 |
ກອງປະຊຸມໄດ້ຮັບຟັງບົດລາຍງານການເຄື່ອນໄຫວວຽກງານໃນຕະຫຼອດໄລຍະສົກຮຽນ 2024-2025 ການຈັດຕັ້ງປະຕິບັດແຜນພັດທະນາຂະແໜງການສຶກສາ, ວິທະຍາສາດ ແລະ ກິລາ ໃນສົກຮຽນ 2024-2025 ແມ່ນເປັນປີມ້ວນທ້າຍຂອງການຈັດຕັ້ງແຜນພັດທະນາຂະແໜງການສຶກສາ ແລະ ກິລາ 5 ປີ ຄັ້ງ IX (2021-2025) ແລະ ເປັນໄລຍະທີ່ການພັດທະນາການສຶກສາຍັງສືບຕໍ່ໄດ້ຮັບຜົນກະທົບຈາກສະພາບຂໍ້ຫຍຸ້ງຍາກທາງດ້ານເສດຖະກິດ, ການເງິນ ແລະ ບັນຫາທາງສັງຄົມອື່ນໆ ສົມທົບກັບການສະ ໜອງໂກຕ້າລັດຖະກອນຄູໃໝ່ທີ່ມີຈຳກັດ ອັນໄດ້ສົ່ງຜົນກະທົບທາງລົບຕໍ່ການເຂົ້າຮຽນຂອງນັກຮຽນ ແລະ ການປະລະການຮຽນຂອງນັກຮຽນໃນທຸກລະດັບ ພາຍໃຕ້ການນໍາພາຊີ້ນໍາຂອງຄະນະນຳກະຊວງສຶກສາທິການ ແລະ ກິລາ, ຄວາມເອົາໃຈໃສ່ ແລະ ເປັນເຈົ້າການຂອງຜູ້ບໍລິຫານການສຶກສາ, ວິທະຍາສາດ ແລະ ກິລາທຸກຂັ້ນ ນັບແຕ່ສູນກາງຮອດທ້ອງຖິ່ນ ແລະ ການປະສານງານກັບທຸກພາກສ່ວນ ລວມທັງກັບບັນດາຄູ່ຮ່ວມພັດທະນາຕ່າງໆ, ກະຊວງສຶກສາທິການ ແລະ ກິລາ ກໍໄດ້ສຸມທຸກຄວາມພະຍາຍາມເຂົ້າໃນການສົ່ງເສີມການເຂົ້າເຖິງການສຶກສາຢ່າງເທົ່າທຽມ ຜ່ານການປັບປຸງພື້ນຖານໂຄງລ່າງຂອງສະຖານການສຶກສາຕ່າງໆ, ການສະໜອງອາຫານທ່ຽງໃນໂຮງຮຽນໃຫ້ແກ່ນັກຮຽນໃນຊັ້ນການສຶກສາກ່ອນໄວຮຽນ ແລະ ສາມັນສຶກສາ, ເພີ່ມການສະໜອງເງິນອຸດໜູນເບ້ຍລ້ຽງນັກຮຽນ ນັກສຶກສາ ທຸກຊັ້ນທຸກສາຍ ແລະ ໄດ້ເອົາໃຈໃສ່ແກ້ໄຂບັນຫາການປະລະການຮຽນ ແລະ ການປັບປຸງຄຸນນະພາບການຮຽນການສອນໃນທຸກລະດັບ. ນອກຈາກນີ້, ຍັງໄດ້ສົ່ງເສີມການຄົ້ນຄວ້າວິທະຍາສາດ ແລະ ນະວັດຕະກໍາ, ພ້ອມທັງໄດ້ປັບປຸງຄຸນນະພາບ ໃນການຄັດເລືອກຫົວຂໍ້ຄົ້ນຄວ້າ ແລະ ຜົນການຄົ້ນຄວ້າວິທະຍາສາດ, ນະວັດຕະກຳ, ສໍາລັບວຽກງານກິລາກາຍຍະກຳ ກໍໄດ້ສົ່ງເສີມການອອກກຳລັງກາຍຂອງທົ່ວປວງຊົນລາວ ລວມທັງເຮັດໜ້າທີ່ສົ່ງເສີມກິລາອາຊີບ ຂະແໜງສຶກສາທິການ ແລະ ກິລາໄດ້ສືບຕໍ່ເອົາໃຈໃສ່ປະຕິບັດຕາມທິດຊີ້ນຳຂອງລັດຖະບານ ໂດຍສະເພາະແມ່ນໄດ້ຮ່ວມມືກັບຂະແໜງການທີ່ກ່ຽວຂ້ອງ, ອົງການປົກຄອງຂັ້ນທ້ອງຖິ່ນ, ຊຸມຊົນ ແລະ ຜູ້ປົກຄອງໃນການສົ່ງເສີມໃຫ້ເດັກໄດ້ເຂົ້າຮຽນ, ການປັບປຸງໂຄງລ່າງພື້ນຖານ, ການສະ ໜອງອຸປະກອນການຮຽນ-ການສອນ ແລະ ສິ່ງອໍານວຍຄວາມສະດວກຕ່າງໆ ພ້ອມທັງໄດ້ຈັດຕັ້ງປະຕິບັດຫຼາຍມາດຕະການເພື່ອປັບປຸງຄຸນນະພາບການສຶກສາ ເພື່ອໃຫ້ບັນລຸໄດ້ບັນດາຄາດໝາຍຕ່າງໆໃນມະຕິກອງປະຊຸມສະພາແຫ່ງຊາດ ວ່າດ້ວຍການຮັບຮອງເອົາບົດລາຍງານຂອງລັດຖະບານ ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມແຫ່ງຊາດ ປະຈຳປີ 2024 ແລະ ທິດທາງແຜນການ ແລະ ແຜນລົງທຶນຂອງລັດ ປະຈາປີ 2025 .
