ລະດົມຄວາມຄິດຕໍ່ 3 ຮ່າງນິຕິກຳຂອງ ຄະນະປະຈໍາສະພາແຫ່ງຊາດ

(ສພຊ) ເພື່ອຈັດຕັ້ງປະຕິບັດຕາມແຜນການຂອງກໍາມາທິການວຽກງານສະມາຊິກສະພາແຫ່ງຊາດ ໃນການຈັດຕັ້ງປະຕິບັດກິດຈະກໍາ ເປັນຕົ້ນການປຶກສາຫາລື ແລະ ລະດົມແນວຄວາມຄິດເຫັນຕໍ່ບັນດາຮ່າງນິຕິກໍາຂອງ ຄະນະປະຈໍາສະພາແຫ່ງຊາດ ແລະ ເພື່ອເປັນການສ້າງຄວາມເປັນເອກະພາບທາງດ້ານໂຄງຮ່າງ, ເນື້ອໃນໃຫ້ມີຄວາມສົມບູນ ແລະ ຄົບຖ້ວນ ແນໃສ່ເຮັດໃຫ້ນິຕິກໍາດັ່ງກ່າວ ມີຄຸນນະພາບ ແລະ ສາມາດຈັດຕັ້ງປະຕິບັດໄດ້, ໃນລະຫວ່າງວັນທີ 4-6 ຕຸລາ ນີ້ ກໍາມາທິການວຽກງານສະມາຊິກສະພາແຫ່ງຊາດ ໄດ້ຈັດກອງປະຊຸມລະດົມຄວາມຄິດຕໍ່ 3 ຮ່າງນິຕິກໍາຂອງຄະນະປະຈໍາສະພາແຫ່ງຊາດ ທີ່ເມືອງວັງວຽງ ແຂວງວຽງຈັນ ໂດຍການເປັນປະທານຂອງ ທ່ານ ຄໍາໃບ ດໍາລັດ ຮອງປະທານສະພາແຫ່ງຊາດ ຜູ້ຊີ້ນໍາວຽກງານກໍາມາທິການວຽກງານສະມາຊິກສະພາແຫ່ງຊາດ, ມີທ່ານ ສຸບັນ ສະວະບຸດ ປະທານກໍາມາທິການ ແລະ ຮອງປະທານກໍາມາທິການວຽກງານສະມາຊິກສະພາແຫ່ງຊາດ, ບັນດາທ່ານຄະນະກົມ, ຄະນະເລຂາທິ ການສະພາປະຊາຊົນຂັ້ນແຂວງ (9 ແຂວງພາກເໜືອ ແລະ ພາກກາງ), ຄະນະພະແນກການແຂວງວຽງຈັນ, ບັນດາທ່ານຫົວໜ້າຂະແໜງຄົ້ນຄວ້າ-ສັງລວມ ສະພາປະຊາຊົນຂັ້ນແຂວງເຂົ້າຮ່ວມ.
ກອງປະຊຸມໄດ້ຮັບຟັງການຮ່າງປຶ້ມຄູ່ມືການເລືອກຕັ້ງສະມາຊິກສະພາ (ສ້າງໃໝ່) ຈາກທ່ານປະທານກໍາມາທິການວຽກງານສະມາຊິກສະພາແຫ່ງຊາດ; ຮ່າງມະຕິ ຂອງຄະນະປະຈໍາສະພາແຫ່ງຊາດວ່າດ້ວຍການປະກອບຄໍາເຫັນ ແລະ ຊັກຖາມ ຂອງສະມາຊິກສະພາແຫ່ງຊາດ ໃນກອງປະຊຸມສະພາແຫ່ງຊາດ (ສ້າງໃໝ່) ແລະ ຮ່າງມະຕິ ຂອງຄະນະປະຈໍາສະພາແຫ່ງຊາດ ວ່າດ້ວຍການປະເມີນຜົນການປະຕິບັດໜ້າທີ່ຂອງສະມາຊິກສະພາແຫ່ງຊາດ (ສ້າງໃໝ່) ຈາກທ່ານຮອງປະທານກໍາມາທິການວຽກງານສະມາຊິກສະພາແຫ່ງຊາດ. ຈາກນັ້ນ, ຜູ້ເຂົ້າຮ່ວມກອງປະຊຸມ ໄດ້ຜັດປ່ຽນກັນປະກອບຄໍາຄິດຄໍາເຫັນຕາມຄໍາເຈາະຈີ້ມຂອງປະທານກອງປະຊຸມ ເພື່ອປະກອບໃສ່ຮ່າງນິຕິກໍາດັ່ງກ່າວທີ່ນໍາມາສະເໜີໃນກອງປະຊຸມໃນຄັ້ງນີ້.
