ໂດຍມີທ່ານ ສະຫວັນຄອນ ຣາຊມຸນຕຣີ ປະທານສະມາຄົມນັກຂ່າວແຫ່ງ ສປປລາວ, ທ່ານນາງ ແກ້ວອຳພອນ ສຸວັນນະພູມ ຜູ້ອຳນວຍການອົງການແຄຣ ນານາຊາດປະຈຳລາວ, ເປັນກຽດເຂົ້າຮ່ວມຂອງທ່ານ ໂພສີ ແກ້ວມະນີວົງ ຮອງລັດຖະມົນຕີກະຊວງຖະແຫຼງຂ່າວ, ວັດທະນະທຳ ແລະ ທ່ອງທ່ຽວ (ຖວທ), ທ່ານ ມາກ ກາລາເຮີ ເອກອັກຄະລັດຖະທູດສະຫະພາບເອີຣົບປະຈຳລາວ, ວິທະຍາກອນຈາກ ສສ ຫວຽດນາມ, ຣາຊະອານາຈັກໄທ, ການນໍາຈາກອົງການສື່, ນັກຂ່າວໃນຂອບເຂດທົ່ວປະເທດເຂົ້າຮ່ວມທັງໃນຮູບແບບເຊິ່ງໜ້າ ແລະ ອອນລາຍ.
ທ່ານ ໂພສີ ແກ້ວມະນີວົງກ່າວວ່າ: “ນັກຮົບສື່ມວນຊົນມີບົດບາດສໍາຄັນຫຼາຍໃນການກະຈາຍຂໍ້ມູນຂ່າວສານສູ່ສັງຄົມຊຶ່ງມັນໄດ້ສະທ້ອນໃຫ້ເຫັນທັງໃນດ້ານບວກ ແລະ ດ້ານລົບຕໍ່ການດໍາລົງຊີວິດປະຈໍາວັນຂອງຄົນໃນຍຸກດີຈີຕອນທີ່ມີການແຂ່ງຂັນກັນພັດທະນາລະບົບສື່ສານ ແລະ ເຊື່ອມສານຂໍ້ມູນຂ່າວສານທັງຮາດແວ ແລະ ຊັອຟແວຢ່າງບໍ່ມີພົມແດນ ແລະ ຂອບເຂດຈໍາກັດ.ສະນັ້ນ, ນັກຂ່າວຈຶ່ງຕ້ອງໄດ້ມີການຮິ່ນຕອງຢ່າງຮອບຄອບ ແລະ ຢຶດໝັ້ນຈັນຍາບັນໃນວິຊາຊີບສື່ຂອງຕົນ.
ກອງປະຊຸມຄັ້ງນີ້ຈັດຂຶ້ນໃນຫົວຂໍ້: “ການລາຍງານຂ່າວບັນຫາສີຂຽວໃນຍຸກດີຈີຕອນ” ຂອງໂຄງການສ້າງຄວາມເຂັ້ມແຂງໃຫ້ແກ່ສື່ມວນຊົນ ໂດຍການມີສ່ວນຮ່ວມຂອງອົງການຈັດຕັ້ງມະຫາຊົນ ແລະ ອົງການຈັດຕັ້ງທາງສັງຄົມເພື່ອການພັດທະນາສີຂຽວໃນ ສປປ ລາວ ຈຸດປະສົງເພື່ອໃຫ້ນັກຂ່າວຈາກອົງການສື່ມວນຊົນລາວຮູ້ນໍາໃຊ້ລະບົບດີຈີຕອນ ໂດຍສະເພາະແມ່ນປັນຍາປະດິດຢ່າງຄ່ອງແຄ້ວມາຊ່ວຍໃນການຜະລິດ, ກວດແກ້ຂ່າວ, ດັດແປງຮູບພາບ, ຕັດຕໍ່ວິດີໂອໃສ່ (ໜັງສືພິມ, ໜ້າເວັບໄຊ, ໜ້າສື່ສັງຄົມອອນລາຍຕ່າງໆ) ໄດ້ຢ່າງວ່ອງໄວ ແລະ ທັນກັບສະພາບການ ເພື່ອເພີ່ມທັກສະໃຫ້ແກ່ນັກຮົບສື່ມວນຊົນລາວໃນການລາຍງານຂ່າວບັນຫາສີຂຽວ ແລະ ເຜີຍແຜ່ຂໍ້ມູນຂ່າວສານໄດ້ຢ່າງຖືກຕ້ອງ. ກອງປະຊຸມຄັ້ງນີ້ຜູ້ເຂົ້າຮ່ວມໄດ້ຮັບຮູ້8 ຫົວຂໍ້ຈາກຊ່ຽວຊານສະເພາະດ້ານເຊັ່ນ: ການຄຸ້ມຄອງຫ້ອງຂ່າວດີຈີຕອນຢູ່ຫວຽດນາມ, ການນຳໃຊ້ປັນຍາປະດິດຊ່ວຍຜະລິດຂ່າວຢູ່ໄທ, ລາຍເຊັນດີຈີຕອນ ແລະ ການນຳໃຊ້ສັນຍານອິນເຕີເນັດປະຕູດຽວ, ການນຳໃຊ້ພາສາລາວໃນລະບົບຂອງປັນຍາປະດິດ, ບັນຫາສິ່ງແວດລ້ອມ ແລະ ຜົນກະທົບຕໍ່ການດຳລົງຊີວິດຂອງມະນຸດ ແລະ ຊີວະນາໆພັນ, ການປັບໂຕເຂົ້າກັບສະພາບດິນຟ້າອາກາດ, ການປົກປັກຮັກສາຊີວະນາໆພັນ ແລະ ສິນເຊື່ອກາກບອນ, ຄວາມສຳຄັນຂອງການພັດທະນາສີຂຽວແບບຍືນຍົງ.
ຂ່າວ-ພາບ: ພູວັນ
ຄໍາເຫັນ