ການຈັດຕັ້ງປະຕິບັດວຽກງານການສຶກສາກ່ອນໄວຮຽນມີທ່າອ່ຽງດີຂຶ້ນ ຊຶ່ງສະແດງອອກຜ່ານອັດຕາເຂົ້າຮຽນຂອງເດັກ 3-5 ປີ ໄດ້ເພີ່ມຂຶ້ນຈາກ 62.0% ມາເປັນ 64.4% ແລະ ອັດຕາເຂົ້າຮຽນຂອງເດັກ 5 ປີ ເພີ່ມຈາກ 82.9% ມາເປັນ 84.7%, ການປະກອບສ່ວນຂອງພາກເອກະຊົນແມ່ນມີບົດບາດສຳຄັນ ຊຶ່ງເຫັນໄດ້ຈາກສັດສ່ວນນັກຮຽນເອກະຊົນທຽບໃສ່ນັກຮຽນທັງໝົດແມ່ນເພີ່ມຂຶ້ນຈາກ 27.51% ມາເປັນ 28.74%. ການສຶກສາຊັ້ນປະຖົມສຶກສາໄດ້ຮັບການບັບປຸງທັງດ້ານປະລິມານ ແລະ ຄຸນນະພາບເຮັດໃຫ້ ອັດຕາເຂົ້າຮຽນໃໝ່ສຸດທີ່ຂັ້ນ ປ.1 ເພີ່ມຂຶ້ນ.
ການສຶກສາຊັ້ນມັດທະຍົມ: ກະຊວງສຶກສາທິການ ແລະ ກິລາ ໂດຍສົມທົບກັບ ພະແນກສຶກສາທິການ ແລະ ກິລາແຂວງ/ນະຄອນຫຼວງ, ຫ້ອງການສຶກສາທິການ ແລະ ກິລາເມືອງ/ນະຄອນ, ຊຸມຊົນ ແລະ ຄູ່ຮ່ວມພັດທະນາ ໄດ້ສືບຕໍ່ເອົາໃຈໃສ່ພັດທະນາການສຶກສາຊັ້ນມັດທະຍົມ ເຮັດໃຫ້ອັດຕາການເລື່ອນຊັ້ນຈົບ ປ.5 ຂຶ້ນ ມ.1 ເພີ່ມຂຶ້ນ ຈາກ 84.9% ຂຶ້ນເປັນ 85.6%.
ການສຶກສາຄູ: ໃນສົກຮຽນ 2024-2025, ໂຕເລກແຜນຮັບທັງໝົດ ຈໍານວນ 3,790 ໂຕເລກ ໃນນັ້ນ ມີໂຕເລກພະນັກງານຍົກລະດັບຕໍ່ເນື່ອງ ຈຳນວນ 1,810 ໂຕເລກ ແລະ ນັກຮຽນຈໍານວນ 1,980 ໂຕເລກ ຊຶ່ງສາມາດຈັດຕັ້ງປະຕິບັດໄດ້ຈໍານວນ 463 ຄົນ ຊຶ່ງຖ້າທຽບໃສ່ແຜນຮັບນັກຮຽນແມ່ນປະຕິບັດໄດ້ພຽງ 23.4%.
ຂະແໜງການຍ່ອຍອາຊີວະສຶກສາ: ໃນສົກຮຽນ 2024-2025 ມີນັກຮຽນ-ນັກສຶກສາເຂົ້າໃໝ່ 9,487 ຄົນ ທຽບໃສ່ສົກຮຽນ 2023-2024 ແມ່ນເພີ່ມຂຶ້ນ 1,532 ຄົນ.
ການສຶກສາຊັ້ນສູງ: ໃນສົກສຶກສາ 2024-2025 ມີນັກສຶກສາໃນສະຖານການສຶກສາຊັ້ນສູງ ລວມທັງໝົດ 38,841 ຄົນ ທຽບກັບປີທີ່ຜ່ານມາ ມີຈຳນວນຫຼຸດລົງ 9,037 ຄົນ ຫຼື 19%. ຍ້ອນຜົນສໍາເລັດຂອງການຈັດຕັ້ງປະຕິບັດບັນດາວຽກຈຸດສຸມຕ່າງໆ ຈຶ່ງເຮັດໃຫ້ຂະແໜງການສຶກສາ ແລະ ກິລາ ສາມາດບັນລຸໄດ້ 12 ຄາດໝາຍ ໃນຈໍານວນ 16 ຄາດໝາຍ ທີ່ກຳນົດໃນມະຕິສະພາແຫ່ງຊາດ ພ້ອມນີ້ກອງປະຊຸມຍັງໄດ້ວາງທິດທາງແຜນການໃນຕໍ່ໜ້າຕື່ມອີກ.
(ຂ່າວ-ພາບ: ຕຸໄລເພັດ)
ຄໍາເຫັນ