ໃນພິທີເປີດກອງປະຊຸມ ທ່ານ ຄໍາໃບ ດໍາລັດ ໄດ້ມີຄໍາເຫັນໂອ້ລົມຕໍ່ກອງປະຊຸມວ່າ: ກອງປະຊຸມລະດົມແນວຄິດຄັ້ງນີ້ ຈັດຂຶ້ນຢ່າງເປັນທາງການ ໃນທ່າມກາງບັນຍາກາດທີ່ສະມາຊິກສະພາແຫ່ງຊາດ ແລະ ສະພາປະຊາຊົນຂັ້ນແຂວງທົ່ວປະເທດ ກໍາລັງຢູ່ໃນໄລຍະດໍາເນີນຈັດຕັ້ງຜັນຂະຫຍາຍ, ໂຄສະນາເຜີຍແຜ່ຜົນສໍາເລັດກອງປະຊຸມສະໄໝສາມັນ ເທື່ອທີ 5 ຂອງສະພາແຫ່ງຊາດ ຊຸດທີ IX ແລະ ສະພາປະຊາຊົນຂັ້ນແຂວງ ຊຸດທີ II ເປັນຂະບວນຟົດຟື້ນ ແລະ ເລີ່ມສຸມໃສ່ກະກຽມວຽກງານຮອບດ້ານໃຫ້ແກ່ການດໍາເນີນກອງປະຊຸມສະໄໝສາມັນ ເທື່ອທີ 6 ຂອງສະພາແຫ່ງຊາດ ຊຸດທີ IX. ໃນນີ້, ວຽກງານໜຶ່ງທີ່ສໍາຄັນ ແມ່ນຈະໄດ້ດໍາເນີນການປະເມີນຄວາມໄວ້ວາງໃຈ ໃນການປະຕິບັດໜ້າທີ່ ຂອງບຸກຄະລາກອນທີ່ສະພາແຫ່ງຊາດ ເລືອກຕັ້ງ ແລະ ຮັບຮອງການແຕ່ງຕັ້ງ ແຜນການກອງປະຊຸມລະດົມແນວຄິດໃສ່ 3 ຮ່າງນິຕິກໍາຂອງຄະນະປະຈໍາສະພາແຫ່ງຊາດ ແມ່ນຈະໄດ້ຈັດເປັນ 2 ຈຸດຄື: ຈຸດທີ 1 ຢູ່ ເມືອງວັງວຽງ ແຂວງວຽງຈັນ, ລະຫວ່າງວັນທີ 4-6 ຕຸລາ 2023 ສະເພາະ 9 ແຂວງພາກເໜືອ ແລະ ຢູ່ເມືອງທ່າພະບາດ ແຂວງບໍລິຄໍາໄຊ ລະຫວ່າງວັນທີ 24-26 ຕຸລາ 2023 ສະເພາະ 9 ແຂວງພາກໃຕ້, ໃນ 3 ຫົວຂໍ້ຂ້າງເທິງນີ້, ວຽກງານປະເມີນສະມາຊິກສະພາແຫ່ງຊາດ ແມ່ນມີຄວາມທ້າທາຍຫຼາຍ ເນື່ອງຈາກວ່າ ສະມາຊິກສະພາແຫ່ງຊາດ ແມ່ນກ່ຽວຂ້ອງກັບຫຼາຍພາກສ່ວນ, ເນື້ອໃນການປະເມີນ ແລະ ວິທີການປະເມີນ ຄວນຈະກໍານົດແນວໃດ ຈຶ່ງມີຄວາມເໝາະສົມ. ສະນັ້ນ, ໃນຕໍ່ໜ້າ ຍັງຈະເຮັດວຽກໜັກຫຼາຍ ໃນການສຶກສາ ຄົ້ນຄວ້າຢ່າງເລິກເຊິ່ງ ແລະ ລະອຽດຮອບດ້ານ ເພື່ອຫຼີກລ່ຽງບັນຫາຕ່າງໆ ທີ່ຕາມມາ ພາຍຫຼັງມີການປະເມີນຜົນການເຄື່ອນໄຫວ ຂອງສະມາຊິກສະພາແຫ່ງຊາດ.
ກອງປະຊຸມຄັ້ງນີ້ ບັນດາທ່ານຜູ້ເຂົ້າຮ່ວມ ຈະໄດ້ສົນທະນາແລກປ່ຽນຄຳຄິດເຫັນຮ່ວມກັນ ເພື່ອປັບປຸງເນື້ອໃນຂອງ 3 ນິຕິກໍາດັ່ງກ່າວ ໃຫ້ມີເນື້ອໃນຮັດກຸມ, ສົມບູນຂຶ້ນ ແລະ ສອດຄ່ອງກັບສະພາບຄວາມເປັນຈິງ. ເຖິງຢ່າງໃດກໍດີ, ເພື່ອຮັບປະກັນເຮັດໃຫ້ກອງປະຊຸມດຳເນີນໄປດ້ວຍຜົນສຳເລັດ ຕາມຈຸດປະສົງ ແລະ ລະດັບຄາດໝາຍທີ່ວາງໄວ້, ຮຽກຮ້ອງມາຍັງບັນດາທ່ານຜູ້ແທນກອງປະຊຸມ ຈົ່ງຍົກສູງຄວາມຮັບຜິດຊອບເປັນເຈົ້າການໃນການຮັບຟັງການສະເໜີ, ຄົ້ນຄວ້າ, ສົນທະນາແລກປ່ຽນຄຳຄິດເຫັນຢ່າງມີຈຸດສຸມ ເພື່ອເຮັດໃຫ້ເນື້ອໃນມີຄວາມຈະແຈ້ງ ແລະ ສາມາດນໍາໄປຈັດຕັ້ງປະຕິບັດໄດ້.
ກອງປະຊຸມໃນຄັ້ງນີ້ ໄດ້ຮັບການສະໜັບສະໜູນທຶນຈາກໂຄງການສ້າງຄວາມເຂັ້ມແຂງໃຫ້ແກ່ສະພາແຫ່ງຊາດ ແລະ ສະພາປະຊາຊົນແຂວງ.
(ຂ່າວ: ສອນສັກ ວັນວິໄຊ)