ່ວຍພັກ, ພ້ອມດ້ວຍພາກສ່ວນທີ່ກ່ຽວຂ້ອງເຂົ້າຮ່ວມ.
ຕະຫຼອດໄລຍະຂອງການດຳເນີນກອງປະຊຸມ3ວັນນັ້ນ, ຜູ້ເຂົ້າຮ່ວມໄດ້ຮັບຟັງການລາຍງານບົດສະຫຼຸບຕີລາຄາການການຊີ້ນໍາ-ນໍາພາວຽກງານຂອງຄະນະບໍລິຫານງານພັກແຂວງສະໄໝທີXI ໃນປີ2023ແລະກຳນົດທິດທາງແຜນການປີ2024, ໃນນັ້ນລົງເລິກການຊີ້ນໍາ - ນໍາພາຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານ, ວຽກງານປກຊ-ປກສແລະການແກ້ໄຂ8ບັນຫາທີ່ແຂວງປະສົບຜ່ານມາແລະປະເຊີນຢູ່ໃນປັດຈຸບັນ, ບົດສະຫຼຸບຕີລາຄາການຈັດຕັ້ງປະຕິບັດວຽກງານການລົງກໍ່ສ້າງຮາກຖານການເມືອງ, ວຽກງານ3ສ້າງແລະການພັດທະນາຊົນນະບົດ, ແກ້ໄຂຄວາມທຸກຍາກຢູ່ຈຸດສຸມ128ບ້ານ, 7.040ຄອບຄົວແລະຈຸດທົ່ວໄປໃນທົ່ວແຂວງໃນປີ2023ແລະທິດທາງແຜນການປີ2024; ການຈັດຕັ້ງປະຕິບັດແຜນກໍ່ສ້າງຕົວເມືອງນ້ອຍໃນຊົນນະບົດ15ຈຸດ, ໃນນັ້ນ: ສຸມໃສ່7ຈຸດສຸມໃນປີ2023ແລະທິດທາງແຜນການປີ2024. ພ້ອມກັນນັ້ນບັນດາຜູ້ເຂົ້າຮ່ວມໄດ້ຮັບຟັງການລາຍງານຊີ້ແຈງແຕ່ລະບັນຫາທີ່ໄດ້ສະເໜີ, ພ້ອມທັງຄົ້ນຄວ້າປະກອບຄຳຄິດຄໍາເຫັນຢ່າງກົງໄປກົງມາໃສ່ໜ້າວຽກງານດ້ານຕ່າງໆທີ່ເຫັນວ່າຍັງບໍ່ໄດ້ສອດຄ່ອງແລະເໝາະສົມໃນການຊີ້ນຳໆພາເພື່ອໃຫ້ມີຄວາມເປັນເອກະພາບໃນໄລຍະ1ປີຜ່ານມາຊຶ່ງສາມາດເຫັນໄດ້ຜົນສຳເລັດຫຼາຍດ້ານຄຽງຄູ່ກັບຜົນສໍາເລັດດັ່ງກ່າວນັ້ນກໍຍັງເຫັນດ້ານອ່ອນແລະຂໍ້ຄົງຄ້າງບາງບັນຫາທີ່ຈະໄດ້ປັບປຸງຈັດຕັ້ງປະຕິບັດໃນຕໍ່ໜ້າ.
ໃນກອງປະຊຸມຄັ້ງນີ້, ໄດ້ຜ່ານບົດສຳຫຼວດການນຳພາລວມຂອງຄະນະບໍລິຫານງານພັກແຂວງສະໄໝທີXI ປະຈຳປີ2023ພ້ອມທັງແບ່ງໜ່ວຍຜ່ານໃບສຳຫຼວດຕົນເອງໃນການຊີ້ນຳໆພາໃນໄລຍະ1ປີທີ່ຜ່ານມາຊຶ່ງແຕ່ລະສະຫາຍກໍໄດ້ຍົກໃຫ້ເຫັນດ້ານດີຜົນສຳເລັດແລະດ້ານອ່ອນຂໍ້ຄົງຄ້າງແລະປະກອບຄຳຄິດຄຳເຫັນປັບປຸງກໍ່ສ້າງຕໍານິສົ່ງຂ່າວຊຶ່ງກັນແລະກັນດ້ວຍຄວາມຈິງໃຈຢ່າງມີລັກສະນະສ້າງສັນ.
ໃນໂອກາດກ່າວປິດກອງປະຊຸມສະຫາຍຄຳຜອຍວັນນະສານໄດ້ຮຽກຮ້ອງໃຫ້ຄະນະບໍລິຫານງານພັກແຂວງສືບຕໍ່ກໍາແໜ້ນແນວທາງນະໂຍບາຍ, ມະຕິ, ຄໍາສັ່ງແລະລະບຽບກົດໝາຍວາງອອກໃຫ້ໜັກແໜ້ນ, ກໍາແໜ້ນພາລະບົດບາດ, ສິດແລະໜ້າທີ່ຂອງຄະນະບໍລິຫານງານພັກແຂວງທີ່ໄດ້ກໍານົດໄວ້ໃນກົດລະບຽບຂອງພັກສະໄໝທີXI, ເອົາໃຈໃສ່ຊີ້ນໍາຕໍ່ວຽກງານແນວໂຮມ, ນັກຮົບເກົ່າແລະອົງການຈັດຕັ້ງມະຫາຊົນຢູ່4ປະເພດຮາກຖານ, ເພີ່ມທະວີຄວາມສາມັກຄີ, ຄວາມເປັນເອກະພາບພາຍໃນຄະນະບໍລິຫານງານພັກໃຫ້ໜັກແໜ້ນ, ພ້ອມທັງປັບປຸງແບບແຜນນໍາພາແລະແບບແຜນຊີ້ນໍາໃຫ້ແທດເຖິງຕົວຈິງແລະເຂັ້ມງວດກວ່າເກົ່າ, ໃຫ້ບັນດາສະຫາຍຄະນະບໍລິຫານງານພັກແຂວງນໍາເອົາເນື້ອໃນຂອງກອງປະຊຸມຄັ້ງນີ້ໄປຜັນຂະຫຍາຍແລະຊີ້ນໍາຈັດຕັ້ງປະຕິບັດຕາມຄວາມຮັບຜິດຊອບແລະຕາມຂົງເຂດວຽກງານທີ່ຕົນຊີ້ນໍາໃຫ້ແທດເຖິງຕົວຈີງແລະປະກົດຜົນເປັນຈິງ.
(ຂ່າວ-ພາບ: ແສງຄຳສາລີວັນ)
ຄໍາເຫັນ