ໃນໂອກາດນີ້, ທ່ານ ທອງສະຫວັນ ພົມວິຫານ ໄດ້ສະແດງຄວາມຍິນດີ ແລະ ຊົມເຊີຍ ຕໍ່ ທ່ານທູດ ຟີໂລເມໂນ ອາລິໂຊ ດາ ຄຣູສ ທີ່ໄດ້ສໍາເລັດການປະຕິບັດໜ້າທີ່ການທູດ ຢູ່ ສປປ ລາວ ຕະຫຼອດໄລຍະ 1 ປີ 4 ເດືອນ ຢ່າງຈົບງາມ ແລະ ໄດ້ຮັບຜົນສໍາເລັດຫຼາຍດ້ານ, ພ້ອມທັງຕີລາຄາສູງ ຕໍ່ສາຍພົວພັນມິດຕະພາບທີ່ເປັນມູນເຊື້ອ ແລະ ການຮ່ວມມືອັນດີ ລະຫວ່າງ ສປປ ລາວ ແລະ ຕີມໍ-ເລສເຕ ຕະຫຼອດໄລຍະ 2 ທົດສະວັດກວ່າ ທີ່ຜ່ານມາ ທີ່ໄດ້ຮັບການພັດທະນາຢ່າງຕໍ່ເນື່ອງ ພາຍຫຼັງທີ່ສອງປະເທດ ໄດ້ສ້າງຕັ້ງສາຍພົວພັນການທູດນຳກັນ ແຕ່ວັນທີ 29 ກໍລະກົດ 2002 ເປັນຕົ້ນມາ. ໂດຍເຫັນໄດ້ຈາກການແລກປ່ຽນການຢ້ຽມຢາມຂອງການນຳຂັ້ນສູງຂອງສອງປະເທດ ໃນຊຸມປີຜ່ານມາ, ໂດຍສະເພາະການຢ້ຽມຢາມທາງລັດຖະກິດ ຢູ່ ສປປ ລາວ ຂອງ ທ່ານ ໂຈເຊ ຣາໂມສ ອໍຕ້າ ປະທານາທິບໍດີ ແຫ່ງ ສາທາລະນະລັດ ປະຊາທິປະໄຕ ຕີມໍ-ເລສເຕ ພ້ອມດ້ວຍຄະນະຜູ້ແທນຂັ້ນສູງ ໃນຕົ້ນປີ 2024 ຜ່ານມາ ຊຶ່ງເປັນຂີດໝາຍສໍາຄັນ ແລະ ເປັນຄັ້ງປະຫວັດສາດ ທີ່ປະມຸກລັດຂອງຕີມໍ-ເລສເຕ ເດີນທາງຢ້ຽມຢາມ ສປປ ລາວ. ພ້ອມດຽວກັນນີ້, ທ່ານລັດຖະມົນຕີກະຊວງການຕ່າງປະເທດ ໄດ້ສະແດງຄວາມເຊື່ອໝັ້ນວ່າ ພາຍຫຼັງທີ່ ທ່ານ ຟີໂລເມໂນ ອາລີໂຊ ດາ ຄຣູສ ເດີນທາງກັບຄືນປະເທດແລ້ວ, ທ່ານຈະສືບຕໍ່ສົ່ງເສີມຂະແໜງການທີ່ກ່ຽວຂ້ອງຂອງທັງສອງຝ່າຍ ເພື່ອຈັດຕັ້ງປະຕິບັດບັນດາຂໍ້ຕົກລົງທີ່ສອງຝ່າຍໄດ້ລົງນາມຮ່ວມກັນ, ພ້ອມທັງຊອກຫາຊ່ອງທາງໃນການຮ່ວມມືທາງດ້ານເສດຖະກິດ, ການຄ້າ, ການລົງທຶນ, ການທ່ອງທ່ຽວ, ກະສິກໍາ, ການນໍາເຂົ້າ ແລະ ສົ່ງອອກນໍ້າມັນ ແລະ ອາຍແກັສ ແລະ ດ້ານອື່ນໆ ໃນຊຸມປີຕໍ່ໜ້າ.
ທ່ານ ຟີໂລເມໂນ ອາລິໂຊ ດາ ຄຣູສ ກໍໄດ້ສະແດງຄວາມຂອບໃຈຢ່າງຈິງໃຈມາຍັງລັດຖະບານ ແລະ ປະຊາຊົນລາວ, ໂດຍສະເພາະ ກະຊວງການຕ່າງປະເທດ ທີ່ໄດ້ອໍານວຍຄວາມສະດວກ ແລະ ໃຫ້ຄວາມຮ່ວມມືເປັນຢ່າງດີ ໃນການເຄື່ອນໄຫວວຽກງານ ແລະ ປະຕິບັດໜ້າທີ່ການທູດຂອງຕົນຢູ່ ສປປ ລາວ ຈົນໄດ້ຮັບຜົນສໍາເລັດຢ່າງຈົບງາມ, ພ້ອມທັງຢ້ຳຄືນຄໍາໝາຍໝັ້ນ ຈະສືບຕໍ່ຊຸກຍູ້ບັນດາກະຊວງ ແລະ ຂະແໜງການທີ່ກ່ຽວຂ້ອງຂອງ ຕີມໍ-ເລສເຕ ໃນການຜັນຂະຫຍາຍບັນດາຂໍ້ຕົກລົງ ທີ່ສອງຝ່າຍໄດ້ລົງນາມຮ່ວມກັນ, ເພື່ອປະກອບສ່ວນເຂົ້າໃນການຮັດແໜ້ນ ແລະ ເສີມຂະຫຍາຍສາຍພົວພັນມິດຕະພາບ ແລະ ການຮ່ວມມືທີ່ດີ ຂອງສອງປະເທດ ລາວ ແລະ ຕີມໍ-ເລສເຕ ໃຫ້ໄດ້ຮັບການພັດທະນາ ແລະ ແຕກດອກອອກຜົນຍິ່ງໆຂຶ້ນ. ໃນຕອນທ້າຍ, ທ່ານທູດຕີມໍ-ເລສເຕ ໄດ້ເຊື້ອເຊີນ ທ່ານ ທອງສະຫວັນ ພົມວິຫານ ຢ້ຽມຢາມທາງການ ທີ່ ຕີມໍ-ເລສເຕ ແລະ ຫວັງວ່າ ຈະມີໂອກາດໄດ້ຕ້ອນຮັບທ່ານລັດຖະມົນຕີ ໃນອະນາຄົດ.
(ຂ່າວ-ພາບ: ກະຊວງການຕ່າງປະເທດ)
ຄໍາເຫັນ