 |
ໂຄງການດັ່ງກ່າວແມ່ນການສະໜັບສະໜູນທຶນຮອນ ເພື່ອກໍ່ສ້າງອາຄານຮຽນ ແລະ ຫ້ອງນ້ຳໃໝ່ ພ້ອມທັງສະໜອງສິ່ງອຳນວຍຄວາມສະດວກທີ່ຈຳເປັນໃຫ້ແກ່ໂຮງຮຽນມັດທະຍົມສົມບູນບ້ານສົມສຸກ ເມືອງ ສະໜາມໄຊ ແຂວງອັດຕະປື ເພື່ອປັບປຸງສະພາບແວດລ້ອມການສຶກສາ ແລະ ສຸຂານາໄມຂອງເດັກນ້ອຍໃນໂຮງຮຽນເປົ້າໝາຍ.
ພິທີເຊັນສັນຍາເປັນການລົງນາມ ລະຫວ່າງ ພະນະທ່ານ ໂຄອິຊຶມິ ຊຶໂຕະມຸ, ເອກອັກຄະຣາຊະທູດຍີ່ປຸ່ນ ປະຈໍາ ສປປ ລາວ, ແລະ ທ່ານ ພາວັນດີ ສອນທະວີ, ຫົວໜ້າຫ້ອງການສຶກສາທິການ ແລະ ກິລາ ເມືອງສະໜາມໄຊ ແຂວງອັດຕະປື ໂດຍມີທ່ານ ພົນໂທ ວັນທອງ ກອງມະນີ, ເຈົ້າແຂວງອັດຕະປື ໃຫ້ກຽດເຂົ້າຮ່ວມເປັນສັກຂີພິຍານ.
ລັດຖະບານຍີ່ປຸ່ນຫວັງເປັນຢ່າງຍິ່ງວ່າ ການຊ່ວຍເຫຼືອຈາກລັດຖະບານຍີ່ປຸ່ນ ຈະຊ່ວຍເຮັດໃຫ້ສະ ພາບແວດລ້ອມການສຶກສາຮ່ຳຮຽນຂອງນັກຮຽນທີ່ຈະກາຍເປັນອະນາຄົດຂອງຊາດໄດ້ຮັບການປັບປຸງ ແລະ ຊ່ວຍຍົກລະດັບສະພາບການເຮັດວຽກຂອງຄູອາຈານ ແລະ ພະນັກງານໃນໂຮງຮຽນ.
ໂຄງການເສີມສ້າງຄວາມໝັ້ນຄົງຂອງມະນຸດຂັ້ນຮາກຖານ (GGP) ແມ່ນ ການສະໜອງທຶນໃນໂຄງການຂະໜາດນ້ອຍທີ່ສ້າງຜົນປະໂຫຍດໂດຍກົງແກ່ປະຊາຊົນທ້ອງຖິ່ນ ແລະ ປະກອບສ່ວນເຂົ້າໃນການພັດທະນາເສດຖະກິດ-ສັງຄົມຂອງປະເທດທີ່ກໍາລັງພັດທະນາ ກໍຄືປະເທດລາວ.
ປະເທດຍີ່ປຸ່ນຈະສືບຕໍ່ໃຫ້ການຊ່ວຍເຫຼືອປະເທດລາວໃນການປັບປຸງພື້ນຖານຊີວິດການເປັນຢູ່ຂັ້ນຮາກຖານຕໍ່ໄປເພື່ອຮັບປະກັນ “ບໍ່ໃຫ້ມີໃຜຖືກຖິ້ມໄວ້ທາງຫຼັງ” ຜ່ານການແກ້ໄຂຄວາມແຕກໂຕນໃນພາກພື້ນ. (ສະຖານທູດຍີ່ປຸ່ນປະຈຳລາວ)
ຄໍາເຫັນ