 |
ການພົບປະຄັ້ງນີ້, ເພື່ອສືບຕໍ່ໃນການສົ່ງເສີມການຮ່ວມມືຂອງສອງກະຊວງ ກໍຄືສອງຂະແໜງການຂອງພວກເຮົາ, ເພື່ອສ້າງໂອກາດໃຫ້ມີການພົບປະ ລະຫວ່າງ ພາກທຸລະກິດ ຂອງ ສປປ ລາວ ຮ່ວມກັບ ພາກທຸລະກິດ ຂອງ ຣາຊະອານາຈັກ ກຳປູເຈຍ ເພື່ອເປັນການສົ່ງເສີມການລົງທຶນ ແລະ ການຄ້າກະສິກໍາລະຫວ່າງສອງປະເທດ ແລະ ອັນສຳຄັນທີ່ສຸດ ກໍແມ່ນການເປີດພິທີການຂົນສົ່ງສິນຄ້າກະສິກຳ ຈາກ ຣາຊະອານາຈັກ ກຳປູກເຈຍ ໄປຍັງ ສປ ຈີນ ໂດຍຜ່ານ ສປປ ລາວ ແລະ ການຂົນສົ່ງສິນຄ້າ ຈາກ ສປປ ລາວ ໄປ ຣາຊະອາຈັກ ກຳປູກເຈຍ.
 |
ທ່ານ ລິນຄຳ ດວງສະຫວັນ ກ່າວວ່າ: ການເຮັດວຽກຮ່ວມກັນຄັ້ງນີ້ ຈະເປັນການສືບຕໍ່ຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການເປັນຄູ່ຮ່ວມຍຸດທະສາດຮອບດ້ານ ໂດຍສະເພາະການສົ່ງ ເສີມການຮ່ວມມື ແລະ ລົງທຶນໃນຂະແໜງກະສິກໍາ ແລະ ປ່າໄມ້ ລະຫວ່າງ ສອງກະຊວງກໍຄືສອງປະເທດພວກເຮົາ ໃຫ້ມີປະສິດທິພາບ ແລະ ປະສິດທິຜົນຍິ່ງໆຂຶ້ນ, ທັງເປັນຂີດໝາຍສຳຄັນອີກອັນໜຶ່ງ ຂອງຂອບການຮ່ວມມື ໃນຂົງເຂດກະສິກຳ, ປ່າໄມ້ ແລະ ການປະມົງ ຂອງພວກເຮົາໃຫ້ແໜ້ນແຟ້ນຍິ່ງຂຶ້ນ ຊຶ່ງແມ່ນຜົນການພົບປະຂອງການນຳທັງສອງກະຊວງ ແລະ ໝາກຜົນຂອງການເຮັດວຽກຮ່ວມກັນ ຂອງກົມວິຊາການທັງສອງປະເທດຂອງພວກເຮົາໃນໄລຍະຜ່ານມາ.
 |
ທ່ານກ່າວຕື່ມວ່າ: ການຈັດຕັ້ງຜັນຂະຫຍາຍ ແຜນດຳເນີນງານ ໃນບົດບັນທຶກຄວາມເຂົ້າໃຈ ການຮ່ວມມືດ້ານກະສິກຳລະຫວ່າງ ສປປ ລາວ ແລະ ຣາຊະອານາຈັກກຳປູເຈຍ ປີ 2023-2027 ຊຶ່ງກວມເອົາບັນດາໜ້າວຽກທີ່ເປັນບຸລິມະສິດຂອງຂະແໜງການ ເປັນຕົ້ນແມ່ນການແລກປ່ຽນບົດຮຽນ ແລະ ປະສົບການດ້ານສະຫະ ກອນກະສິກໍາ, ການຜະລິດເຂົ້າເປັນສິນຄ້າ, ການຊຸກຍູ້ສົ່ງເສີມພາກເອກະຊົນເພື່ອລົງທຶນດ້ານກະສິກໍາ, ການ ອໍານວຍຄວາມສະດວກດ້ານການຄ້າກະສິກໍາ, ການປະມົງ, ການອະນຸລັກປ່າໄມ້ ແລະ ສັດນໍ້າ, ໂດຍສະເພາະປາໂລມານໍ້າຈືດ ແລະ ອື່ນໆ, ການຮ່ວມມືໃນໄລຍະຜ່ານມາ ເຫັນໄດ້ຜົນສຳເລັດຫຼາຍດ້ານ ໂດຍສະເພາະ ແມ່ນການຊຸກຍູ້ສົ່ງເສີມ ການຜະລິດເພື່ອການສົ່ງອອກ ຂອງສອງປະເທດພວກເຮົາ, ໃນນີ້ ສປປ ລາວ ໄດ້ກະກຽມສົ່ງອອກຜະລິດຕະພັນກະສິກຳ ໄປກຳປູເຈຍ ໃນຈຳນວນ 6 ລາຍການ ທີ່ໄດ້ຕົກລົງກັນ (ກາເຟ, ກະລ່ຳປີ, ໝາກຂາມ, ເຂົ້າສານໜຽວ, ບລູເບີຣີ, ໝາກອຶ) ແລະ ກຳປູເຈຍ ກໍກຳລັງດຳເນີນການເພື່ອສົ່ງສິນຄ້າກະສິກຳ ຜ່ານ ສປປ ລາວ ໄປ ສປ ຈີນ ໃນຈຳນວນ 6 ລາຍການ (ຖົ່ວລຽນ, ກ້ວຍ, ເຂົ້າຈ້າວ, ໝາກມ່ວງ, ລຳໄຍ, ມັນຕົ້ນ) ພິເສດ, ຈະໄດ້ມີວາລະໃນການເປີດພິທີ ສົ່ງສິນຄ້າກະສິກຳຈາກກຳປູເຈຍ ຜ່ານ ສປປ ລາວ ໄປ ສປ ຈີນ ຊຶ່ງຈະຈັດຂຶ້ນທີ່ ສາງຄ່ຽນຖ່າຍສິນຄ້າ ທ່າບົກທ່ານາແລ້ງ, ນອກຈາກ ນີ້, ສຳລັບວຽກອື່ນໆ ທີ່ພວກເຮົາໄດ້ຕົກລົງກັນຜ່ານມາ ຕາມບົດບັນທຶກຄວາມເຂົ້າໃຈ ແມ່ນສະເໜີໃຫ້ ກົມກ່ຽວຂ້ອງທັງສອງຝ່າຍ ສືບຕໍ່ປະສານສົມທົບກັນຕື່ມ ໂດຍສະເພາະວຽກງານສົ່ງເສີມການຫຼຸດຜ່ອນການປ່ອຍທາດອາຍເຮືອນແກ້ວຈາກຂະແໜງການປ່າໄມ້ ແລະ ວຽກງານອະນຸລັກສັດປ່າ ແລະ ການຈັດຕັ້ງປະຕິບັດສົນທິສັນຍາ CITES ຂອງສາກົນ ແລະ ວຽກງານອື່ນໆ.
(ຂ່າວ-ພາບ: ສໍານານ)
ຄໍາເຫັນ