 |
ຈຸດປະສົງເພື່ອສ້າງຄວາມຮັບຮູ້ ແລະ ເຂົ້າໃຈຢ່າງເລິກເຊິ່ງ ຕໍ່ເນື້ອໃນປຶ້ມຄູ່ມືຂົງເຂດເສດຖະກິດ-ການເງິນ ຊຶ່ງກອງປະຊຸມໄດ້ສະເໜີເນື້ອໃນຄວາມຮູ້ພື້ນຖານກ່ຽວກັບເສດຖະສາດ, ແຜນພັດທະນາເສດຖະ ກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ, ການຄຸ້ມຄອງການລົງທຶນ ແລະ ການຕິດຕາມກວດກາວຽກງານດັ່ງກ່າວ ແນໃສ່ສ້າງເງື່ອນໄຂໃຫ້ສຳມະນາກອນ ແລະ ວິທະຍາກອນ ໄດ້ມີການຄົ້ນຄວ້າ ແລະ ແລກປ່ຽນບົດຮຽນຮ່ວມກັນ ເພື່ອເຂົ້າໃຈບັນຫາໃຫ້ເລິກເຊິ່ງ ແລະ ສາມາດນຳເອົາບົດຮຽນເຫຼົ່ານີ້ ໄປຜັນຂະຫຍາຍ ແລະ ນຳໃຊ້ໃນພາກປະຕິບັດຕົວຈິງໃຫ້ໄດ້ຮັບໝາກຜົນຢ່າງແທ້ຈິງ.
ທ່ານ ຈັນທະບູນ ສຸກອາລຸນ ໄດ້ກ່າວວ່າ: ກອງປະຊຸມຄັ້ງນີ້ ເພື່ອສ້າງຄວາມຮັບຮູ້ ແລະ ເຂົ້າໃຈ ຕໍ່ການປະຕິບັດພາລະບົດບາດທີ່ສຳຄັນຂອງສະພາແຫ່ງຊາດ ກໍຄືສະພາປະຊາຊົນຂັ້ນແຂວງ ໃນຖານະເປັນອົງການນິຕິບັນຍັດ, ເປັນອົງການພິຈາລະນາບັນຫາສໍາຄັນຂອງຊາດ ແລະ ເປັນອົງການຕິດຕາມກວດກາການປະຕິບັດໜ້າທີ່ຂອງອົງການບໍລິຫານ ໂດຍສະເພາະແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ ຊຶ່ງຖືເປັນວຽກໜຶ່ງທີ່ສຳຄັນ ແລະ ເປັນເສັ້ນເລືອດໃຫຍ່ ທັງເປັນປັດໄຈຕັດສິນຊີ້ຂາດຕໍ່ການປະຕິບັດແຜນພັດທະນາເສດຖະກິດ-ສັງຄົມ ຂອງປະເທດເຮົາ ແລະ ສ້າງຄວາມເຂັ້ມແຂງ, ຍົກລະດັບຄວາມຮູ້, ພັດທະນາທັກສະການວິເຄາະວິໄຈ ເພື່ອຕິດຕາມມະຕິ ແລະ ສາມາດຕັ້ງຄຳຖາມຕໍ່ອົງການບໍລິຫານ ແລະ ການສ້າງຄວາມເປັນມືອາຊີບ ໃຫ້ແກ່ ສສຊ ແລະ ສສຂ; ທ່ານຍັງກ່າວຕື່ມອີກວ່າ: ເອກະສານໄດ້ຜ່ານການຄົ້ນຄວ້າ, ຮຽບຮຽງ ແລະ ກັ່ນຕອງຢ່າງລະອຽດຖີ່ຖ້ວນພໍສົມຄວນຈາກຄະນະຮັບຜິດຊອບ ແລະ ຜູ້ຊ່ຽວຊານ ຊຶ່ງໄດ້ກຳນົດຂອບເຂດສິດ, ໜ້າທີ່, ຫຼັກການເຮັດວຽກ ຕະຫຼອດຮອດຂັ້ນຕອນການຄຸ້ມຄອງ-ບໍລິຫານດ້ານງົບປະມານ, ການເງິນ, ການລົງທຶນ, ເງິນ ຕາ ໃຫ້ມີຄວາມເປັນເອກະພາບ, ຖືກຕ້ອງຕາມຂັ້ນຕອນກົດໝາຍ ແລະ ລະບຽບການ ເຮັດໃຫ້ການພິຈາລະນາບັນຫາພື້ນ ຖານກ່ຽວກັບເສດຖະກິດ-ການເງິນ ມີປະສິດທິພາບ, ປະສິດທິຜົນ.
ກອງປະຊຸມໄດ້ຮັບຟັງການລາຍງານຜົນສໍາເລັດການສ້າງປຶ້ມຄູ່ມືກໍາມາທິການເສດຖະກິດ ແລະ ການເງິນ ຊຶ່ງປະກອບມີ 7 ຫົວຄື: 1. ປຶ້ມຄູ່ມືການພິຈາລະນາຮັບຮອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ; 2. ປຶ້ມຄູ່ມືຕົວຊີ້ວັດມະຕິກອງປະຊຸມສະພາແຫ່ງຊາດ ກ່ຽວກັບແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນນຕາ; 3. ປຶ້ມຄູ່ມືການຕິດຕາມກວດກາແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນນຕາ; 4. ປຶ້ມຄວາມຮູ້ພື້ນຖານການເງິນ ແລະ ງົບປະມານ ເພື່ອການພິຈາລະ ນາຮັບຮອງແຜນງົບປະມານແຫ່ງລັດ; 5. ປຶ້ມຄວາມຮູ້ພື້ນຖານເງິນຕາ ແລະ ທະນາຄານ ເພື່ອການພິຈາລະນາຮັບຮອງແຜນເງິນຕາ; 6. ປຶ້ມຄວາມຮູ້ພື້ນຖານເສດຖະສາດ, ການວາງແຜນ ແລະ ການລົງທຶນ ເພື່ອການພິຈາລະນາຮັບຮອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ; 7. ຄວາມຮູ້ພື້ນຖານສະຖິຕິ ແລະ ວິທີວິໄຈປະລິມານ ເພື່ອການພິຈາລະນາຮັບຮອງແຜນພັດທະນາເສດຖະກິດ-ສັງຄົມແຫ່ງຊາດ, ແຜນງົບປະມານແຫ່ງລັດ ແລະ ແຜນເງິນຕາ. ນອກຈາກນັ້ນ, ຍັງໄດ້ມີການມອບ-ຮັບບັນດາປຶ້ມຄູ່ມືຕ່າງໆ ໃຫ້ສະພາປະຊາຊົນແຂວງ 6 ແຂວງອີກດ້ວຍ. (ຂ່າວ: ສພຊ)
ຄໍາເຫັນ