ກຳມະການສູນກາງພັກ ເລຂາພັກ ເຈົ້າແຂວງສະຫວັນນະເຂດ, ມີສະຫາຍ ນາງ ບຸດສະດີ ທະນະເມືອງ ກຳມະການສູນກາງພັກ ຮອງຫົວໜ້າຄະນະຈັດຕັ້ງສູນກາງພັກ, ມີແຂກຖືກເຊີນ ແລະ ພາກສ່ວນກ່ຽວຂ້ອງເຂົ້າຮ່ວມ.
ໃນວາລະປະຊຸມ,ສະຫາຍ ວາລີຍະ ສີຈັນທອງທິບ ກຳມະການພັກແຂວງ ເລຂາພັກເມືອງ ເຈົ້າເມືອງວິລະບຸລີ ໄດ້ກ່າວເປີດກອງປະຊຸມຢ່າງເປັນທາງການ. ຈາກນັ້ນ, ສະຫາຍ ທອງໄຫຼ ວິໄລພອນ ຮອງເລຂາພັກເມືອງ ຜູ້ຊີ້ນຳວຽກພັກ-ພະນັກງານໄດ້ຜ່ານບົດລາຍງານການເມືອງຕໍ່ກອງປະຊຸມ, ຊຶ່ງໄດ້ຕີລາຄາຄືນຜົນຂອງການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ V, ຊຶ່ງຕະຫຼອດໄລຍະ 5 ປີທີ່ຜ່ານມາ, ມີທັງກາລະໂອກາດ ແລະ ສິ່ງເອື້ອອຳນວຍຄວາມສະດວກຫຼາຍດ້ານເປັນຕົ້ນ: ລະບົບການເມືອງມີສະຖຽນລະພາບ, ມີຄວາມໜັກແໜ້ນ, ເຂັ້ມແຂງ, ສັງຄົມມີຄວາມສະຫງົບເປັນລະບຽບຮຽບຮ້ອຍ, ເປັນເມືອງພື້ນຖານການປະຕິວັດ, ປະຊາຊົນມີມູນເຊື້ອອາດຫານ, ເຊື່ອໝັ້ນຕໍ່ການນໍາພາຂອງພັກ, ເປັນເມືອງທີ່ມີຄວາມອຸດົມສົມບູນທາງທຳມະຊາດ, ວັດທະນະທຳ, ປະຫວັດສາດ, ມີເສັ້ນທາງເລກ 10, 28A ຜ່ານ ແລະ ເຊື່ອມຕິດກັບເມືອງອາດສະພອນ, ເຊໂປນ, ບົວລະພາ ແລະ ໂຄງການຂຸດຄົ້ນຄຳ-ທອງລະດັບໃຫຍ່ຂອງຊາດຕັ້ງຢູ່.
ສະຫາຍ ໄພມະນີ ວົງໄຊຄຳ ຄະນະປະຈຳພັກເມືອງ ຮອງເຈົ້າເມືອງໄດ້ລາຍງານຕໍ່ກອງປະຊຸມກ່ຽວກັບແຜນພັດທະນາເສດຖະກິດ-ສັງຄົມຂອງເມືອງ ໃຫ້ຮູ້ວ່າ: ການຜັນຂະຫຍາຍມະຕິກອງປະຊຸມໃຫຍ່ຄັ້ງທີ V ຂອງອົງຄະນະພັກເມືອງໃນໄລຍະຜ່ານມາເຫັນວ່າດ້ານໂຄງປະກອບທາງດ້ານເສດຖະກິດໄດ້ດຳເນີນໄປຖືກທິດ ແລະ ຂະຫຍາຍຕົວຕໍ່ເນື່ອງສະເລ່ຍ 7.6%ຕໍ່ປີ, ລວມຍອດຜະລິດຕະພັນພາຍໃນ (GDP) ບັນລຸໄດ້ 2,071 ຕື້ກວ່າກີບ, ສະເລ່ຍຕໍ່ຫົວຄົນ 10.48 ລ້ານກີບ/ຄົນ/ປີ ຫຼື ເທົ່າກັບ 1,219 ໂດລາສະະລັດ/ຄົນ/ປີ, ທົ່ວເມືອງສາມາດຜະລິດເຂົ້າເປືອກໄດ້ 92 ພັນໂຕນ, ເນື້ອທີ່ປູກເຂົ້າແຕ່ລະປີ 5,450 ເຮັກຕາ, ສະເລ່ຍໃສ່ຫົວຄົນຜູ້ໜຶ່ງໄດ້ຮັບເຂົ້າເປືອກ 390 ກິໂລກະຣາມ/ຄົນ/ປີ, ປູກພືດລະບຽງອາຫານບັນລຸ 6 ແສນກວ່າໂຕນ, ເນື້ອທີ່ປູກໄມ້ອຸດສາຫະກຳເພີ່ມຂຶ້ນ 3.690 ກວ່າເຮັກຕາ, ການລ້ຽງສັດ ແລະ ການປະມົງເພີ່ມຂຶ້ນສະເລ່ຍ 21%.
ກອງປະຊຸມຄັ້ງນີ້, ບັນດາຜູ້ແທນກອງປະຊຸມໄດ້ປະກອບຄຳເຫັນຢ່າງກົງໄປກົງມາ. ໃນນີ້, ມີການປະກອບຄຳເຫັນຈາກຕາງໜ້າຂົງເຂດ ປກຊ-ປກສ, ຂົງເຂດເສດຖະກິດ, ຂົງເຂດວັດທະນະທຳ-ສັງຄົມ, ຕາງໜ້າໜ່ວຍພັກປອດໃສ, ເຂັ້ມແຂງ, ໜັກແໜ້ນ, ຕາງໜ້າຄອບຄົວຄົວແບບປູກກ້ວຍ, ຕາງໜ້າກຸ່ມສະຫະກອນປູກໜາກກ້ຽງ, ຕາງໜ້າເມືອງເຊໂປນ, ເມືອງໄຊບົວທອງ, ໄດ້ປະກອບຄຳເຫັນຕໍ່ກອງປະຊຸມ. ກອງປະຊຸມຄັ້ງນີ້, ມີຜູ້ແທນສົມບູນຈຳນວນ 161 ສະຫາຍ ຍິງ 11ສະຫາຍ ແລະ ຈະໄດ້ລົງຄະແນນສຽງເລືອກເອົາຄະນະບໍລິຫານງານພັກເມືອງວິລະບູລີດ້ວຍຊຸດໃໝ່.
(ແຫຼ່ງຂ່າວ: ແຂວງສະຫວັນນະເຂດ)
ຄໍາເຫັນ