ກອງປະຊຸມສະໄໝສາມັນເທື່ອທີ 7 ຂອງຄະນະບໍລິຫານງານພັກ ອອປສ

ອົງການໄອຍະການປະຊາຊົນສູງສຸດ (ອອປສ) ໄດ້ຈັດກອງປະຊຸມສະໄໝສາມັນເທື່ອທີ 7 ຂອງຄະນະບໍລິຫານງານພັກ ອອປສ ສະໄໝທີ V ຂຶ້ນໃນວັນທີ 8ມັງກອນຜ່ານມາ ທີ່ອົງການດັ່ງກ່າວ ໂດຍການເປັນປະທານຂອງສະຫາຍ ໄຊຊະນະ ໂຄດພູທອນກໍາມະການສູນກາງພັກເລຂາຄະນະບໍລິຫານງານພັກຫົວໜ້າອົງການ ອອປສ, ມີບັນດາສະຫາຍຄະນະປະຈຳພັກ, ບັນດາສະຫາຍ ກຳມະການຄະນະບໍລິຫານງານພັກເຂົ້າຮ່ວມ.
ກອງປະຊຸມຄັ້ງນີ້, ໄດ້ສະຫຼຸບຕີລາຄາຄືນການຊີ້ນຳ-ນຳພາວຽກງານຮອບດ້ານຂອງຄະນະບໍລິຫານງານພັກອອປສ ໂດຍສະເພາະບັນດາຄາດໝາຍ ແລະ ວຽກງານຈຸດສຸມຂອງກອງປະຊຸມສະໄໝສາມັນເທື່ອທີ 6ຜ່ານມາ. ພ້ອມນັ້ນ, ບັນດາສະຫາຍຄະນະບໍລິຫານງານພັກໄດ້ເອກະພາບກັນປະກອບຄຳເຫັນວາງທິດທາງວຽກງານຈຸດສຸມປະຈຳໄຕມາດ Iຂອງປີ 2024ໂດຍໄດ້ວາງ 4ວຽກຈຸດສຸມຄື: 1. ກະກຽມສ້າງແຜນການຫັນລົງທ້ອງຖິ່ນເພື່ອຊີ້ນຳ-ນຳພາ ບັນດາອົງການໄອຍະການປະຊາຊົນພາກ, ແຂວງ ແລະ ເຂດຢ່າງໃກ້ສິດ; 2. ສຸມໃສ່ປັບປຸງແບບແຜນການຊີ້ນໍາ-ນໍາພາໃຫ້ມີຮູບປະທຳ ແລະ ເຂັ້ມແຂງກ່ວາເກົ່າ; 3. ກະກຽມຄວາມພ້ອມຮອບດ້ານໃນການດຳເນີນກອງປະຊຸມໃຫຍ່ 3 ຂັ້ນຂອງພັກ; 4. ປັບປຸງລະບົບກົງຈັກຂອງອົງການໄອຍະການປະຊາຊົນໃຫ້ມີຄວາມໜັກແໜ້ນ ແລະ ເຂັ້ມແຂງ.
ໃນໂອກາດນີ້,ສະຫາຍ ໄຊຊະນະ ໂຄດພູທອນໄດ້ເນັ້ນໜັກບາງດ້ານເປັນຕົ້ນຄະນະນຳແຕ່ລະຂັ້ນຕ້ອງໄດ້ເພີ່ມທະວີໃນການຊີ້ນຳ-ນຳພາຢ່າງໃກ້ສິດຕິດແທດ, ປັບປຸງແບບແຜນວິທີເຮັດວຽກໃຫ້ສອດຄ່ອງກັບແຕ່ລະໄລຍະ ແລະ ນຳເອົານື້ອໃນຈິດໃຈຂອງກອງປະຊຸມໃນຄັ້ງນີ້ໄປຈັດຕັ້ງປະຕິບັດໃຫ້ມີຜົນສຳເລັດ ເພື່ອເຮັດໃຫ້ອົງການໄອຍະການປະຊາຊົນນັບມື້ເຕີບໃຫຍ່ເຂັ້ມແຂງ, ໄດ້ຮັບການພັດທະນາຮອບດ້ານ ແລະ ຮັບປະກັນການປະຕິບັດພາລະບົດບາດ, ສິດ ແລະ ໜ້າທີ່ຂອງອົງການໄອຍະການປະຊາຊົນຕາມທີ່ໄດ້ກຳນົດໃນກົດໝາຍ, ທັງເຮັດໃຫ້ກົດໝາຍໄດ້ຮັບການຈັດຕັ້ງປະຕິບັດຢ່າງຖືກຕ້ອງ ແລະ ເປັນເອກະພາບແນໃສ່ປົກປ້ອງຜົນປະໂຫຍດຂອງລັດ, ສັງຄົມ, ສິດ ແລະ ຜົນປະໂຫຍດອັນຊອບທໍາຂອງພົນລະເມືອງ, ປະກອບສ່ວນເຂົ້າໃນການປົກປັກຮັກສາ ແລະ ສ້າງສາພັດທະນາປະເທດຊາດ ແລະ ຫັນເປັນທັນສະໄໝເທື່ອລະກ້າວ.
(ຂ່າວ-ພາບ: ອອປສ)