ກອງປະຊຸມຄົບຄະນະບໍລິຫານງານພັກແຂວງໄຊຍະບູລີຄັ້ງທີ10ສະໄໝທີVII

ກອງປະຊຸມຄົບຄະນະບໍລິຫານງານພັກແຂວງໄຊຍະບູລີຄັ້ງທີ10ສະໄໝທີVII ໄດ້ເປີດຂຶ້ນໃນຕອນເຊົ້າຂອງວັນທີ25ທັນວານີ້ທີ່ຫ້ອງປະຊຸມຫ້ອງວ່າການແຂວງໄຊຍະບູລີໂດຍການເປັນປະທານຂອງສະຫາຍພົງສະຫວັນສິດທະວົງກໍາມະການສູນກາງພັກເລຂາພັກແຂວງເຈົ້າແຂວງໄຊຍະບູລີ, ເປັນກຽດເຂົ້າຮ່ວມມີບັນດາສະຫາຍຮອງເລຂາພັກແຂວງຄະນະປະຈໍາພັກແຂວງ, ຄະນະປະຈໍາສະພາປະຊາຊົນແຂວງ, ກໍາມະການພັກແຂວງ, ເລຂາພັກເມືອງ, ຄະນະພັກ, ຄະນະບັນຊາກອງພົນທະຫານຮາບທີII , ຄະນະພັກກອງບັນຊາການທະຫານແຂວງ, ປກສແຂວງ, ເລຂາ, ຮອງເລຂາຄະນະພັກຮາກຖານ, ເລຂາ, ຮອງເລຂາໜ່ວຍພັກບັນດາພະແນກການ, ກົມກອງ, ອົງການ, ທະນາຄານ, ຫົວໜ້າດ່ານສາກົນແລະລັດວິສາຫະກິດອ້ອມຂ້າງແຂວງເຂົ້າຮ່ວມ.
ໃນກອງປະຊຸມ,ສະຫາຍພົງສະຫວັນສິດທະວົງໄດ້ກ່າວເປີດກອງປະຊຸມວ່າ: ໂດຍປະຕິບັດຕາມກົດລະບຽບຂອງພັກປະຊາຊົນປະຕິວັດລາວສະໄໝທີXI ແລະໂຄງການດໍາເນີນງານຂອງຄະນະບໍລິຫານງານພັກແຂວງ. ມື້ນີ້, ກອງປະຊຸມຄົບຄະນະບໍລິຫານງານພັກແຂວງຄັ້ງທີ10ສະໄໝທີVII ໄດ້ເປີດຂຶ້ນຢ່າງເປັນທາງການຊຶ່ງຢູ່ໃນບັນຍາກາດທີ່ທົ່ວພັກ, ທົ່ວລັດ, ທົ່ວກໍາລັງປະກອບອາວຸດແລະທົ່ວປວງຊົນລາວທັງຊາດເວົ້າລວມ, ເວົ້າສະເພາະປະຊາຊົນບັນດາເຜົ່າຊາວແຂວງໄຊຍະບູລີໄດ້ຕັ້ງໜ້າອອກແຮງແຂ່ງຂັນກັນຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີXI ຂອງພັກ, ມະຕິກອງປະຊຸມໃຫຍ່ຄັ້ງທີVII