ກອງປະຊຸມສະໄໝສາມັນເທື່ອທີ 6ຂອງສະພາປະຊາຊົນແຂວງຫົວພັນ ຊຸດທີ II

ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງຫົວພັນ ຊຸດທີ II ໄດ້ດຳເນີນໃນລະຫວ່າງວັນທີ 2-4 ມັງກອນ 2024 ພາຍໃຕ້ການເປັນປະທານຂອງ ທ່ານ ນາງ ອຳໄພວອນ ລ້ອມບຸນແພງ ປະທານສະພາປະຊາຊົນແຂວງຫົວພັນ ໂດຍມີ ທ່ານ ຄຳແພງ ໄຊສົມແພງເຈົ້າແຂວງຫົວພັນ, ທ່ານ ຄຳແພງ ວິລະພັນປະທານກຳມາທິການຍຸຕິທໍາສະພາແຫ່ງຊາດ, ມີບັນດາການນຳແຂວງ, ສະມາຊິກສະພາແຫ່ງຊາດ ປະຈຳເຂດເລືອກຕັ້ງ, ສະພາປະຊາຊົນແຂວງ ແລະ ພາກສ່ວນກ່ຽວຂ້ອງ ເຂົ້າຮ່ວມ.
ທ່ານ ນາງ ອຳໄພວອນ ລ້ອມບຸນແພງ ໄດ້ກ່າວວ່າ: ກອງປະຊຸມຄັ້ງນີ້ຈະໄດ້ພິຈາລະນາ ແລະ ຕົກລົງ 11 ບັນຫາສໍາຄັນພື້ນຖານ ຂອງແຂວງ ເປັນຕົ້ນ ບົດລາຍງານ ຂອງທ່ານເຈົ້າ ແຂວງ ກ່ຽວກັບການເຄື່ອນໄຫວວຽກງານທີ່ພົ້ນເດັ່ນ ປະຈຳປີ 2023 ແລະ ທິດທາງຈຸດສຸມ ປະຈຳປີ 2024 ຂອງແຂວງຫົວພັນ; ບົດລາຍງານການຈັດຕັ້ງປະຕິບັດ ແຜນພັດທະນາເສດຖະກິດ-ສັງຄົມ ປະ ຈຳປີ 2023 ແລະ ທິດທາງແຜນການ ປະຈຳປີ 2024; ບົດລາຍງານການຈັດຕັ້ງປະຕິບັດ ແຜນງົບປະ ມານແຫ່ງລັດຂອງແຂວງ ປະຈຳປີ 2023 ແລະ ທິດທາງແຜນການ ປະຈຳປີ 2024; ບົດລາຍງານການຈັດຕັ້ງປະຕິບັດ 2 ວາລະແຫ່ງຊາດໃນໄລຍະ 3 ປີຜ່ານມາ (2021-2023) ຢູ່ແຂວງຫົວພັນ; ບົດສະຫລຸບ ການຈັດຕັ້ງປະຕິບັດແຜນການເຄື່ອນໄຫວວຽກງານ ປະຈຳປີ 2023 ທິດທາງແຜນການເຄື່ອນໄຫວວຽກງານ ປະຈຳປີ 2024 ຂອງອົງການກວດສອບປະຈຳພາກເໜືອ ແລະ ບົດລາຍງານຜົນການກວດສອບບົດສະຫລຸບຂາດຕົວ ການຈັດຕັ້ງປະຕິບັດແຜນງົບປະມານແຫ່ງລັດ ປະຈໍາປີ 2022; ບົດລາຍງານ ການຈັດຕັ້ງເຄື່ອນໄຫວວຽກງານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງອົງການກວດກາລັດ ແລະ ຕ້ານການສໍ້ລາດບັງຫລວງ; ບົດລາຍງານການຈັດຕັ້ງປະຕິບັດວຽກງານ ປະຈຳປີ 2023 ແລະ ທິດທາງແຜນການ ປະຈຳປີ 2024 ຂອງອົງການໄອຍະການ ແລະ ສານປະຊາຊົນ ແຂວງຫົວພັນ; ບົດລາຍງານ ການເຄື່ອນໄຫວວຽກງານ ແລະທິດທາງແຜນການຂອງສະພາປະຊາຊົນ ແຂວງຫົວພັນ; ບົດປະກອບຄຳເຫັນຂອງແນວລາວສ້າງຊາດ ຕາງໜ້າສະຫະພັນນັກຮົບເກົ່າ ແລະ ອົງການຈັດຕັ້ງມະຫາຊົນ ຕໍ່ກອງປະຊຸມສະໄໝສາມັນ ເທື່ອທີ 6 ຂອງສະພາປະຊາຊົນແຂວງ ຊຸດທີ II. ນອກຈາກນັ້ນ, ຍັງຈະໄດ້ຮັບຟັງການຊີ້ແຈງ, ອະທິບາຍ ຂອງພາກສ່ວນກ່ຽວຂ້ອງຈຳນວນໜຶ່ງຕໍ່ຄຳຊັກຖາມ ຂອງບັນດາສະມາຊິກສະພາປະຊາຊົນແຂວງ.
ຂ່າວ-ພາບ: ໄອແກ້ວ