 |
ທ່ານ ບຸນເຮືອງ ສຸລິໄຊ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິດ ໄດ້ຜ່ານຮ່າງບົດສະຫຼຸບ ຕີລາຄາການນຳພາ-ຊີ້ນຳຮອບດ້ານ ຂອງຄະນະບໍລິຫານງານພັກແຂວງ ໄລຍະ 6ເດືອນຕົ້ນປີ ແລະ ວາງຄາດໝາຍສູ້ຊົນ 6 ເດືອນທ້າຍປີ 2026 ເຊິ່ງໄດ້ຍົກໃຫ້ເຫັນ ທົ່ວແຂວງມີຄວາມສະຫົງບໂດຍພື້ນຖານ, ມີຄວາມສາມັກຄີແໜ້ນແຟ້ນ, ມີຄວາມເປັນເອກະພາບສູງ, ສາມາດເກັບລາຍຮັບເຂົ້າງົບປະມານໄດ້ 239,01 ຕື້ກີບ ເທົ່າກັບ 44.72% ຂອງແຜນການປີ; ເນື້ອທີ່ປູກເຂົ້ານາປີ20,518 ເຮັກຕາ ກຽມດິນ 95% ຕົກກ້າ 100%, ປັກດຳແລ້ວ 75%, ປູກເຂົ້າເນີນສູງ 7,368 ເຮັກຕາ, ປູກສຳເລັດແລ້ວ 100%.
ໃນຂະນະທີ່ ການສົ່ງອອກ, ສາມາດສົ່ງອອກຊາ 4,850 ກິໂລ, ຂີງ 14 ໂຕນ, ແປ້ງມັນສາຄູ77 ໂຕນ, ນົມງົວດິບ 1,711,200 ກິໂລ, ສັດໃຫຍ່ ແລະ ສັດປີກຈຳນວນໜຶ່ງ; ທົ່ວແຂວງມີສາງນໍ້າມັນເຊື້ອໄຟ 5 ສາງ, ມີ 4 ບໍລິສັດນຳເຂົ້າ, ມີ 153 ປໍ້າ, ເປີດບໍລິການປົກກະຕິ 129 ປໍ້າ, ປິດບໍລິການ 24 ປໍ້າ; ປະຊາຊົນໄດ້ຊົມໃຊ້ໄຟຟ້າທັງໝົດ 455 ບ້ານ ກວມ 96% ຂອງຈຳນວນບ້ານໃນທົ່ວແຂວງ, ຄົວເຮືອນນໍາໃຊ້ໄຟຟ້າທັງໝົດ 51,887 ຄົວເຮືອນ ກວມ 98.88%; ຂຶ້ນທະບຽນຜູ້ຕ້ອງການໄປເຮັດວຽກຢູ່ພາຍໃນ ແລະ ຕ່າງປະເທດໄດ້ທັງໝົດ 1,219 ຄົນ, ສົ່ງພະນັກງານລົງກໍ່ສ້າງຮາກຖານການເມືອງ ສົກປີ 2026-2027 ຈຳນວນ 17 ສະຫາຍ, ຂັ້ນແຂວງ 9 ສະຫາຍ, ຂັ້ນເມືອງ 8 ສະຫາຍ ຢູ່ 3 ເມືອງ ຄື: ເມືອງແປກ, ເມືອງຜາໄຊ ແລະ ເມືອງໝອກ.
ກອງປະຊຸມຄັ້ງນີ້ຍັງໄດ້ປະກາດການຈັດຕັ້ງ ໂດຍໄດ້ຜ່ານມະຕິຕົກລົງ ສະບັບເລກທີ118/ຄລສພ ແລະ ສະບັບເລກທີ119/ຄລສພ ລົງວັນທີ 5 ມິຖຸນາ2026 ຕົກລົງແຕ່ຕັ້ງທ່ານ ຫວາຢ່າ ໝອກພູເຂົາ ເປັນກຳມະການປະຈຳພັກແຂວງຊຽງຂວາງ, ທ່ານນາງ ພວງພະຈັນ ມູນທະວົງ ເປັນກຳມະການປະຈຳພັກແຂວງຊຽງຂວາງ.
ໂອກາດນີ້ ທ່ານ ພູວົງ ອຸ່ນຄຳແສນ ໄດ້ເນັ້ນໃຫ້ສືບຕໍ່ສຶກສາອົບຮົມການເມືອງແນວຄິດ, ການລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ, ກວດກາ, ຄຸ້ມຄອງ ແລະ ແກ້່ໄຂການລັກລອບຂຸດຄົ້ນແຮ່, ການບຸກລຸກປ່າໄມ້ຫວງຫ້າມ, ການຈັບຈອງທີ່ດິນ, ຊຸກຍູ້ການຜະລິດຂອງປະຊາຊົນໃຫ້ເປັນສິນຄ້າ, ເຝົ້າລະວັງ ກຽມຮັບມືພະຍາດລະດູຝົນ ແລະ ໄພພິບັດຕ່າງໆ, ສືບຕໍ່ຈັດຕັ້ງປະຕິບັດແຜນ 6 ເດືອນທ້າຍປີໃຫ້ມີຜົນສຳເລັດສູງ.
ຂ່າວ: ບຸນມີ ແສງທຸມມີ
ຄໍາເຫັນ