ລັດຖະບານນໍາສະເໜີຮ່າງກົດໝາຍວ່າດ້ວຍເຂດເສດຖະກິດພິເສດ

ກອງປະຊຸມສະໄໝສາມັນ ເທື່ອທີ6 ຂອງສະພາແຫ່ງຊາດ ຊຸດທີIX(ວັນທີ 16 ພະຈິກ) ທີ່ສະພາແຫ່ງຊາດ, ພາຍໃຕ້ການເປັນປະທານຂອງທ່ານ ສົມມາດ ພົນເສນາ ຮອງປະທານສະພາແຫ່ງຊາດ. ລັດຖະບານ ໄດ້ນໍາສະເໜີຮ່າງກົດໝາຍວ່າດ້ວຍເຂດເສດຖະກິດພິເສດ ສະບັບສ້າງໃໝ່.ນໍາສະເໜີ ໂດຍ ທ່ານ ຄໍາເຈນ ວົງໂພສີ ລັດຖະມົນຕີກະຊວງແຜນການ ແລະ ການລົງທຶນຊຶ່ງ ທ່ານ ຄໍາເຈນ ວົງໂພສີໄດ້ນໍາສະເໜີ ຮ່າງກົດໝາຍວ່າດ້ວຍເຂດເສດຖະກິດພິເສດສະບັບສ້າງໃໝ່ ຊຶ່ງມີບາງເນື້ອໃນສໍາຄັນວ່າ:  ການສົ່ງເສີມການພັດທະນາ, ລົງທຶນ ແລະ ຄຸ້ມຄອງ ເຂດເສດຖະກິດພິເສດ ຢູ່ ສປປ ລາວ ນັບແຕ່ປີ 2000 ເຖິງປັດຈຸບັນໄດ້ແບ່ງເປັນ 3 ໄລຍະ ຄື: ໄລຍະທີ I(2000-2010),ໄລຍະທີ II(2010-2016) ແລະ ໄລຍະທີ III(ແຕ່ປີ 2016 ເຖິງປັດຈຸບັນ). ຜ່ານການຈັດຕັ້ງປະຕິບັດເປັນໄລຍະເວລາ ດັ່ງກ່າວ, ເຖິງຈະມີຜົນສຳເລັດເປັນກ້າວໆກໍຕາມ, ແຕ່ກໍຍັງບໍ່ທັນເອື້ອອໍານວຍຄວາມສະດວກຕາມກົນໄກການບໍລິການປະຕູດຽວ. ເນື່ອງຈາກວ່າເປັນພຽງນິຕິກໍາລຸ່ມກົດໝາຍເທົ່ານັ້ນ, ໃນເວລາດຽວກັນນັ້ນ ກິດຈະການທີ່ປະຕິບັດຢູ່ເຂດເສດຖະກິດພິເສດ ສ່ວນຫຼາຍແມ່ນຕິດພັນກັບນິຕິກຳຂອງຫຼາຍຂະແໜງການທີ່ເປັນກົດໝາຍແລ້ວ. ສະນັ້ນ, ເພື່ອຕອບສະໜອງຄວາມຮຽກຮ້ອງຕ້ອງການຂອງການຂະຫຍາຍຕົວເສດຖະກິດ-ສັງຄົມຂອງປະເທດເຮົາໄລຍະໃໝ່ ເວົ້າລວມ, ການພັດທະນາ ແລະ ລົງທຶນໃນເຂດເສດຖະກິດພິເສດ ເວົ້າສະເພາະ ທັງເພີ່ມຂີດຄວາມສາມາດໃນການແຂ່ງຂັນ ໃນວຽກງານດັ່ງກ່າວໃນເງື່ອນໄຂທີ່ປະເທດເຮົາມີການເຊື່ອມໂຍງ, ເຊື່ອມຈອດກັບພາກພື້ນ ແລະ ສາກົນ ຈຶ່ງມີຄວາມຈຳເປັນຕ້ອງໄດ້ຍົກດຳລັດວ່າດ້ວຍເຂດເສດຖະກິດພິເສດທີ່ນໍາໃຊ້ ໃນປັດຈຸບັນຂຶ້ນເປັນ ກົດໝາຍ ເພື່ອແນໃສ່ເຮັດໃຫ້ການພັດທະນາ ແລະ ການລົງທຶນໃນເຂດເສດຖະກິດພິເສດຂອງ ສປປ ລາວ ມີຄວາມໃກ້ຄຽງກັບນາກພື້ນ, ສາກົນ ທັງສ້າງຄວາມເຊື່ອໝັ້ນໃຫ້ແກ່ຜູ້ພັດທະນາ ແລະ ຜູ້ລົງທຶນ ຈາກພາຍໃນ ແລະ ຕ່າງປະເທດ ໃນການລົງທຶນພັດທະນາ ເຂດເສດຖະກິດພິເສດໃຫ້ຫຼາຍຂຶ້ນ.
