ສະໂມສອນ ລາວສະກາຍເວ ວີຊີ ຊະນະ ກະຊວງປັອງກັນປະເທດ ຫຼື ກອງທັບ 3-1 ເຊັດ ດ້ວຍຄະແນນ 25-20, 18-25, 25-22 ແລະ 25-22 ຄອງແຊັມການແຂ່ງຂັນກິລາບານສົ່ງໃນຮົ່ມ ປະເພດທີມຊາຍ, ສ່ວນແຊັມປະເພດຍິງ ເປັນຂອງ ກົມໃຫຍ່ການເມືອງກອງທັບ ທີ່ລົງສະໜາມ 5 ນັດ ຊະນະລວດ 5 ນັດມີ 12 ຄະແນນ ໃນການແຂ່ງຂັນລາຍການ ເບຍລາວ ບານສົ່ງ ລາວລີກ ປະຈຳປີ 2024 ຫຼື ລາຍການ BeerLao Laos Volleyball League 2024.
ການແຂ່ງຂັນກິລາບານສົ່ງໃນຮົ່ມ ປະເພດທີມຊາຍ-ຍິງ ລາຍການ ເບຍລາວ ບານສົ່ງ ລາວລີກ ປະຈຳປີ 2024 ຈັດຂຶ້ນມາແຕ່ວັນທີ 28 ກັນຍາ 2024 ແລະ ໄດ້ສຳເລັດລົງໃນວັນທີ 24 ພະຈິກ 2024 ທີ່ສະໂມສອນກິລາໃນຮົ່ມກອງທັບ (ຫຼັກ 5) ນະຄອນຫຼວງວຽງຈັນ ໃຫ້ກຽດເຂົ້າຮ່ວມ ແລະ ມອບລາງວັນໂດຍທ່ານ ພຸດ ສິມມາລາວົງ ລັດຖະມົນຕີກະຊວງສຶກສາທິການ ແລະ ກິລາ ຫຼື ສສກ ທັງເປັນປະທານຄະນະກຳມະການໂອແລັມປິກແຫ່ງຊາດລາວ (ຄອລ), ທ່ານ ແສງພອນ ພົນອາມາດ ຮອງປະທານ ແລະ ເລຂາທິການ ຄອລ, ທ່ານ ຈັນສະໝອນ ຜອງຈັນທາ ປະທານສະຫະພັນບານສົ່ງແຫ່ງຊາດລາວ, ທ່ານ ວິລະວັນ ບຸນສຸກໄທ ຫົວໜ້າກົມກິລາມວນຊົນ, ພະລະ ແລະ ສິລະປະສຶກສາ ແລະ ທ່ານ ສີຈັນ ຈິດຕະປັນຍາ ວ່າການແທນຫົວໜ້າກົມກິລາລະດັບສູງ ພ້ອມດ້ວຍບັນດາຜູ້ໃຫ້ການສະໜັບສະໜູນ, ຄະນະຄູ, ຄູຝຶກ ແລະ ນັກກິລາ ຕະຫຼອດຮອດກອງເຊຍເຂົ້າຮ່ວມ.
ການແຂ່ງຂັນລາຍການນີ້ ສຳລັບທີມຊາຍມີ 10 ສະໂມສອນ, ສ່ວນທີມຍິງມີ 5 ພາກສ່ວນ ກຳນົດການແຂ່ງຂັນລະບົບແບບລີກ ແຂ່ງຂັນສະພາະແຕ່ຮອບຂາໄປ ບໍ່ມີຂາກັບ ຄັດເລືອກເອົາທີມທີ່ມີຄະແນນດີທີ່ສຸດຂອງທັງສອງປະເພດໄດ້ແຊັມ.
