 |
ທ່ານ ຄາລາໂຊ ຫຼຸຍບົວທອງ ກຳມະການພັກແຂວງເລຂາຄະນະບໍລິຫານງານພັກເມືອງລາຍງານໂດຍຫຍໍ້ກ່ຽວກັບການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ ແລະ ສະພາບໄພພິບັດນໍ້າຖ້ວມຢູ່ເມືອງໄຊບູລີ ປະຈຳປີ 2026. ເມືອງໄຊບູລີ ໄດ້ຮັບຜົນກະທົບຈາກນໍ້າຖ້ວມນັບແຕ່ວັນທີ 8 ສິງຫາ 2026 ເປັນຕົ້ນມາ, ທົ່ວເມືອງມີ 52 ບ້ານ. ໃນນັ້ນ, ຖືກນໍ້າຖ້ວມ 13 ບ້ານ, 1,573 ຄອບຄົວ, 8,569 ຄົນ. ສ່ວນບ້ານທີ່ມີເນື້ອທີ່ທໍາການຜະລິດກະສິກໍາຖືກຖ້ວມ ມີ 34 ບ້ານ ລວມເນື້ອທີ່ 5,961 ເຮັກຕາ. ນອກນັ້ນ, ຍັງມີເສັ້ນທາງ, ຂົວ, ໂຮງຮຽນ 7 ແຫ່ງ, ສຸກສາລາ 2 ແຫ່ງ, ວັດ 11 ແຫ່ງ ຖືກນໍ້າຖ້ວມ ແລະ ໄດ້ຈັດຕັ້ງສູນພັກເຊົາຊົ່ວຄາວ 6 ສູນ, ປັດຈຸບັນ ລະດັບນໍ້າເຊບັ້ງໄຟ ແລະ ເຊນ້ອຍ ໄດ້ຫຼຸດລົງຕໍ່ເນື່ອງ ແຕ່ຍັງຢູ່ໃນເຂດສ່ຽງໄພ.
ໂອກາດດັ່ງກ່າວ, ທ່ານ ໂພໄຊ ໄຊຍະສອນ ໄດ້ສະແດງຄວາມຍ້ອງຍໍຊົມເຊີຍຕໍ່ຄະນະພັກ-ຄະ ນະນຳເມືອງ ໃນການເອົາໃຈໃສ່ນຳພາ-ຊີ້ນຳ ແລະ ໄດ້ໃຫ້ທິດຊີ້ນຳໃນການພັດທະນາເສດຖະກິດ-ສັງຄົມຂອງເມືອງໃນຕໍ່ໜ້າ. ພ້ອມນີ້, ທ່ານລັດຖະມົນຕີກະຊວງແຮງງານ ແລະ ສະຫວັດດີການສັງຄົມ ຍັງໄດ້ມອບເຄື່ອງບັນເທົາທຸກໃຫ້ຄະນະກຳມະການຄຸ້ມຄອງໄພພິບັດຂັ້ນເມືອງ ເພື່ອນຳໄປແຈກຢາຍໃຫ້ປະຊາຊົນຜູ້ປະສົບໄພ ຊຶ່ງປະກອບມີ: ເຂົ້າສານຈ້າວ 2 ໂຕນ, ນໍ້າດື່ມ, ໝີ່ກ່ອງ, ໄຂ່ໄກ່, ເຄື່ອງໃຊ້ໃນຄົວເຮືອນ ແລະ ເຄື່ອງສຸຂະພັນ ລວມມູນຄ່າ 101,340,000 ກີບ.
ຈາກນັ້ນ, ຄະນະການນຳຂັ້ນສູນກາງ, ແຂວງ ແລະ ເມືອງ ຍັງໄດ້ເດີນທາງໄປຢ້ຽມຢາມ ພ້ອມທັງມອບເຄື່ອງບັນເທົາທຸກ ຈຳນວນໜຶ່ງໃຫ້ປະຊາຊົນບ້ານດ້າງສະຫວັນ ເມືອງໄຊບູລີ ເພື່ອເປັນກຳລັງໃຈໃຫ້ຜູ້ປະສົບໄພໃນຄັ້ງນີ້ ຕື່ມອີກ.
ຂ່າວ: ສະຫວັນນະເຂດ
ຄໍາເຫັນ