ລາວ-ຈີນ ທົບທວນຄືນການຮ່ວມມື ປົກປັກຮັກສາຊາຍແດນ

ກອງປະຊຸມຄັ້ງນີ້, ໄດ້ທົບທວນຄືນສະພາບການຮ່ວມມື ໃນການປົກປັກຮັກສາຊາຍແດນ ໃນໄລຍະຜ່ານມາ ເປັນຕົ້ນ ການຮ່ວມມືໃນການປະຕິບັດກົດໝາຍ ຮ່ວມລາດຕະເວນຕາມຊາຍແດນ ໃນການແກ້ໄຂບັນຫາສະພາບຂ້າມແດນຜິດກົດໝາຍ, ຄ້າຂາຍເຖື່ອນ, ຄ້າຂາຍຢາເສບຕິດຕາມຊາຍແດນ. ໄດ້ຄົ້ນຄວ້າຕີລາຄາຊອກຫາວິທີແກ້ໄຂບັນຫາກົນອຸບາຍ ແລະ ຮູບການເຄື່ອນໄຫວຂອງກຸ່ມຄົນບໍ່ດີທີ່ມີຕໍ່ລາວ-ຈີນ ໂດຍສະເພາະແມ່ນເປົ້າໝາຍນັກສືບສອດແນມ, ຜູ້ກໍ່ການຮ້າຍທີ່ເຂົ້າມາໂຄສະນາໃສ່ຮ້າຍປາຍສີຜູ້ນຳພັກ-ລັດ ແລະ ພ້ອມກັນເອົາໃຈໃສ່ປະສານສົມທົບ, ກຳແໜ້ນສະພາບການ, ແລກປ່ຽນຂໍ້ມູນ-ຂ່າວສານ, ຊຸກຍູ້ອໍານວຍຄວາມສະດວກ ກໍ່ສ້າງພື້ນຖານໂຄງລ່າງຂອບເຂດຊາຍແດນທັງສອງຝ່າຍ, ເພີ່ມທະວີການຮ່ວມມືສະກັດກັ້ນ ແລະ ຕ້ານຢາເສບຕິດ, ອາຊະຍາກຳປະເພດຕ່າງໆ ໃຫ້ສອດຄ່ອງຕາມຫຼັກການວິຊາສະເພາະ ແລະ ຖືກຕ້ອງຕາມລະບຽບກົດໝາຍຂອງທັງສອງປະ ເທດ, ເອົາໃຈໃສ່ໂຄສະນາ ແລະ ສຶກສາອົບຮົມປະຊາຊົນບັນດາເຜົ່າທີ່ຢູ່ສອງເບື້ອງຊາຍແດນ ໃຫ້ຍົກສູງຄວາມຮູ້ ແລະ ປະຕິບັດສົນທິສັນຍາກ່ຽວກັບລະບຽບການຄຸ້ມຄຸ້ອງຊາຍແດນທາງບົກ ລະຫວ່າງສອງປະເທດ.

ກອງປະຊຸມ, ຍັງໄດ້ທົບທວນຄືນ ແລະ ຍົກໃຫ້ເຫັນວຽກງານການປະສານສົມທົບ ລະຫວ່າງ ດ່ານກວດຄົນເຂົ້າ-ອອກເມືອງປ້ອງກັນຊາຍແດນບໍ່ຫານ ແຫ່ງ ສປ ຈີນ ແລະ ກອງບັນຊາການ 3 ແຂວງພາກເໜືອລາວ ທີ່ໄດ້ມີການພົວພັນປະສານສົມທົບກັນຢ່າງແໜ້ນແຟ້ນ ໃນການປະຕິບັດກົດໝາຍລາດຕະເວນຮ່ວມກັນ ເພື່ອຮັກສາຄວາມສະຫງົບ, ຄວາມເປັນລະບຽບຮຽບຮ້ອຍຕາມຊາຍແດນຂອງສອງປະເທດ, ການພົວພັນຮ່ວມມືຊ່ວຍເຫຼືອຊຶ່ງກັນ ແລະ ກັນ ບົນພື້ນຖານຈິດໃຈສາມັກຄີ, ມິດຕະພາບ ແລະ ການຮ່ວມມື. ໃນພິທີໄດ້ລົງນາມເຊັນບົດບັນທຶກຮ່ວມກັນ ເພື່ອເປັນບ່ອນອີງໃນການຈັດຕັ້ງປະຕິບັດເນື້ອໃນຂອງກອງປະຊຸມໃນຄັ້ງນີ້.

ຂ່າວ: ປກສ