ຮ່າງກົດໝາຍສະບັບນີ້, ເນື້ອໃນຕົ້ນຕໍແມ່ນຄົ້ນຄວ້າ ແລະ ເສີມຂະຫຍາຍດຳລັດສະບັບເລກທີ 188/ລບ.
ລົງວັນທີ 7 ມິຖຸນາ 2018 ທັງອີງຕາມບາງເນື້ອໃນຂອງກົດໝາຍສົ່ງເສີມການລົງທຶນ ສະບັບປີ 2016 ແລະ ດຳ
ລັດວ່າດ້ວຍການຈັດຕັ້ງ ແລະ ການເຄື່ອນໄຫວຂອງກະຊວງແຜນການ ແລະການລົງທຶນ; ຮ່າງກົດໝາຍສະບັບນີ້ ມີທັງໝົດXII ພາກ, 16 ໝວດ ແລະ 90 ມາດຕາ.
ພາຍຫຼັງ ສສຊ ໄດ້ຮັບຟັງ ການນໍາສະເໜີຮ່າງກົດໝາຍສະບັບດັ່ງກ່າວ ຈາກລັດຖະມົນຕີກະຊວງແຜນການແລະການລົງທຶນແລ້ວ, ບັນດາ ສສຊ ຕ່າງກໍໄດ້ຜັດປ່ຽນກັນຂຶ້ນປະກອບຄໍາຄິດ, ຄໍາເຫັນໃສ່ ບາງພາກ,ບາງໝວດ ແລະ ບາງມາດຕາ ເພື່ອເຮັດໃຫ້ເນື້ອໃນມີຄວາມຮັດກຸມ, ກະທັດຮັດ ແລະ ມີຄວາມຊັດເຈນ, ອຸດົມສົມບູນຍິ່ງໆຂຶ້ນ.
ກົດໝາຍສະບັບນີ້, ຖ້າໄດ້ຮັບຮອງ ແລະ ປະກາດໃຊ້ຢ່າງເປັນທາງການແລ້ວ ຈະເຮັດໃຫ້ການພັດທະນາ ເຂດເສດຖະກິດພິເສດ ສືບຕໍ່ມີການຫັນປ່ຽນທີ່ຕັ້ງໜ້າກວ່າເກົ່າ ທັງຈະສືບຕໍ່ປະກອບສ່ວນເຂົ້າໃນການພັດທະນາເສດຖະກິດ-ສັງຄົມແຫ່ງຊາດ ໄດ້ຮັບຜົນດີຂຶ້ນເປັນກ້າວໆ ຊຶ່ງສະແດງອອກ: ເຮັດໃຫ້ການພັດທະນາ ແລະ ຄຸ້ມຄອງ ເຂດເສດຖະກິດພິເສດມີຄວາມໜັກແໜ້ນ, ຮັດກຸມ, ຈະແຈ້ງ, ຄົບຖ້ວນ ແລະ ສັກສິດຂຶ້ນຕື່ມ; ຮັບປະກັນການພັດທະນາທີ່ດິນຢ່າງມີຈຸດສຸມ, ຮັບປະກັນຕາມທິດສີຂຽວ ແລະ ຍືນຍົງ; ສ້າງຄວາມເຊື່ອໝັ້ນໃຫ້ແກ່ຜູ້ພັດທະນາ ແລະ ຜູ້ລົງທຶນຈາກພາຍໃນ ແລະ ຕ່າງປະເທດຫຼາຍຂຶ້ນ ສາມາດສ້າງວຽກເຮັດງານທຳໄດ້ຢ່າງກວ້າງຂວາງ, ສ້າງຖານລາຍຮັບເພີ່ມຂຶ້ນ ແລະ ສ້າງລາຍຮັບເຂົ້າ ງົບປະມານຂອງລັດເປັນລະບົບທີ່ຕັ້ງໜ້າ ແລະ ໝັ້ນຄົງ; ຮັບປະກັນການແບ່ງຜົນປະໂຫຍດໃຫ້ທຸກພາກສ່ວນ (ລັດ, ຜູ້ລົງທຶນ ແລະ ສັງຄົມ) ຕາມທີ່ໄດ້ກຳນົດໄວ້ໃນກົດໝາຍສະບັບນີ້; ເຮັດໃຫ້ການຕິດຕາມ, ກວດກາ, ຊຸກຍູ້ ແລະ ການຄຸ້ມຄອງຂອງຂະແໜງການກ່ຽວຂ້ອງທັງສູນກາງ ແລະ ທ້ອງຖິ່ນ ມີປະສິດທິພາບ-ປະສິດທິຜົນຂຶ້ນ.
 (ຂ່າວ-ພາບ: ແສງຈັນ)