ຂອງອົງຄະນະພັກແຂວງແລະແຜນພັດທະນາເສດຖະກິດ-ສັງຄົມ5ປີຂອງແຂວງຕິດພັນກັບ2ວາລະແຫ່ງຊາດແນໃສ່ແກ້ໄຂບັນຫາຄວາມຫຍຸ້ງຍາກທາງດ້ານເສດຖະກິດ-ການເງິນແລະບັນຫາຢາເສບຕິດເພື່ອເປັນພື້ນຖານໃນການຂັບເຄື່ອນເຮັດໃຫ້ເສດຖະກິດ-ການເງິນ, ເງິນຕາ, ສິນຄ້າມີຄວາມສະຫງົບໝັ້ນທ່ຽງໄປພ້ອມກັບການເອົາໃຈໃສ່ແກ້ໄຂບັນຫາຫຍໍ້ທໍ້ຕ່າງໆໃນສັງຄົມໃຫ້ຫຼຸດໜ້ອຍຖອຍລົງເປັນກ້າວໆແລະຫາກໍພ້ອມກັນຈັດຕັ້ງສະເຫຼີມສະຫຼອງວັນຊາດທີ2ທັນວາຄົບຮອບ48ປີແລະວັນເກີດປະທານໄກສອນພົມວິຫານຄົບຮອບ103ປີຜ່ານມານີ້ໄປພ້ອມກັບການສືບຕໍ່ຍູ້ຂະບວນການດ້ານຕ່າງໆເພື່ອຂໍ່ານັບຮັບຕ້ອນວັນສ້າງຕັ້ງກອງທັບປະຊາຊົນລາວ20ມັງກອນຄົບຮອບ75ປີ, ວັນເກີດຂອງທ່ານຄໍາໄຕສີພັນດອນຄົບຮອບ100ປີແລະກໍເປັນໄລຍະທີ່ປະຊາຊົນບັນດາເຜົ່າຊາວແຂວງໄຊຍະບູລີພວມຂຸ້ນຂ້ຽວເກັບກູ້ຜົນຜະລິດລະດູປີແລະກ້າວເຂົ້າສູ່ການຜະລິດລະດູແລ້ງແລະກໍຢູ່ໃນບັນຍາກາດກະກຽມສົ່ງທ້າຍປີເກົ່າຕ້ອນຮັບປີໃໝ່ຄ.ສ2024ທີ່ຈະມາເຖິງບໍ່ພໍເທົ່າໃດວັນຂ້າງໜ້ານີ້ຢ່າງເປັນຂະບວນຟົດຟື້ນ. ກອງປະຊຸມຄົບຄະນະບໍລິຫານງານພັກແຂວງຄັ້ງນີ້ມີຄວາມໝາຍຄວາມສໍາຄັນຫຼາຍພວກເຮົາຈະໄດ້ພ້ອມກັນຄົ້ນຄວ້າປຶກສາຫາລືແລະຕີລາຄາຄວາມຮັບຜິດຊອບການເມືອງຂອງຄະນະພັກຂັ້ນຕ່າງໆໃນໄລຍະ1ປີຜ່ານມາຂອງການນໍາພາ-ຊີ້ນໍາຈັດຕັ້ງປະຕິບັດບັນດາມະຕິ, ຄໍາສັ່ງ, ຄໍາແນະນໍາ, ລະບຽບກົດໝາຍໃນວາລະທ້າຍສະໄໝກອງປະຊຸມໃຫຍ່ເພື່ອໃຫ້ເຫັນໄດ້ດ້ານດີ, ຜົນໄດ້ຮັບ, ດ້ານອ່ອນ, ຂໍ້ຄົງຄ້າງແລະຂໍ້ຂາດຕົກບົກຜ່ອງແລະບົດຮຽນທີ່ຖອດຖອນໄດ້ຄືແນວໃດນັ້ນແລະພ້ອມກັນຄົ້ນຄວ້າແລະເອກະພາບກ່ຽວກັບການກຳນົດທິດທາງແຜນການປີ2024ຢ່າງກົງໄປ-ກົງມາແລະເປັນເອກະພາຍໃນພັກ. ກອງປະຊຸມຂອງພວກເຮົາຈະໄດ້ດໍາເນີນເປັນເວລາ2ວັນເຕັມແລະແບ່ງອອກເປັນ2ວາລະຄື:  ວາລະທີ1: ກອງປະຊຸມຈະໄດ້ສະຫຼຸບຕີລາຄາການນໍາພາ-ຊີ້ນຳວຽກງານຮອບດ້ານໃນໄລຍະ1ປີຜ່ານມາຂອງຄະນະບໍລິຫານງານພັກແຂວງປະຈໍາປີ2023ແລະທິດທາງແຜນການວຽກຈຸດສຸມປີ2024;ຕີລາຄາການນຳພາ-ຊີ້ນຳກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານປີ2023ແລະທິດທາງແຜນການປີ2024. ວາລະທີ2: