 |
ໃນກອງປະຊຸມ ໄດ້ຜ່ານຮ່າງບົດຕີລາຄາການຈັດຕັ້ງປະຕິບັດມະຕິກອງປະຊຸມຄົບຄະນະຄັ້ງທີ 2 ສະໄໝທີ IX ຂອງອົງຄະນະພັກເມືອງພຽງ, ຜ່ານບົດລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມຕິດພັນກັບການຈັດຕັ້ງປະຕິບັດ 2 ວາລະແຫ່ງຊາດ ໃນ 6 ເດືອນຕົ້ນປີໂດຍໄດ້ຍົກໃຫ້ເຫັນຜົນງານດ້ານດີທີ່ຕັ້ງໜ້າ ບົດຮຽນທີ່ຖອດຖອນໄດ້ ແລະ ດ້ານອ່ອນຂໍ້ຄົງຄ້າງທີ່ຈະໄດ້ພ້ອມກັນແກ້ໄຂໃນຕໍ່ໜ້າ ຊຶ່ງໃນໄລຍະຜ່ານມາເມືອງພຽງສາມາດຮັກສາໄດ້ສະຖຽນລະພາບທາງດ້ານການເມືອງ, ສັງຄົມມີຄວາມສະຫງົບປອດໄພໂດຍພື້ນຖານ, ເສດຖະກິດມີການຂະຫຍາຍຕົວຢ່າງຕໍ່ເນື່ອງ ຊຶ່ງໄລຍະ 6 ເດືອນຜ່ານມາສາມາດຈັດເກັບລາຍຮັບໄດ້ທັງໝົດ 4 ຕື້ 200 ລ້ານກວ່າກີບ ເທົ່າກັບ 70% ຂອງແຜນການປີ, ໂຄງການລົງທຶນໃຊ້ງົບປະມານລັດຖະບານມີ 7 ໂຄງການ ມູນຄ່າ 28 ຕື້ກວ່າກີບ, ໂຄງການນຳໃຊ້ຄັງພັດທະນາທ້ອງຖິ່ນຂອງແຂວງ 2 ໂຄງການ ມູນຄ່າ 19 ຕື້ກວ່າກີບ, ໂຄງການນຳໃຊ້ທ່າແຮງຂອງເມືອງ 3 ໂຄງການມູນຄ່າ 3 ຕື້ກວ່າກີບ. ໄດ້ສູມໃສ່ການຜະລິດເພື່ອຄໍ້າປະກັນສະບຽນອາຫານໃຫ້ພຽງພໍໂດຍສະເພາະປະເພດເຂົ້າ ຊຶ່ງໄດ້ຊຸກຍູ້ການຜະລິດເຂົ້ານາແຊງໃນເນື້ອທີ່800 ກວ່າເຮັກຕາ ສ້າງຜົນຜະລິດລວມໄດ້ 4,200 ກວ່າໂຕນ ຊຸກຍູ້ການປູກພືດສະບຽງອາຫານໄດ້ 600 ກວ່າເຮັກຕາ ຜົນຜະລິດທັງໝົດໄດ້ 3.400 ໂຕນ ອົງການປົກຄອງເມືອງໄດ້ສູມໃສ່ຢ່າງຕັ້ງໜ້າໃນການຊີ້ນໍາກໍາລັງ ປກສ ແກ້ໄຂບັນຫາຢາເສບຕິດ ຕິດພັນກັບການແກ້ໄຂປະກົດການຫຍໍ້ທໍ້ຕ່າງໆໄດ້ເຮັດສຳເລັດ 4 ບ້ານ ຄື: ບ້ານດົງຫຼວງ, ບ້ານກາງ, ບ້ານນາຕານ, ບ້ານນາໂສມ ມີຈໍານວນພົນເຂົ້າຮ່ວມທັງໜົດ 500 ກວ່າຄົນ.
ໃນໂອ້ກາດນີ້, ຜູ້ເຂົ້າຮ່ວມ ໄດ້ຜັດປ່ຽນກັນຂຶ້ນປະກອບຄຳຄິດຄຳເຫັນເພຶ່ອພ້ອມກັນຊອກກາວິທີແກ້ໄຂບັນດາດ້ານທີ່ຍັງຄົງຄ້າງ ແລະ ປະກົດການຫຍໍ້ທໍ້ດ້ານຕ່າງທີ່ເກີດຂຶ້ນໃຫ້ຫຼຸດໜ້ອຍຖອຍລົງ. ຕ້ອນທ້າຍ, ສະຫາຍ ດວງຕາ ໄຊວຸດ ຮອງເລຂາພັກແຂວງ ຜູ້ຊີ້ນຳວຽກງານການເມືອງແນວຄິກ ວຽກງານພັກ- ພະນັກງານແຂວງໄຊຍະບູລີ ໄດ້ເນັ້ນໃຫ້ເມືອງສືບຕໍ່ເປັນເຈົ້າການໃນການຄົ້ນຄວ້າ, ກຳແໜ້ນແນວທາງນະໂຍບາຍ, ມະຕິ, ຄຳສັ່ງ, ລະບຽບຂອງພັກ, ກົດໝາຍຂອງລັດໃຫ້ເລິກເຊິ່ງ ເພື່ອສຶກສາອົບຮົມພະນັກງານ, ສະມາຊິກພັກ ແລະ ປະຊາຊົນບັນດາເຜົ່າເປັນເຈົ້າການເຂົ້າຮ່ວມຂະບວນການຕ່າງໆ, ເສີ່ມຂະຫຍາຍຈິດໃຈເພິ່ງຕົນເອງ, ກຸ້ມຕົນເອງ ແລະ ສ້າງຄວາມເຂັ້ມແຂງດ້ວຍຕົນເອງ ໃນການແກ້ໄຂຄວາມຫຍຸ້ງຍາກດ້ານເສດຖະກິດ-ການເງິນ, ເງິນຕາ ພ້ອມທັງສ້າງເສດຖະກິດເອກະລາດເປັນເຈົ້າຕົນເອງໃຫ້ດີຂຶ້ນເປັນກ້າວໆ.
(ຂ່າວ: ວົງສະຫວັນ ສຸທິໂວຫານ)
ຄໍາເຫັນ