 |
ສະຫາຍບົວຄຳ ຮຽງລາເຢ ຮອງເລຂາພັກເມືອງ ປະທານຄະນະກຳມະການປົກຄອງເມືອງ,ໄດ້ສະຫຼຸບຕີລາຄາການນຳພາ-ຊີ້ນຳວຽກງານຮອບດ້ານ ຂອງຄະນະບໍລິຫານງານພັກເມືອງປະຈໍາ 6 ເດືອນຕົ້ນປີ ແລະ ທິດທາງແຜນການປະຈໍາ 6 ເດືອນທ້າຍປີ 2026, ໄດ້ຮັບຟັງການລາຍງານແຜນພັດທະນາເສດຖະກິດ-ສັງຄົມ ແລະ ງົບປະມານແຫ່ງລັດ 6 ເດືອນຕົ້ນປີ ແລະ ວາງທິດທາງແຜນການ 6 ເດືອນທ້າຍປີ 2026 ແລະວຽກງານອື່ນໆ ເຊິ່ງໄດ້ຍົກໃຫ້ເຫັນຜົນງານພົ້ນເດັ່ນ, ຂໍ້ສະດວກ, ທ່າແຮງ ແລະ ຂໍ້ຄົງຄ້າງທີ່ຈະຕ້ອງໄດ້ສືບຕໍ່ສູ້ຊົນປັບປຸງແກ້ໄຂໃນຕໍ່ໜ້າ.
ຜົນການປະຕິບັດຕົວຈິງສະແດງເຫັນວ່າ ເສດຖະກິດຂອງເມືອງ ຍັງຂະຫຍາຍຕົວໃນລະດັບ 1.38% ຄິດເປັນມູນຄ່າ 379 ຕື້ກວ່າກີບ,ສະເລ່ຍລາຍຮັບ 13 ລ້ານກວ່າກີບຕໍ່ຄົນຕໍ່ປີ (ເທົ່າກັບ 631 ໂດລາ) ໃນນັ້ນ, ຂະແໜງກະສິກຳຂະຫຍາຍຕົວ 1.57% (ກວມ 53.93% ຂອງ LGDP), ອຸດສາຫະກຳຂະຫຍາຍຕົວ 2.15% ກວມເອົາ 21.48% ຂອງ LGDP ແລະ ການບໍລິການຂະຫຍາຍຕົວ 0.88% ກວມເອົາ 24.58% ຂອງ LGDP.
ດ້ານການຜະລິດກະສິກຳໄດ້ສຸມໃສ່ຢ່າງຕັ້ງໜ້າ ການເຮັດນາແຊງປະຕິບັດໄດ້ 13 ເຮັກຕາ, ຜົນຜະລິດ 28,6ໂຕນ, ເກັບກູ້ຜົນຜະລິດພືດຜັກລະດູແລ້ງ 335 ໂຕນ; ກ້ວຍ 45 ໂຕນ,ໄມ້ກິນໝາກ 335 ໂຕນ ແລະ ກະກຽມຄວາມພ້ອມຜະລິດລະດູຝົນ 4,517.9 ເຮັກຕາ,ຜົນຜະລິດໃຫ້ໄດ້ 15,755 ໂຕນ,ເກັບກູ້ໝາກກະເຟ 75.8 ໂຕນ(ໝາກຂາວ),ມັນຕົ້ນ11,503.3 ໂຕນ(ມັນຕົ້ນແຫ້ງ), ການຜະລິດແປ້ງມັນຕົ້ນຂອງບໍລິສັດອານຕວນ ຈໍານວນ 2,000 ໂຕນ ແລະ ສົ່ງອອກ1,710 ໂຕນ, ເກັບກູ້ອ້ອຍ 2+3 ປະຕິບັດ19,695 ໂຕນ,ກະກຽມຜະລິດເປັນສິນຄ້າລະດູຝົນມີ 3,763 ເຮັກຕາ,ຜົນຜະລິດໃຫ້ໄດ້ 75,017 ໂຕນ, ການລ້ຽງສັດປະຕິບັດ 21,896 ໂຕ, ນໍາເຂົ້າສັດລ້ຽງ 1,257 ໂຕແລະວຽກອື່ນໆອີກ.
ໃນຂະນະທີ່ ການຄຸ້ມຄອງງົບປະມານລາຍຮັບ 8 ຕື້ກວ່າກີບ,ໃນນັ້ນ ຈາກອາກອນ 7 ຕື້ກວ່າກີບ,ພາສີທີ່ດິນ 43 ລ້ານກວ່າກີບ,ຊັບສິນລັດ 607 ລ້ານກວ່າກີບ ແລະ ປະຕິບັດລາຍຈ່າຍງົບປະມານ 21 ຕື້ກວ່າກີບ; ການຄຸ້ມຄອງການລົງທຶນມີ 21 ໂຄງການ, ມູນຄ່າ 58 ຕື້ກວ່າກີບແລະອື່ນໆ.
ສະຫາຍ ຫັດສະໄນ ສີບຸນເຫຼືອງ ໄດ້ເນັ້ນໃຫ້ຄະນະພັກ, ຄະນະນຳທຸກຂັ້ນ ຈົ່ງນຳເອົາເນື້ອໃນມະຕິກອງປະຊຸມຄັ້ງນີ້ໄປຈັດຕັ້ງເຊື່ອມຊຶມ, ຜັນຂະຫຍາຍ ແລະ ຈັດຕັ້ງປະຕິບັດເຂົ້າໃນວຽກງານຕົວຈິງໃຫ້ປະກົດຜົນເປັນຈິງແລະສຳເລັດຕາມຄາດໝາຍ.
ຂ່າວໂດຍ: ເມືອງຊານໄຊ
ຄໍາເຫັນ