ຈະໄດ້ຈັດພິທີປະກາດການຈັດຕັ້ງພະນັກງານນໍາພາ-ຄຸ້ມຄອງອອກພັກການຮັບອຸດໜູນບໍານານແລະປະກາດຍົກຍ້າຍ, ແຕ່ງຕັ້ງ, ບົ່ງຕົວແຕ່ງຕັ້ງພະນັກງານການນໍາຂັ້ນແຂວງ, ຂັ້ນເມືອງ, ເລຂາຄະນະພັກຮາກຖານອ້ອມຂ້າງແຂວງຈໍານວນໜຶ່ງ. ເພື່ອເຮັດໃຫ້ກອງປະຊຸມຄັ້ງນີ້ບັນລຸຈຸດປະສົງຄາດໝາຍທີ່ວາງໄວ້, ຂ້າພະເຈົ້າຮຽກຮ້ອງມາຍັງບັນດາສະຫາຍຜູ້ແທນກອງປະຊຸມຈົ່ງເຊີດຊູຄວາມຮັບຜິດຊອບຂອງຕົນໃຫ້ສູງເຂົ້າໃນການຄົ້ນຄວ້າປະກອບຄໍາຄິດ-ຄໍາເຫັນ, ຍົກໃຫ້ເຫັນໄດ້ຈຸດດີທີ່ພົ້ນເດັ່ນ, ພ້ອມກັນນີ້ກໍຈິງໃຈກ້າຍົກຈຸດອ່ອນຂໍ້ຄົງຄ້າງ, ຂໍ້ຂາດຕົກບົກຜ່ອງໃນການນໍາພາ-ຊີ້ນໍາຂອງຕົນເພື່ອແລກປ່ຽນນໍາກັນ, ສາມາດຖອດຖອນໄດ້ບົດຮຽນໃນຕໍ່ໜ້າເຮັດໃຫ້ຂະບວນການວຽກງານຕ່າງໆມີການຫັນປ່ຽນທີ່ຕັ້ງໜ້າໄດ້ຮັບຜົນດີກວ່າເກົ່າ, ທັງຮັບປະກັນໃຫ້ມີຄວາມເປັນເອກະພາບໃນດ້ານທັດສະນະແນວຄິດແລະສ້າງຄວາມຕັດສິນໃຈ, ເພີ່ມທະວີຄວາມຮັບຜິດຊອບໃນການເຮັດວຽກແທດເຖິງຕົວຈິງເພື່ອສືບຕໍ່ຈັດຕັ້ງປະຕິບັດຄາດໝາຍສູ້ຊົນທີ່ກອງປະຊຸມໃຫຍ່ຄັ້ງທີVII ຂອງອົງຄະນະພັກແຂວງວາງອອກໃນທ້າຍສະໄໝໄດ້ຮັບການຈັດຕັ້ງປະຕິບັດເປັນຮູບປະທໍາຕາມ4ເນື້ອໃນ4ຄາດໝາຍຢ່າງເລິກເຊິ່ງ, ໜັກແໜ້ນແລະບັນລຸມະຕິກອງປະຊຸມໃຫຍ່ຄັ້ງທີXI ຂອງພັກ, ແຜນພັດທະນາເສດຖະກິດ-ສັງຄົມຄັ້ງທີIX ຂອງລັດຖະບານວາງອອກໃຫ້ປະກົດຜົນເປັນຈິງສືບຕໍ່ປະຕິບັດພາລະກິດປ່ຽນແປງໃໝ່ຮອບດ້ານທີ່ມີຫຼັກການຂອງພັກເຮັດໃຫ້ແຂວງໄຊຍະບູລີຮັ່ງມີເຂັ້ມແຂງ, ປະຊາຊົນມີຄວາມຜາສຸກ, ສັງຄົມມີຄວາມສາມັກຄີປອງດອງ, ປະຊາທິປະໄຕ,ຍຸຕິທໍາແລະສີວິໄລຢ່າງບໍ່ຢຸດຢັ້ງ.
(ຂ່າວ-ພາບ: ບຸນທີ)