ສຳລັບການແຂ່ງຂັນລາຍການດັ່ງກ່າວ ປະເພດທີມຊາຍ ທີ 1 ສະໂມສອນ ລາວສະກາຍເວ ລົງສະໜາມ 9 ນັດ ຊະນະລວດ 9 ນັດ ມີ 27 ຄະແນນ ໄດ້ຮັບຂັນແຊັມ, ຫຼຽນຄຳ ແລະ ເງິນລາງວັນ 30,000,000 ກີບ; ທີ2 ນະຄອນຫຼວງວຽງຈັນ - ອິນທະສອນ ລົງສະໜາມ 9 ນັດ ຊະນະ 7 ແລະ ເສຍ 2 ມີ 22 ຄະແນນ ໄດ້ຮັບຫຼຽນເງິນ ແລະ ເງິນສົດ 20,000,000 ກີບ; ທີ 3 ກະຊວງປ້ອງກັນປະເທດ ລົງສະໜາມ 9 ນັດ ຊະນະ 7 ແລະ ເສຍ 2 ມີ 21 ຄະແນນ (ແຕ່ເຊັດຄະແນນໜ້ອຍກວ່າ) ໄດ້ຮັບຫຼຽນທອງ ແລະ ເງິນສົດ 17,000,000 ກີບ;ທີ 4 ສະໂມສອນ ວຽງຈັນ ວີຊີ ລົງສະໜາມ 9 ນັດ ຊະນະ 7 ແລະ ເສຍ 2 ມີ 19 ຄະແນນ ໄດ້ຮັບເງິນສົດ 14,000,000 ກີບ ແລະ ທີ 5 ສະໂມສອນ Grow-Up VC ລົງສະໜາມ 9 ນັດ ຊະນະ 4 ແລະ ເສຍ 5 ມີ 14 ຄະແນນ ໄດ້ຮັບເງິນສົດ 12,000,000 ກີບ; ທີ 6 Sunnivad VC ລົງສະໜາມ 9 ນັດ ຊະນະ 4 ແລະ ເສຍ 5 ມີ 14 ຄະແນນ ແຕ່ເຊັດຄະແນນໜ້ອຍກວ່າ ໄດ້ຮັບເງິນສົດ 9,000,000 ກີບ, ທີ 7 MPC Blue Hawii VC ລົງສະໜາມ 9 ນັດ ຊະນະ 4 ແລະ ເສຍ 5 ມີ 10 ຄະແນນ ໄດ້ຮັບເງິນສົດ 8,000,000 ກີບ, ທີ 8 Chanthilath VC ລົງສະໜາມ 9 ນັດ ຊະນະ 2 ແລະ ເສຍ 7 ມີ 5 ຄະແນນ ໄດ້ຮັບເງິນສົດ 7,000,000 ກີບ, ທີ 9 Inthention VC ລົງສະໜາມ 9 ນັດ ຊະນະ 1 ແລະ ເສຍ 8 ມີ 3 ຄະແນນ ໄດ້ຮັບເງິນສົດ 6,000,000 ກີບ ແລະ ທີ 10 Black Butterfly ລົງສະໜາມ 9 ນັດ ແລະ ເສຍ 9 ມີ 1 ຄະແນນ ໄດ້ຮັບເງິນສົດ 5,000,000 ກີບ.
ສ່ວນຜົນການແຂ່ງຂັນປະເພດທີມຍິງ ແຊັມເປັນຂອງກົມໃຫຍ່ການເມືອງກອງທັບ ລົງແຂ່ງຂັນ 4 ນັດ ຊະນະ 4 ນັດລວດ ມີ 12 ຄະແນນ ໄດ້ຮັບຂັນແຊັມ, ຫຼຽນຄຳ ແລະ ເງິນລາງວັນ 20,000,000 ກີບ, ທີ 2 ກະຊວງປ້ອງກັນປະເທດ ລົງແຂ່ງຂັນ 4 ນັດ ຊະນະ 3 ນັດ ແລະ ເສຍ 1 ນັດ ມີ 9 ຄະແນນ ໄດ້ຮັບຫຼຽນເງິນ ແລະ ເງິນສົດ 15,000,000 ກີບ, ທີ 3 ສະໂມສອນ ວຽງຈັນ ວີຊີ ລົງແຂ່ງຂັນ 4 ນັດ ຊະນະ 2 ນັດ ແລະ ເສຍ 2 ນັດ ມີ 6 ຄະແນນ ໄດ້ຮັບຫຼຽນທອງ ແລະ ເງິນສົດ 12,000,000 ກີບ, ທີ 4 ສະໂມສອນ ອາເອັນເຄ ໄຊເຊດຖາ ວີຊີ ລົງແຂ່ງຂັນ 4 ນັດ ຊະນະ 1 ນັດ ແລະ ເສຍ 3 ນັດ ມີ 3 ຄະແນນ ໄດ້ຮັບເງິນສົດ 10,000,000 ກີບ ແລະ ທີ 5 ເອັດອີຊີ ວີຊີ ລົງແຂ່ງຂັນ 4 ນັດ ເສຍ 4 ນັດ ມີ 0 ຄະແນນ ໄດ້ຮັບເງິນສົດ 8,000,000 ກີບ.
