ກອງປະຊຸມໃຫຍ່ຜູ້ແທນສະມາຊິກພັກ ຄັ້ງທີ VI ອົງຄະນະພັກ ຄອສພ ເປີດຂຶ້ນຢ່າງເປັນທາງການ

ໃນພິທີ, ສະຫາຍ ຄໍາພັນ ເຜີຍຍະວົງ ໄດ້ກ່າວເປີດກອງປະຊຸມວ່າ: ກອງປະຊຸມໃຫຍ່ຄັ້ງທີ VI ນີ້, ຈະໄດ້ສຸມໃສ່ໜ້າທີ່ສໍາຄັນຄື: ຄົ້ນຄວ້າ, ປະກອບຄໍາເຫັນ ແລະ ຮັບຮອງເອົາລາຍງານການເມືອງ ຂອງຄະນະພັກ ຄອສພ ຊຶ່ງເປັນເອກະສານສໍາຄັນກ່ຽວກັບການສະຫຼຸບຕີລາຄາການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ V ແລະ ທິດທາງໜ້າທີ່ຈຸດສຸມວຽກງານໂຄສະນາອົບຮົມໃນໄລຍະ 5 ປີ (2026-2030) ເພື່ອປະກອບສ່ວນເຂົ້າໃນການຈັດຕັ້ງປະຕິບັດມະຕິກອງປະຊຸມໃຫຍ່ ຄັ້ງທີ XII ຂອງພັກ ເຂົ້າສູ່ຊີວິດຕົວຈິງ ໃຫ້ບັນລຸຜົນສໍາເລັດຕາມຄາດໝາຍທີ່ວາງໄວ້; ຄົ້ນຄວ້າປະກອບຄໍາເຫັນ ຮັບຮອງເອົາແຜນພັດທະນາວຽກງານໂຄສະນາອົບຮົມ 5 ປີ (2026-2030); ຄົ້ນຄວ້າປະກອບຄໍາເຫັນໃສ່ບົດສໍາຫຼວດການນໍາພາຂອງ ຄອສພ ໃນໄລຍະ 5 ປີ ຜ່ານມາ ແນໃສ່ປັບປຸງ ແລະ ຍົກສູງບົດບາດການນໍາພາຂອງອົງຄະນະພັກ ຄອສພ ໃນຊຸມປີຕໍ່ໜ້າ ໃຫ້ສົມຄູ່ກັບໜ້າທີ່ການເມືອງ ທີ່ພັກໄດ້ມອບໝາຍໃຫ້ ພ້ອມນີ້, ຈະໄດ້ດໍາເນີນການເລືອກຕັ້ງເອົາຄະນະພັກຄະນະໂຄສະນາອົບຮົມສູນກາງພັກຊຸດໃໝ່ ເພື່ອສືບຕໍ່ຊີ້ນໍາ-ນໍາພາ ໃນໄລຍະ 5 ປີ ຕໍ່ໜ້າ.
ຈາກນັ້ນ, ສະຫາຍ ວັນສີ ກົວມົວ ກຳມະການສູນກາງພັກ ຮອງເລຂາຄະນະພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຂຶ້ນຜ່ານຮ່າງລາຍງານການເມືອງ, ສະຫາຍ ຄຳມອນ ຈັນທະຈິດ ກຳມະການສຳຮອງສູນກາງພັກ ຮອງຫົວໜ້າຄະນະໂຄສະນາອົບຮົມສູນກາງພັກ ໄດ້ຂຶ້ນຜ່ານແຜນພັດທະນາວຽກງານໂຄສະນາອົບຮົມ 5 ປີ (2026-2030), ກອງປະຊຸມ ຍັງໄດ້ປະກອບຄຳເຫັນ ໃນຫົວຂໍ້” ການນຳພາຂອງພັກໃນການປັບປຸງກົງຈັກການຈັດຕັ້ງຄະນໂຄສະນາອົບຮົມສູນກາງພັກ”, ຫົວຂໍ້”ບົດບາດການຄົ້ນຄົ້ວທິດສະດີ ແລະ ພຶດຕິກຳ (ຮັບໃຊ້ວຽກງານໂຄສະນາອົບຮົມ), ຫົວຂໍ້”ພັກນຳພາຕໍ່ອົງການຈັດຕັ້ງມະຫາ ຊົນ” ແລະ ຫົວຂໍ້”ບົດບາດວຽກງານສື່ມວນຊົນພາຍຫຼັງຍົກຍ້າຍມາຂຶ້ນກັບ ຄອສພ”, ກອງປະຊຸມ ຍັງໄດ້ຜ່ານຮ່າງບົດສຳຫຼວດ ການນຳພາຂອງອົງຄະນະພັກຊຸດເກົ່າ, ຜ່ານມາດຖານເງື່ອນໄຂຜູ້ອອກສະໝັກຮັບເລືອກຕັ້ງຄະນະພັກຊຸດໃໝ່ ແລະ ຜ່ານມະຕິຕົກລົງ ລາຍຊື່ບຸກຄະລາກອນທີ່ຈະອອກຮັບສະໝັກເລືອກຕັ້ງເຂົ້າໃນຄະນະບລິຫານງານພັກຊຸດໃໝ່ ແລະ ດຳເນີນການປ່ອນບັດເລືອກຕັ້ງ, ກອງປະຊຸມໃຫຍ່ຍັງຈະໄດ້ຮັບຟັງການໂອ້ລົມຂອງ ສະຫາຍ ພົນເອກ ວິໄລ ຫຼ້າຄໍາຟອງ ເພື່ອເປັນທິດເຍືອງທາງ ແລະ ເປັນບ່ອນອີງໃຫ້ແກ່ການເຄື່ອນໄຫວວຽກງານຂອງອົງຄະນະພັກ ຄອສພ ໃນຕໍ່ໜ້າ. (ຂ່າວ-ພາບ: ສໍານານ-ວັນເພັງ)