ກອງປະຊຸມຄົບຄະນະພັກເມືອງຊະນະຄາມຄັ້ງທີ 16 ສະໄໝທີ VII

ກອງປະຊຸມຄົບຄະນະບໍລິຫານງານພັກເມືອງຊະນະຄາມຄັ້ງທີ 16 ສະໄໝທີ VII ຂອງອົງຄະນະພັກເມືອງຊະນະຄາມ ໄດ້ເປີດຂຶ້ນໃນວັນທີ 3 ຕຸລານີ້ ທີ່ຫ້ອງປະຊຸມໃຫຍ່ ຂອງເມືອງຊະນະຄາມ ພາຍໃຕ້ການເປັນປະທານ ຂອງສະຫາຍ ແກ້ວ ພິມມະວົງ ກຳມະການພັກແຂວງ ເລຂາພັກເມືອງ ເຈົ້າເມືອງຊະນະຄາມ, ໃນກອງປະຊຸມຍັງໄດ້ເປັນກຽດຕ້ອນຮັບ ສະຫາຍ ດາວເຮືອງ ນັນທະວົງ ກຳມະການປະຈຳພັກແຂວງ ຮອງເຈົ້າແຂວງວຽງຈັນ ພ້ອມດ້ວຍການນຳຂັ້ນແຂວງ, ມີຄະນະປະຈຳພັກເມືອງ, ກຳມະການພັກເມືອງ, ເລຂາຄະນະພັກຮາກຖານ ເລຂາໜ່ວຍພັກ ຫົວໜ້າຫ້ອງການ ອ້ອມຂ້າງເມືອງ ແລະ ເລຂາພັກບ້ານ-ນາຍບ້ານຢູ່ພາຍໃນເມືອງເຂົ້າຮ່ວມຢ່າງພ້ອມພຽງ.
   ໃນກອງປະຊຸມຍັງໄດ້ຮັບຟັງການເຜີຍແຜ່ເຊື່ອມຊຶມຄໍາສັ່ງແນະນໍາ ຂອງຄະນະເລຂາທິການສູນກາງພັກເລກທີ 411/ຄລສພ ລົງວັນທີ 8 ສິງຫາ 2023 ວ່າດ້ວຍການກະກຽມ ແລະ ດຳເນີນກອງປະຊຸມໃຫຍ່ 3 ຂັ້ນ ຂອງພັກ; ຄຳເເນະນໍາ ຂອງຄະນະຈັດຕັ້ງສູນກາງພັກເລກທີ 211/ຄຈສພ, ລົງວັນທີ 16 ສິງຫາ 2023, ການຈັດຕັ້ງປະຕິບັດຄຳສັ່ງແນະນຳ ຂອງຄະນະເລຂາທິການສູນກາງພັກ ວ່າດ້ວຍການກະກຽມ ແລະດຳເນີນກອງປະຊຸມໃຫຍ່ 3 ຂັ້ນ ຂອງພັກ; ພ້ອມນີ້ໃນວາລະການດໍາເນີນກອງປະຊຸມດັ່ງກ່າວ ຍັງໄດ້ຮັບຟັງການຜ່ານບົດລາຍງານການນຳພາ-ຊີ້ນຳການຈັດຕັ້ງປະຕິບັດວຽກງານຮອບດ້ານ ຂອງຄະນະບໍລິຫານງານພັກເມືອງຊະນະຄາມໄລຍະ 3 ເດືອນ (7-9) ແລະວຽກງານຈຸດສຸມ 3 ເດືອນຕໍ່ໜ້າ; ພ້ອມທັງລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ຕິດພັນກັບແຜນງົບປະມານ ແລະຄຸ້ມຄອງລາຍຮັບ-ລາຍຈ່າຍ, ການຈັດຕັ້ງຜັນຂະຫຍາຍ 2 ວາລະແຫ່ງຊາດຕິດພັນກັບການແກ້ໄຂປະກົດການຫຍໍ້ທໍ້ດ້ານຕ່າງໆ ຢູ່ໃນຂອບເຂດຄວາມຮັບຜິດຊອບຂອງຕົນ;ໃນກອງປະຊຸມຍັງໄດ້ປະກອບ ຄຳຄິດ-ຄຳເຫັນໃສ່ຮ່າງບົດສະຫຼຸບດ້ວຍຄວາມຮັບຜິດຊອບສູງ ໃນການນຳພາ-ຊີ້ນຳ ຂອງອົງຄະນະພັກເມືອງໃນແຕ່ລະດ້ານຕາມບົດສະຫຼຸບ ຊອກໄດ້ເຖິງດ້ານດີ, ດ້ານອ່ອນ ຂໍ້ຄົງຄ້າງ ພ້ອມກັນແກ້ໄຂບັນດາປະກົດການຫຍໍ້ທໍ້ທີ່ເກີດຂຶ້ນພາຍໃນເມືອງ ທີ່ເປັນບັນຫາກົດໜ່ວງການພັດທະນາເສດຖະກິດ-ສັງຄົມ, ໄດ້ຄົ້ນຄ້ວາຊອກຫາ ແລະກຳນົດວິທີການທີ່ເທດເໝາະຂອງແຕ່ລະຂົງເຂດວຽກງານ ເພື່ອເປັນພື້ນຖານໃຫ້ແກ່ການພັດທະນາເພື່ອຍົກລະດັບຊີວິດການເປັນຢູ່ຂອງປະຊາຊົນພາຍໃນເມືອງ ໃຫ້ນັບມື້ນັບດີຂຶ້ນ ໃຫ້ກ້າວໄປສູ່ ຄວາມມັ່ງຄັ່ງ ເຂັ້ມແຂງ ສັງຄົມມີຄວາມຍຸຕິທຳ ສີວິໄລ.
   ໃນຕອນທ້າຍກອງປະຊຸມຍັງໄດ້ມີການມອບ-ຮັບ ໃບຢັ້ງຢືນໜ່ວຍພັກ, ປອດໃສ, ເຂັ້ມແຂງ, ໜັກ    ແໜ້ນປະຈຳປີ 2022 ຈໍານວນ 83 ໃບ ໃຫ້ແກ່ບັນດາໜ່ວຍພັກໃນທົ່ວເມືອງ ພ້ອມທັງຈັດພິທີມອບ-ຮັບຢ່າງສົມກຽດ. 
(ພາບ-ຂ່າວ ເມືອງຊະນະຄາມ)