ປະເພດລາງວັນດີເດັ່ນຕ່າງໆ ປະເພດທີມຊາຍ ປະກອບມີ: ນັກກິລາດີເດັ່ນ (Most Valuable Player ຫຼື MVP) ທ້າວ ທະນົງລິດ ໄຊຊະນະ Lao Skyway VC; ເສີບດີເດັ່ນ (Best Server) ທ້າວ ຄຳທະລັກ ອຸນາພົມ ກະຊວງປ້ອງກັນປະເທດ; ຜູ້ຮັບບານດີເດັ່ນ (Best Receiver) ທ້າວ ອະດິສັກ ໄຊຍະວົງ ນະຄອນຫຼວງວຽງຈັນ By Inthasone; ຜູ້ຫຼິ້ວຕົວອິດສະຫຼະດີເດັ່ນ (Best Libero) ທ້າວ ກິດຕິສັກ ໂສດາລັກ Lao Skyway VC; ຜູ້ຫຼິ້ນບານໄວດີເດັ່ນ (Best Middle Hitter) ທ້າວ ບຸນຫຼາຍ ລັດຕະນະກອນ ນະຄອນຫຼວງວຽງຈັນ By Inthasone; ຜູ້ຫຼິ້ນ 3 ຫຼັງດີເດັ່ນ (Best Opposite Hitter) 9 ທ້າວ ຈັນມີນາ ຈັນທະວົງສະໂມສອນວຽງຈັນ; ຜູ້ຫຼິ້ນຫົວເສົາດີເດັ່ນ (Best Outside Hitter) 16 ທ້າວ ທະນົງລິດ ໄຊຊະນະ Lao Skyway VC; ມືຍົກດີເດັ່ນ (Best Setter) ທ້າວ ທະນາກອນ ມູນເລົາ ຈາກLao Skyway VC; ຕົວບ໋ອກດີເດັ່ນ (Best Blocker) ທ້າວ ລິນທອງ ພົງວິຈິດ ກະຊວງປ້ອງກັນປະເທດ.
ສ່ວນລາງດີເດັ່ນ ປະເພດທີມຍິງ: ນັກກິລາດີເດັ່ນ (Most Valuable Player ຫຼື MVP) ນາງ ສຸນິຕາ ແພງສີດາ ກົມໃຫຍ່ການເມືອງກອງທັບ; ເສີບດີເດັ່ນ (Best Server) 11 ນາງ ສະສິນະພາ ເຈະຣຳ ຈາກສະໂມສອນ SNK Saysettha VC; ຜູ້ຮັບບານດີເດັ່ນ (Best Receiver) ນາງ ປານີ ພັນທະວົງ ຈາກກົມໃຫຍ່ການເມືອງກອງທັບ; ຜູ້ຫຼິ້ວຕົວອິດສະຫຼະດີເດັ່ນ (Best Libero) ນາງ ທອນນາລີ ລັດຕະນະ ສະໂມສອນວຽງຈັນ ວີຊີ; ຜູ້ຫຼິ້ນບານໄວດີເດັ່ນ (Best Middle Hitter) ນາງ ພຸດຮັກສາ ແກ້ວວິໄຊ ກະຊວງປ້ອງກັນປະເທດ; ຜູ້ຫຼິ້ນ 3 ຫຼັງດີເດັ່ນ (Best Opposite Hitter) ນາງ ນິພາພອນ ມີໄຊພົນ ສະໂມສອນວຽງຈັນ; ຜູ້ຫຼິ້ນຫົວເສົາດີເດັ່ນ (Best Outside Hitter) ນາງ ນິງສະດາ ບົວລະພັນ ກະຊວງປ້ອງກັນປະເທດ; ມືຍົກດີເດັ່ນ (Best Setter) ນາງ ກຸ້ງກິ້ງ ພົມມີໄຊ ຈາກກົມໃຫຍ່ການເມືອງກອງທັບ; ຕົວບ໋ອກດີເດັ່ນ (Best Blocker) ນາງ ບຸນໂຮມ ໂຄຕະ ຈາກກະຊວງປ້ອງກັນປະເທດ. ການແຂ່ງຂັນໃນລາຍການນີ້ແມ່ນໄດ້ຮັບການອຸປະຖຳຫຼັກ ຈາກ ບໍລິສັດ ເບຍລາວ ຈໍາກັດ ມູນຄ່າ 400 ລ້ານກວ່າກິີບ.
(ຂ່າວ: ຕຸໄລເພັດ)
ຄໍາເຫັນ