 |
ກອງປະຊຸມຄັ້ງນີ້ ມີຄວາມໝາຍຄວາມສໍາຄັນຢ່າງຍິ່ງ ໃນການຜັນຂະຫຍາຍກົດໝາຍວ່າດ້ວຍສັດປ່າ, ກົດໝາຍວ່າດ້ວຍປ່າໄມ້ ແລະ ສົນທິສັນຍາສາກົນ CITES ທີ່ ສປປ ລາວ ເປັນພາຄີ ໃຫ້ປະກົດຜົນເປັນຮູບປະທຳ. ທັງນີ້ ກໍເພື່ອເພີ່ມທະວີຄວາມເຂັ້ມງວດ ໃນການຄຸ້ມຄອງ, ກວດກາ ແລະ ຕ້ານການລັກລອບລ່າ, ຊື້-ຂາຍ, ເຄື່ອນຍ້າຍສັດປ່າ ແລະ ພືດປ່າຫວງຫ້າມ ຕາມຄຳສັ່ງຂອງນາຍົກລັດຖະມົນຕີ ສະບັບເລກທີ 25/ນຍ (ລົງວັນທີ 18/09/2025) ແລະ ດຳລັດ ເລກທີ 299/ລບ (ລົງວັນທີ 05/06/2024).
ໃນພິທີ, ທ່ານ ໄຊຍະສິດ ວິລະພັດ ໄດ້ເນັ້ນໃຫ້ເຫັນວ່າ ແຂວງຈຳປາສັກ ເປັນແຂວງທີ່ມີຄວາມອຸດົມສົມບູນ ດ້ວຍເນື້ອທີ່ປ່າໄມ້ກວມເຖິງ 68.93% ຂອງເນື້ອທີ່ທົ່ວແຂວງ, ມີປ່າສະຫງວນແຫ່ງຊາດ 3 ແຫ່ງ ແລະ ປ່າຜະລິດ, ປ່າປ້ອງກັນ ອີກຫຼາຍແຫ່ງ. ຢ່າງໃດກໍດີ, ຍ້ອນຄວາມຕ້ອງການຂອງຕະຫຼາດ, ຈຶ່ງເຮັດໃຫ້ມີປະກົດການລັກລອບລ່າ ແລະ ຄ້າຂາຍສັດປ່າຫວງຫ້າມ ເຊັ່ນ: ງູ, ລິ່ນ, ເຕົ່າ, ກະທິງ (ເມີຍ) ແລະ ເສືອໂຄ່ງ ເກີດຂຶ້ນ. ເພື່ອແກ້ໄຂບັນຫາດັ່ງກ່າວ, ທາງແຂວງໄດ້ຈັດຕັ້ງຄະນະກຳມະການປະສານງານ P-WEN ຂັ້ນແຂວງ ຂຶ້ນຢ່າງເປັນທາງການ ຕາມຂໍ້ຕົກລົງ ເລກທີ 105/ຄປຂ.ຈສ (ລົງວັນທີ 11/02/2026) ເພື່ອເພີ່ມປະສິດທິພາບ ໃນການບັງຄັບໃຊ້ກົດໝາຍ.
ຕະຫຼອດການດຳເນີນກອງປະຊຸມ, ບັນດາອົງການສືບສວນ-ສອບສວນ ຈາກເຈົ້າໜ້າທີ່ປ່າໄມ້, ຕຳຫຼວດສິ່ງແວດລ້ອມ, ທະຫານ, ພາສີ ແລະ ອົງການໄອຍະການ ໄດ້ຜັດປ່ຽນກັນນຳສະເໜີ ຜົນການຈັດຕັ້ງປະຕິບັດວຽກງານ, ທັງໄດ້ປຶກສາຫາລືຢ່າງກົງໄປກົງມາ ກ່ຽວກັບຂໍ້ສະດວກ, ຂໍ້ຫຍຸ້ງຍາກ, ຈຸດອ່ອນ, ຊ່ອງຫວ່າງ ແລະ ສິ່ງທ້າທາຍ ໃນຂອດການປະສານງານ, ການເກັບກຳຫຼັກຖານເບື້ອງຕົ້ນ ແລະ ການດຳເນີນຄະດີ.
ໃນກອງປະຊຸມ, ປະທານໄດ້ມີຄໍາເຫັນເນັ້ນໜັກເພື່ອຊຸກຍູ້ໃຫ້ທຸກພາກສ່ວນ ເພີ່ມທະວີຄວາມຮັບຜິດຊອບ, ຮ່ວມມືກັນຢ່າງແໜ້ນແກ່ນ ເພື່ອສ້າງກົນໄກການບັງຄັບໃຊ້ກົດໝາຍ ໃຫ້ມີຄວາມສັກສິດ, ສາມາດສະກັດກັ້ນອາຊະຍາກຳສັດປ່າ ແລະ ປ່າໄມ້ ໃນໄລຍະໃໝ່ ໃຫ້ໄດ້ຢ່າງມີປະສິດທິຜົນ.ຂ່າວ-ພາບ: ຈັນທະວີສັກ
ຄໍາເຫັນ